Pune Vidhan Sabha Counting : संपूर्ण निकाल कधी हाती येणार?; निवडणूक अधिकाऱ्यांनी दिली महत्वपूर्ण माहिती

Pune , 23 November : पुण्यातील आठ विधानसभा मतदारसंघासाठी वीस तारखेला मतदान झालं. त्याच्या मतमोजणीला सुरुवात होणार आहे. कोरेगाव पार्क येथील गोदामात शहरातील आठ विधानसभा मतदारसंघांतील ईव्हीएम ठेवण्यात आली होती. त्या ठिकाणी आता मतमोजणीला सुरुवात झाली आहे. पण, मतदानाची प्रक्रिया पूर्ण होण्यास किती कालावधी लागणार, याची सर्वांनाच उत्सुकता आहे. याबाबत मुख्य निवडणूक अधिकारी सुहास दिवसे यांनी माहिती दिली.

महाराष्ट्र विधानसभा निवडणूक निकाल Latest Update

माध्यमांशी संवाद साधताना दिवसे म्हणाले, सर्व उमेदवार आणि त्यांच्या प्रतिनिधींच्या उपस्थितीमध्ये सर्व ईव्हीएमच्या सिलिंग रूम ओपन करण्यात येत आहेत. त्याचबरोबर सर्व ‘स्टाफ’चीही कसून चौकशी करण्यात येत आहे. त्यानंतर आता पोस्टल बॅलेट मतदान मोजण्यास सुरुवात करण्यात आली आहे.

महाराष्ट्रातील निकालाची प्रत्येक घडामोड - येथे क्लिक करा...

मतमोजणीसाठी सुरक्षा व्यवस्था अत्यंत चोख ठेवण्यात आली आहे. थ्री टीयर्स पद्धतीची ही सुरक्षा व्यवस्था आहे. कोणालाही मोबाईल घेऊन मतमोजणीच्या ठिकाणी येऊन दिलं जात नाही. तसेच, एकदा मतमोजणीच्या ठिकाणी आल्यानंतर कोणीही बाहेर जाऊ शकणार नाही, असा नियम करण्यात आला आहे, असं सुहास दिवसे यांनी सांगितलं.

सध्या मतमोजणीला सुरुवात झाली असून पहिला राउंड साधारणतः नऊ ते सव्वा नऊपर्यंत पूर्ण होण्याची शक्यता आहे. मात्र, पोस्टल बॅलेटचे मतदान साधारणतः बारापर्यंत चालण्याची शक्यता आहे. कारण, जनता पोस्टल बॅलेट मतदान मोठ्या प्रमाणात झाले आहे, असं सुहास दिवसे म्हणाले.

निवडणूक निकालानंतर विजय मिरवणूक काढण्यास बंदी घालण्यात आली आहे. निवडणूक प्रक्रिया अत्यंत चांगल्या वातावरणात पार पडली आहे, त्यामुळे निवडणुकीनंतरही हे वातावरण चांगलं राहील, यासाठी पोलिस प्रशासन दक्ष आहे. तसेच, सर्व पक्षांच्या याबाबत बैठका घेतल्या असून त्यांनाही सूचना देण्यात आल्या आहेत.

पुण्यातील मतदान हे पाच टक्क्यांनी वाढले आहे. साधारणतः साडेतीनपर्यंत मतमोजणी पूर्ण होईल, असं सुहास दिवसे यांनी स्पष्ट केले आहे.

Edited By : Vijay Dudhale