"मृत्यूंजय ते छावा अन् युगंधर" : राज ठाकरेंकडून ५० हजारांची तब्बल २०० पुस्तक खरेदी

पुणे : मनसे अध्यक्ष राज ठाकरे (Raj Thackeray) ४ दिवसांच्या पुणे (Pune) दौऱ्यावर आले आहेत. या दौऱ्यात त्यांनी काल अक्षरधारा बुक गॅलरीमध्ये जावून मनसोक्त पुस्तक खरेदीचा आनंद लुटला. त्यांची वाचनाची आवड सर्वश्रुत आहे. यावेळी त्यांनी आवड जपत मृत्यूंजय, छावा, युगंधर अशी ५० हजारांची तब्बल २०० पुस्तक खरेदी केली. विषेश म्हणजे या पुस्तक खरेदीवेळी त्यांनी कोणाचाही व्यक्तय खपवून घेतला नाही. प्रतिक्रिया घ्यायला आलेल्या पत्रकार आणि माध्यम प्रतिनिधींवर चिडले.

राज ठाकरे यांनी काल विविध विषयांवरील २०० हून अधिक पुस्तकं खरेदी केली. यामध्ये गोविंद सखाराम देसाई लिखित मराठी रियासतचे आठ खंड, वा.सी.बेंद्रे यांच्या रियासतचे सर्व खंड, मृत्यूंजय, छावा, युगंधर या पुस्तकांच्या डिलक्स आवृत्ती यासोबतच अनेक ऐतिहासिक, आत्मचरित्र आणि कला क्षेत्रातली पुस्तकं त्यांनी खरेदी केली आहेत.

याशिवाय शिवशाहीर बाबासाहेब पुरंदरे यांच्या राजा शिवछत्रपती (Raja Shiv Chhatrapati by Babasaheb Purandare) या चरित्रग्रंथात प्रसिद्ध चित्रकार दिनानाथ दलाल यांनी रेखाटलेल्या चित्रांचा संग्रह महाराज या नावाने प्रकाशित कऱण्यात आला आहे. त्याचीही माहिती घेतली.

राज ठाकरे यांच्या या पुस्तक खरेदीबाबत बोलताना अक्षरधारा बुक गॅलरीचे प्रमुख रमेश राठीवडेकर माध्यमांसोबत संवाद साधताना म्हणाले, राज ठाकरे यांनी आजवर आमच्या दालनास अनेक वेळा भेट दिली आहे. ते नेहमीच विविध प्रकारची पुस्तक खरेदी करतात. मात्र आज त्यांनी दीड तासात जवळपास २०० हून अधिक पुस्तके खरेदी केली आहेत.

यामध्ये मराठी रियासत, मृत्युंजयची नवीन आवृत्ती यासह अनेक ऐतिहासिक,आत्मचरित्र, कला क्षेत्रातील पुस्तकांची त्यांनी खरेदी केली आहे. जवळपास ५० हजारांची त्यांनी खरेदी केली. तसेच ठाकरे यांच्या सोबत दीड तास विविध विषयांवर यावेळी चर्चा देखील झाल्याचेही त्यांनी सांगितले.