Ravindra Dhangekar: मुलाला तिकीट मिळावं म्हणून अजित पवारांची घेतली भेट? धंगेकरांनी स्पष्टच सांगितलं; भाजपविरोधात थोपटले दंड

Ravindra Dhangekar: पुणे महापालिकेत शिवसेना भाजप यांच्या युतीबाबत अद्याप कुठलाही तोडगा निघालेला नाही. उद्या उमेदवारी अर्ज भरण्याचा शेवटचा दिवस आहे. यापार्श्वभूमीवर शिवसेनेचे महानगर प्रमुख रविंद्र धंगेकर यांनी राष्ट्रवादी काँग्रेसचे प्रमुख अजित पवार यांची त्यांच्या पुण्यातील निवासस्थानी भेट घेतली. धंगेकरांनी आपल्या मुलाला उमेदवारी मिळावी यासाठी जोर लावलेला होता पण भाजपनं त्याला नकार दिला आहे. त्यामुळं मुलाला राष्ट्रवादीच्या मदतीनं उमेदवारी मिळतेय का? यासाठी त्यांनी पवारांची भेट घेतल्याची चर्चा सुरु होती. यावर पत्रकारांनी प्रश्न विचारल्यानंतर धंगेकरांनी स्पष्टपणे उत्तर दिलं. तसंच भाजपला आव्हान देखील दिलं आहे.

अजित पवारांसोबत बैठकीनंतर धंगेकरांनी बाहेर माध्यमांच्या प्रतिनिधींशी संवाद साधला. यावेळी पत्रकारांनी त्यांना तुम्ही जागांचा प्रस्ताव घेऊन गेला होतात? हा प्रश्न विचारला. त्याला स्पष्टपणे उत्तर देणं धंगेकरांनी टाळलं. ते म्हणाले, दादांना आम्ही भेटलो यावेळी पक्षाचे पदाधिकारी माझ्यासोबत होते. येणाऱ्या महापालिका निवडणुकीत यामध्ये कोणत्याही जागांचा प्रस्ताव आम्ही दिलेला नाही. आत्ता आम्ही केवळ भेटून त्यांच्याशी बोललो आहोत. यानंतर रात्री आमची पुन्हा चर्चा होणार आहे. राज्यात आपण एकत्र असल्यानं पुणे महापालिकेत देखील आपण बोलणी करु शकतो का? एवढंच आम्ही त्यांच्याशी बोललो. ही सदिच्छा भेट होती.

दरम्यान, राष्ट्रवादी काँग्रेसमध्ये जाण्याचा धंगकेरांचा मानस आहे का? या प्रश्नावर मी अजून शिवसेनेत आहे आणि कायम धनुष्यबाणावरच राहणार आहे, असं उत्तर धंगकेरांनी दिलं. तसंच मुलाला तिकीट न दिल्यामुळं शिवसेनेत तुम्ही नाराज आहात का? यावर मी नाराज वैगरे नाही. माझ्या मुलासाठी मी अजित पवारांकडं आलेलो नाही, माझा मुलगा शिवसेनेतून धनुष्यबाणावर शंभर टक्के निवडून येणार याबद्दल दुमत नाही. धनुष्यबाण आमच्या हातात आहे तो काय दुसऱ्याच्या हातात आहे का? अशा शब्दांत धंगेकरांनी आपल्या मुलाला उमेदवारी मिळणार आणि तो निवडूनही येणार असा विश्वास व्यक्त केला.

या भेटीद्वारे भाजपवर तुम्ही दबाव टाकण्याचा प्रयत्न करत आहात का? या पत्रकारांच्या प्रश्नावर धंगेकर म्हणाले, भाजपसोबतच्या शिवसेनेच्या युतीबाबत अद्याप स्पष्टता आलेली नाही. राष्ट्रवादीसोबत शिवसेनेच्या युतीची चर्चा करण्याच्या मला पक्षप्रमुख एकनाथ शिंदेंच्या कुठल्याही सूचना नव्हत्या. त्यामुळं भाजपवर आम्ही कुठल्याही प्रकारे दबावासाठी अजितदादांची भेट घेतलेली नाही. तर माझ्यासोबत शिवसेनेच्या कार्यकर्त्यांशी चर्चा झाल्यानंतर आम्ही अजितदादांना भेटण्यासाठी आलो होतो. दादांना भेटल्यानंतर आम्ही काही गोष्टींच्या चर्चा करण्याचा प्रयत्न केला यामध्ये आपण एकत्र आलो तर आपल्याला पुढं काय करता येईल? हे त्यांना विचारलं पण राष्ट्रवादीशी युतीबाबत त्यांनी अद्याप कुठलाही ग्रीन सिग्नल दिलेला नाही, त्यामुळं आज रात्री किंवा उद्या सकाळी अजित पवारांचं नेमकं म्हणणं काय हे आम्हाला कळेल.