Pune News : उमेदवारी अर्ज दाखल करण्यासाठी अवघे काही तास शिल्लक असताना राजकीय घडामोडींना अतिशय वेग आलेला आहे. उमेदवार याद्या जाहीर झाल्या नसल्या तरी पक्षांकडून एबी फॉर्म वाटप करून उमेदवारी अर्ज दाखल करण्यास सुरुवात केली आहे. पुणे महापालिका निवडणुकीत शरद पवारांची राष्ट्रवादी महाविकास आघाडीतून बाहेर पडल्याचं निश्चित झाल्यानंतर आघाडीतल्या इतर घटक पक्षांनी जागा वाटपाचा फॉर्मुला सेट केला आहे. यामध्ये काँग्रेसच मोठा भाऊ असल्याचं अर्थात सर्वाधिक जागा लढवणार असल्याचं निश्चित झालं आहे.
महाविकास आघाडीची आज पुण्यात महत्त्वपूर्ण बैठक पार पडली. या बैठकीनंतर आघाडीच्या नेत्यांनी माध्यमांशी संवाद साधला. यावेळी काँग्रेसकडून आमदार सतेज पाटील आणि शिवसेनेकडून आमदार सचिन अहिर उपस्थित होते. यावेळी या दोन्ही नेत्यांनी महाविकास आघाडीच्या फॉर्म्युलाबाबत माहिती दिली. सतेज पाटील यांनी सांगितलं की, "आज काँग्रेसकडून 60 उमेदवारांना एबी फॉर्म देण्यात येणार आहेत. तसेच शिवसेना उद्धव बाळासाहेब ठाकरे पक्षाकडून देखील 45 नावांची निश्चिती करण्यात आली असून त्यांना एबी फॉर्मचे वाटप करण्यात येणार आहे. त्यामुळं 165 पैकी 105 जागांवरती एकमत झालं असून सध्या मनसेला 21 जागा सोडण्याबाबत सहमती झाली असल्याचं देखील सांगण्यात आलं.
त्यामुळं आता महाविकास आघाडीमध्ये 39 जागांवर पेच फसला असल्याचं समोर आलं आहे. तसंच पुणे महापालिका निवडणुकीत एकत्र येण्याबाबत वंचित बहुजन आघाडी सोबत देखील बोलणी सुरू असून त्यांना देखील काही जागा दिल्या जाणार असल्याचं महाविकास आघाडीच्या नेत्यांनी सांगितलं. मनसेनं अतिरिक्त जागांची मागणी केली असून त्या अतिरिक्त जागा तडजोडीनंतर दिल्या जाऊ शकतात असंही महाविकास आघाडीच्या नेत्यांनी यावेळी स्पष्ट केलं.
दरम्यान, बैठकीच्या फेऱ्यांमध्ये शेवटच्या टप्प्यापर्यंत शरद पवारांची राष्ट्रवादीशी आमची चर्चा सुरु होती. एकूणच आम्हाला सर्व जागांवरती उमेदवार मिळू नयेत अशी काहीशी रणनीती त्यांची असावी मात्र यावेळेस आम्ही सावध होतो आणि आमच्याकडं सर्वच्या सर्व जागांवर उमेदवार असणार असल्याचं महाविकास आघाडीच्या नेत्यांनी सांगितलं. तसंच काही जागांवर उमेदवार निश्चिती झाली तरी पुढील उमेदवार कोण असणार? याचा अंदाज घेऊन इतर पक्षातील नेते आमच्याकडे येऊ शकतात. त्यानुसार पक्षप्रवेश देऊन उमेदवारी जाहीर करण्यात येणार असल्याचं सतेज पाटील यांनी सांगितलं.
सरकारनामाचे सदस्य व्हा
शॉपिंगसाठी 'सकाळ प्राईम डील्स'च्या भन्नाट ऑफर्स पाहण्यासाठी क्लिक करा.
Read Latest Marathi Political News, Breaking Political News from Maharashtra, India, Pune & Mumbai at Sarkarnama. To Get Live Political Marathi News on Mobile, Download the Sarkarnama Mobile App for Android and IOS. सरकारनामा आता सर्व सोशल मीडिया प्लॅटफॉर्मवर. ताज्या राजकीय घडामोडींसाठी फेसबुक, ट्विटर, इन्स्टाग्राम, शेअर चॅट, टेलिग्रामवर आणि व्हॉट्सॲप आम्हाला फॉलो करा. तसेच, सरकारनामा यूट्यूब चॅनेलला आजच सबस्क्राइब करा.