Pune Rave Party Raid : "जावयाला कडेवर उचलून ठेवलं नाही, आधीच माहिती होतं तर...", एकनाथ खडसेंच्या प्रतिक्रियेला महाजनांचं प्रत्युत्तर

Pune Rave Party Raid : पुण्यातील खराडी भागातील एका सोसायटीत सुरू असणार्‍या रेव्ह पार्टीवर पोलिसांच्या छापेमारीत जेष्ठ नेते एकनाथ खडसे यांचे जावई आणि रोहिणी खडसे यांचे पती प्रांजल खेवलकर यांच्यासह सात जणांना अटक करण्यात आली आहे. त्यामुळे राजकीय वर्तुळात एकच खळबळ उडाली आहे.

अशातच आता या कारवाईवर एकनाथ खडसे यांनी प्रतिक्रिया दिली आहे. हे होणारच होतं हे मला माहीत आहे, असं म्हणत त्यांनी अप्रत्यक्षपणे कोणीतरी हे षडयंत्र रचल्याचा आरोप केला आहे. त्यांच्या याच वक्तव्यावर आता कट्टर विरोधक असलेले मंत्री गिरीश महाजन यांनी जोरदार प्रत्युत्तर दिलं आहे.

महाजन म्हणाले, "हा ट्रॅप होणार हे खडसेंना माहीती होतं तर त्यांनी आपल्या जावयांना तसं सांगायचं होतं. त्यांना अलर्ट करायचं होतं, असं कसं होऊ शकतं, खडसे यांचे जावई हे कोणी लहान नाहीत, त्यांना कडेवर उचलून तिथे ठेवले नाही, या प्रकरणात चौकशी होणे गरजेचे आहे. दोषींवर कठोर कारवाई व्हावी ही माझी मागणी आहे."

मागील काही दिवसांपासून मंत्री गिरीश महाजन आणि एकनाथ खडसेंमध्ये आरोप-प्रत्यारोपाच्या फैरी झडत आहेत. अशातच खडसेंचे जावई पुण्यात रेव्ह पार्टीमध्ये सापडल्यामुळे हे सत्ताधाऱ्यांचं षडयंत्र तर नाही ना? असा सवाल विरोधकांकडून उपस्थित केला जात आहे. मात्र, हे आरोप मंत्री महाजन यांनी फेटाळून लावले आहेत.

मला या रेड संदर्भातील काही माहिती नव्हती, मी काल पंढरपूरमध्ये होतो, रात्री उशीरा मला फोन आल्यानंतर मी संबंधित बातमी टिव्ही पाहिली तेव्हा मला या घटनेची माहिती समजली असून याबाबतची अधिक काही माहिती नाही. पोलिस याबाबतचा तपास करत असून तपासातून सर्व गोष्टी समोर येतील, असं त्यांनी सांगितलं.

शिवाय काही झालं की यांनी केलं, त्यांनी केलं, षडयंत्र आहे असं म्हणणं चुकीचं आहे, असं काहीही नसतं, तपासामध्ये सर्व काही समजेल. शिवाय चाळीसगावमध्ये मोठ्या प्रमाणात अमली पदार्थ मिळाल्याचं नाथाभाऊ बोलत होते. त्यानंतर आता त्यांचे जावई अशा पध्दतीने सापडल्याचं समजत आहे. हा सर्व तपासाचा भाग असून तिथे किती जण होते हे तपासातून समोर येईलच, असंही त्यांनी म्हटलं आहे.

दरम्यान, शरद पवारांच्या राष्ट्रवादीचे आमदार रोहित पवार यांनी ट्विट करत या प्रकरणावर संशय व्यक्त केला आहे. त्यांनी लिहिलं की, पुण्यातील कथित रेव्ह पार्टी प्रकरणात पोलीस तपास आणि न्याय वैद्यकीय चाचणीत सत्य समोर येईलच.

परंतू हनी ट्रॅप प्रकरणात सरकारला अडचणीत आणणाऱ्या खडसे साहेबांच्या कुटुंबाच्या बाबतीत राजकीय हिशोब चुकता करण्यासाठी तर केलं जात नाही ना, हेही बघितलं पाहिजे. कुणी दोषी असेल तर कायदेशीर कारवाई झालीच पाहिजे, परंतु हे राजकीय षडयंत्र असेल तर मात्र हे अत्यंत चुकीचं आणि राजकारणाचा स्तर खालच्या पातळीवर गेल्याचं लक्षण आहे, असं त्यांनी लिहिलं आहे.