Ravindra Dhangekar News: महायुतीत असूनही भाजपशी पंगा; आता शिवसेनेच्या धंगेकरांची थेट निवडणूक आयोगाकडेच मोठी मागणी

Pune News : राज्यातील 29 महापालिका निवडणुकांचा बिगुल आता वाजला आहे. मात्र, निवडणूक आयोगाकडून महापालिका निवडणुकीची घोषणा होण्याच्या काही वेळापूर्वी मुख्यमंत्री देवेंद्र फडणवीस यांच्या हस्ते आणि उपमुख्यमंत्री अजित पवार यांच्या उपस्थितीत पुण्यातील 3000 कोटींच्या विकासकामांचं भूमिपूजन आणि लोकार्पण कार्यक्रम संपन्न झाला.

एकप्रकारे यात कार्यक्रमाच्या माध्यमातून भाजपने पुणे महापालिकेच्या निवडणूक (PMC Election) प्रचाराचा शुभारंभ करत 3000 कोटींच्या कामाच्या माध्यमातून मतपेरणीचं केल्याचं बोललं जात आहे. मुख्यमंत्र्यांच्या उपस्थितीत होणाऱ्या या कार्यक्रमाची मोठ्या प्रमाणात जाहिरातबाजी भाजपकडून करण्यात आली होती.

या कार्यक्रमाला भाजपचे पदाधिकारी कार्यकर्ते आणि इच्छुक मोठ्या संख्येने उपस्थित होते. त्यासोबतच मुख्यमंत्री अजित पवार यांच्या राष्ट्रवादीचे कार्यकर्ते ही काही संख्येने या कार्यक्रमाला आले होते. तसेच उपमुख्यमंत्री एकनाथ शिंदे यांच्या पक्षाकडून उपसभापती नीलम गोऱ्हे या व्यासपीठावर उपस्थित होत्या. मात्र, त्याखेरीज शिवसेनेचे पदाधिकारी अथवा कार्यकर्ते म्हणावे असे या कार्यक्रमाला उपस्थित नसल्याचे पाहायला मिळालं.

पुणे महापालिकेचा हा कार्यक्रम असल्यामुळे त्याचे नियोजन आणि निमंत्रण कोणाकोणाला द्यायचं यासंदर्भातील सर्व जबाबदारी ही महापालिकेकडे होती. त्यामुळे निमंत्रण देताना शिंदेंच्या शिवसेना नेत्यांना निमंत्रण देण्यात आली नसल्याचं बोललं जात आहे.

एकनाथ शिंदेंच्या शिवसेनेचे महानगरप्रमुख असलेल्या माजी आमदार रवींद्र धंगेकरांनाही (Ravindra Dhangekar) या कार्यक्रमाचे निमंत्रण देण्यात आलं नसल्याचं सांगितलं जात आहे. त्यामुळे ते नाराज देखील असल्याचं बोललं जात आहे.

त्याच पार्श्वभूमीवर एकीकडे हा कार्यक्रम सुरू असताना दुसरीकडे रवींद्र धंगेकर यांनी एक महत्त्वाची मागणी केली. कुठेतरी ही मागणी त्यांना कार्यक्रमाला न बोलावल्याच्या नाराजीत न असल्याची चर्चा राजकीय वर्तुळात सुरू आहे.

मागणी करताना रवींद्र धंगेकर म्हणाले, राज्य निवडणूक आयोगाने पुणे महानगरपालिका आयुक्त नवल किशोर राम यांना सक्तीच्या रजेवर पाठवावे. निवडणुका हा लोकशाहीतील सर्वात मोठा उत्सव असतो. या निवडणुका निपक्ष;पातीपणे व्हाव्यात यासाठी प्रत्येक राजकीय कार्यकर्ता मनापासून प्रयत्न करत असतो.

आज शहरात महापालिका आयुक्त हे कामकाज करत असताना आयोगाचे नियम धाब्यावर बसवून कामकाज करत असल्याचे निदर्शनास येत आहे. पुणेकरांना नि:पक्षपातीपणे निवडणूक कार्यकाळात सक्षम अधिकारी मिळावा यासाठी माझी राज्य निवडणूक आयोगास विनंती आहे की निवडणूक होईपर्यंत नवल किशोर राम यांना सक्तीच्या रजेवर पाठविण्यात यावे. ही मागणी त्यांनी निवडणूक आयोगाकडे केली.