Raj Thackeray : 'मुळशी पॅटर्न'ला ठाकरे ब्रँडचा दणका, पिट्याला समोरच झापलं, "एकाच ठिकाणी राहा!"

Pune News : महाराष्ट्र नवनिर्माण सेनेचे (मनसे) अध्यक्ष राज ठाकरे यांच्या पुणे दौऱ्यादरम्यान आज पक्षाच्या पदाधिकारी आणि कार्यकर्त्यांची महत्त्वाची बैठक पार पडली. आगामी स्थानिक स्वराज्य संस्था निवडणुकांच्या पार्श्वभूमीवर ही बैठक अत्यंत महत्त्वाची मानली जात होती. मात्र, या बैठकीत राज ठाकरे पदाधिकाऱ्यांवर प्रचंड नाराज दिसले.

मागील बैठकीत राज ठाकरे यांनी पदाधिकाऱ्यांना मतदारयादींची पडताळणी करण्याचं स्पष्ट काम सांगितलं होतं. आज जेव्हा त्यांनी या मतदारयाद्यांबाबत विचारणा केली, तेव्हा एकाही पदाधिकाऱ्याकडे याबाबत उत्तर नव्हतं. यामुळे संतापलेल्या राज ठाकरे यांनी थेट सुनावलं, "जमत नसेल तर पद सोडा! ज्यांना जबाबदारी दिल्यात, ते जबाबदाऱ्या पार पाडत नसतील तर त्यांना बाहेरचा रस्ता दाखवा!" अशा शब्दात राज ठाकरे यांनी संताप व्यक्त केला.

याच बैठकीत राज ठाकरे यांचं लक्ष पुढच्या खुर्चीवर बसलेल्या रमेश परदेशी उर्फ पिट्याकडे गेलं. 'मुळशी पॅटर्न' चित्रपटातील भूमिकेमुळे प्रसिद्धी मिळवलेले आणि मनसे चित्रपट सेनेचे उपाध्यक्ष तसेच शाखा अध्यक्ष असलेले परदेशी यांना राज ठाकरे यांनी त्यांच्या पोस्टबाबत जाब विचारला.

काही दिवसांपूर्वी रमेश परदेशी यांनी सोशल मीडियावर आरएसएसच्या संचलनाचा फोटो पोस्ट केला होता आणि त्यात "आरएसएसचा कट्टर समर्थक" असं लिहिलं होतं. हा फोटो राज ठाकरे यांनी पाहिल्याचं लक्षात येताच त्यांनी परदेशीला कार्यकर्त्यांसमोरच खडसावलं.

"छाती ठोकपणे सांगत होतास मी संघाचा कार्यकर्ता आहे... मग इकडे कशाला टाईमपास करतोस?" असा सवाल करत राज ठाकरे पुढे म्हणाले, "एकाच ठिकाणी कुठे तरी राहा!"

मुळशी पॅटर्न फेम पिट्याला मनसे अध्यक्षांनी समोरच कानपिचक्या दिल्याने बैठकीत प्रचंड खळबळ उडाली. पक्षनिष्ठा आणि एकनिष्ठेचा ठाकरे ब्रँडचा हा दणका पुन्हा एकदा सर्वांना जाणवला.आता पिट्या परदेशी काय भूमिका घेतात, याकडे सर्वांचं लक्ष लागलं आहे.