Pune : आपल्या वेगळ्या बेघडक शैलीसाठी प्रसिद्ध असलेले साताऱ्याचे भाजपचे खासदार उदयनराजे भोसले (MP Udayanraje Bhosale)अनेकदा सार्वजनिक कार्यक्रमात आपल्या चाहत्यांना खुश करण्यासाठी डान्स करतात तर कधी कॉलर उडवतात. त्यांच्या या हटके स्टाइलचा राज्यभरात नव्हे तर देशभर औत्सुक्याचा विषय असतो.
"उदयराजे कॉलर उडवतात हे भाजपाच्या नियमावलीत बसते का? असा थेट प्रश्न काल (गुरुवारी) पत्रकाराने राजेंच्या उपस्थित केंद्रीय राज्यमंत्री अजयकुमार मिश्रा यांना विचारला. या प्रश्नाचे उत्तर देताना मिश्रांची चांगलीच दमछाक झाली. या प्रश्नाची चर्चा आता दिल्ली दरबारी सुरु झाली असून पक्षश्रेष्ठी यावर काय उत्तर देतात, याकडे सगळ्याचे लक्ष लागले आहे.
राजकीय परिणामांची भीती न बाळगता उदयराजेंनी केलेल्या अनेक वक्तव्यांमुळे यापूर्वी राज्यात धुरळा उडवून दिला आहे. पण आता ते करीत असलेले डान्स आणि उडवत असलेली कॉलर वादात सापडण्याची शक्यता नाकारता येत नाही.
अजयकुमार मिश्रा हे साताऱ्यात आले असताना त्यांनी पत्रकारांशी संवाद साधला. यावेळी मिश्रांना उदयनराजेंच्या विषयी साताऱ्यातील पत्रकाराने हा प्रश्न विचारून अडचणीत टाकले. विचारलेल्या प्रश्नानंतर उदयनराजे चांगलेच भडकल्याचे पाहायला मिळाले.
उदयनराजे काहीही करू शकतात..
उदयनराजे दहीहंडी कार्यक्रमात स्टेजवर मुलींसोबत नाचतात, कॉलर उडवतात हे भाजप पक्षाचा नियमावलीत बसते का असा थेट प्रश्न राज्यमंत्री मिश्रा यांना विचारण्यात आला होता. त्यानंतर मिश्रा यांनी "वैयक्तिक आयुष्यात उदयनराजे काहीही करू शकतात," असं उत्तर दिलं. त्यानंतर सुद्धा या दोघांमध्ये बराच वेळ शाब्दीच चकमक सुरू होती. ज्यांचा बद्दल हा प्रश्न विचारला गेला होता ते उदयनराजे मात्र शांत बसले होते. मात्र त्याचा देहबोलीवरून त्यांना राग आल्याचे स्पष्ट दिसत होते.
'मी नाही तुम्ही सगळे डॉन', कॉलर उडवली..
पत्रकार परिषदेत कॉलर उडविण्याचा मुद्या चर्चेत असताना गणेश विसर्जन मिरवणुकीत उदयनराजे भोसले यांनी कॉलर तर उडवली, पण 'मैं हु डॉन.." गाण्यावर थिरकणाऱ्या समर्थकांना 'मी नाही तुम्ही सगळे डॉन' म्हणाले, अन् एकच जल्लोष झाला.
"नाद नाय करायचा..'
खासदार उदयनराजेंची कॉलर उडविण्याची स्टाइल जगजाहीर आहे. जाहीर कार्यक्रमांत आणि भर सभेत कॉलर उडवून विरोधकांना आव्हान देणारे उदयनराजे आतापर्यंत सर्वांनी पाहिले आहे. कार्यकर्त्यांचा उत्साह वाढविण्यासाठी उदयनराजे ही स्टाईल करतात. कार्यकर्त्यांसोबत उदयनराजे कधी "नाद नाय करायचा..' या गाण्यावरही थिरकल्याचे पाहायला मिळाले आहे.
युवकांच्या गळ्यातील ताईत..
भेदक नजर, मजबूत शरीरयष्टी, तडकाफडकी जागेवर निकाल लावण्याच्या त्यांच्या वृत्तीचा साताऱ्यात नेहमीच बोलबाला असतो. युवकांच्या गळ्यातील ताईत असलेल्या उदयनराजे यांनी उगारलेले बोट, उडविलेली कॉलर, काय बाई सांगू कस ग सांगू.. हे म्हणलेले गाणे, त्यांची 007 क्रमांकाच्या जिप्सीचे नेहमी सर्वांना आकर्षण असते. चारचाकी इतकेच त्यांना दुचाकी वेगात चालविण्याची प्रचंड आवड आहे.
Edited By : Mangesh Mahale
Read Latest Marathi Political News, Breaking Political News from Maharashtra, India, Pune & Mumbai at Sarkarnama. To Get Live Political Marathi News on Mobile, Download the Sarkarnama Mobile App for Android and IOS. सरकारनामा आता सर्व सोशल मीडिया प्लॅटफॉर्मवर. ताज्या राजकीय घडामोडींसाठी फेसबुक, ट्विटर, इन्स्टाग्राम, शेअर चॅट, टेलिग्रामवर आणि व्हॉट्सॲप आम्हाला फॉलो करा. तसेच, सरकारनामा यूट्यूब चॅनेलला आजच सबस्क्राइब करा.