Murlidhar Mohol : केंद्रीय मंत्री मोहोळ यांनी पाठ थोपटून घेताच काँग्रेसने केला सवाल; हे खासदार पुण्याचे की जबलपूरचे?

Pune News : केंद्रीय राज्यमंत्री मुरलीधर मोहोळ यांनी रेल्वे मंत्रालयाकडे केलेल्या यशस्वी पाठपुराव्यामुळे पुण्यातून उत्तर भारताकडे जाणाऱ्या दोन महत्त्वाच्या रेल्वे गाड्यांना मंजुरी मिळाली असल्याची माहिती खासदारांकडून देण्यात आली. यामध्ये हडपसर (पुणे) ते बनारस (वाराणसी) दरम्यान नवीन 'अमृत भारत' रेल्वे सुरू करण्याचा आणि सध्याची पुणे-जबलपूर स्पेशल ट्रेन नियमित करण्याचे दोन मोठे निर्णय घेण्यात आले आहेत, असे मुरलीधर मोहोळ यांनी सांगितले. मात्र, या घोषणेनंतर काँग्रेसने मोहोळ यांच्यावर सडकून टीका केली आहे.

पुण्यातून उत्तर भारताकडे जाणाऱ्या दोन महत्त्वाच्या रेल्वे गाड्यांना मंजुरी मिळाली आहे. यामध्ये हडपसर (पुणे) ते बनारस (वाराणसी) दरम्यान नवीन 'अमृत भारत' रेल्वे सुरू करण्याचा आणि सध्याची पुणे-जबलपूर स्पेशल ट्रेन नियमित करण्याचे दोन मोठे निर्णय घेण्यात आले आहेत. खुद्द केंद्रीय रेल्वेमंत्री अश्विनी वैष्णव यांनी मोहोळ यांना पत्र लिहून या संदर्भातील अधिकृत मंजुरी कळवली आहे.

महाराष्ट्रातील अंतर्गत रेल्वे गाड्या वाढवण्याच्या मागणीकडे दुर्लक्ष करून फारशी मागणी नसलेली पुणे–जबलपूर रेल्वे सेवा सुरू करणारे केंद्रीय राज्यमंत्री तथा खासदार मुरलीधर मोहोळ हे पुण्याचे की जबलपूरचे? असा सवाल काँग्रेसकडून करण्यात आला आहे. पुणे–जबलपूर विशेष रेल्वे सेवेला आमचा विरोध नाही. मात्र, पुणेकरांच्या व महाराष्ट्रातील प्रवाशांच्या मागण्या दुर्लक्षित करून ही सेवा सुरू करण्याचा अट्टाहास का? यामागे कोणते राजकारण आहे? असे प्रश्न काँग्रेस उपाध्यक्ष मोहन जोशी यांनी उपस्थित केले आहेत.

महाराष्ट्रातील काही गाड्यांचे टर्मिनल हडपसर येथे हलविण्यात येत असताना उत्तर भारतात जाणाऱ्या गाड्या पुणे स्थानकावरूनच सोडल्या जात आहेत. हा भेदभाव असून प्रवाशांसाठी त्रासदायक असल्याचे त्यांनी नमूद केले. पुणे–मुंबई, पुणे–नाशिक आणि पुणे–संभाजीनगर या मार्गांवर अधिक गाड्या सुरू करण्याची मागणी प्रलंबित आहे.

त्यासोबतच पुणे–लोणावळा लोकल सेवा विस्कळीत असून त्यात सुधारणा करण्याची गरज असल्याचे त्यांनी म्हटले आहे. रेल्वे स्थानकावरील अस्वच्छता, सुरक्षा आणि पिण्याच्या पाण्याबाबतही प्रवाशांच्या तक्रारी कायम असल्याचे जोशी यांनी पत्रकात नमूद केले. मेट्रो असो किंवा रेल्वे, गेल्या काही वर्षांत पुणेकरांवर अन्याय होत असल्याचा आरोपही त्यांनी केला आहे.