Pune News, 27 Jul : पुण्याच्या उच्चभ्रू खराडी परिसरात हाउस पार्टीच्या नावाखाली सुरू असलेल्या रेव्ह पार्टीवर पुणे पोलिसांच्या गुन्हे शाखेने छापा टाकून मोठी कारवाई केली आहे. या कारवाईत अमली पदार्थ, दारू, हुक्का आणि गांजा जप्त करण्यात आला असून, एकूण 7 जणांना ताब्यात घेण्यात आलं आहे.
ताब्यात घेतलेल्यांमध्ये दोन महिला आणि पाच पुरुषांचा समावेश आहे. विशेष म्हणजे, या रेव्ह पार्टीत माजी मंत्री एकनाथ खडसे यांचे जावई प्रांजल खेवलकर यांच्यासह सहा जणांना ताब्यात घेण्यात आले. मोठ्या नेत्याच्या जावयाचा सहभाग आढळल्यामुळे आश्चर्य व्यक्त केलं जात आहे.
उच्चभ्रू सोसायटीतील फ्लॅटमध्ये रेव्ह पार्टी सुरू होती याबाबत पुणे पोलिसांना मिळालेल्या गुप्त माहितीच्या आधारे खराडी येथील एका लॉजमधील फ्लॅटवर रात्री उशिरा छापा टाकण्यात आला. या फ्लॅटमध्ये हाउस पार्टीच्या नावाखाली रेव्ह पार्टी सुरू असल्याचे आढळून आले.
पोलिसांनी छापेमारीदरम्यान मोठ्या प्रमाणात अमली पदार्थ, गांजा, दारू आणि हुक्क्याचा साठा जप्त केला. या कारवाईने पुण्यातील उच्चभ्रू वर्तुळात खळबळ उडाली आहे. या रेव्ह पार्टीत सहभागी असलेल्यांमध्ये शरद पवारांच्या राष्ट्रवादीच्या नेत्या रोहीणी खडसेंच्या पतीचा समावेश असल्याने या प्रकरणाला राजकीय वळण मिळाले आहे.
पोलिसांनी सात जणांना रंगेहाथ पकडले असून, त्यामध्ये दोन महिला आणि पाच पुरुष आहेत. ताब्यात घेतलेल्यांची ओळख अद्याप जाहीर करण्यात आलेली नाही, परंतु या प्रकरणात राजकीय नेत्याच्या कुटुंबीयांचा सहभाग असल्याने राज्यभरात चर्चा सुरू आहे
पुणे पोलिसांच्या गुन्हे शाखेने या प्रकरणी तपास सुरू केला असून, जप्त करण्यात आलेल्या अमली पदार्थांचे स्वरूप आणि त्यांचा स्रोत शोधण्यासाठी विशेष पथक कार्यरत आहे. ताब्यात घेतलेल्या सात जणांची चौकशी सुरू असून, या रेव्ह पार्टीमागील आयोजक आणि अन्य संशयितांचा शोध घेण्यासाठी पोलिसांनी कंबर कसली आहे.
पुण्यात अलीकडच्या काळात रेव्ह पार्टी आणि अमली पदार्थांचा वापर वाढल्याच्या घटना वारंवार समोर येत आहेत. यापूर्वीही मार्केटयार्ड आणि इतर भागांमध्ये अशा हुक्का पार्लर आणि रेव्ह पार्टीवर पोलिसांनी कारवाई केली आहे.
या पार्श्वभूमीवर, पुणे पोलिसांनी शहरातील अवैध धंद्यांवर नियंत्रण ठेवण्यासाठी कठोर पावले उचलण्याचे संकेत दिले आहेत. या प्रकरणाने पुण्यातील सामाजिक आणि राजकीय वर्तुळात खळबळ उडवली असून, पोलिसांच्या पुढील तपासाकडे सर्वांचे लक्ष लागले आहे.
सरकारनामाचे सदस्य व्हा
शॉपिंगसाठी 'सकाळ प्राईम डील्स'च्या भन्नाट ऑफर्स पाहण्यासाठी क्लिक करा.
Read Latest Marathi Political News, Breaking Political News from Maharashtra, India, Pune & Mumbai at Sarkarnama. To Get Live Political Marathi News on Mobile, Download the Sarkarnama Mobile App for Android and IOS. सरकारनामा आता सर्व सोशल मीडिया प्लॅटफॉर्मवर. ताज्या राजकीय घडामोडींसाठी फेसबुक, ट्विटर, इन्स्टाग्राम, शेअर चॅट, टेलिग्रामवर आणि व्हॉट्सॲप आम्हाला फॉलो करा. तसेच, सरकारनामा यूट्यूब चॅनेलला आजच सबस्क्राइब करा.