Uddhav Thackeray: गळती थांबता थांबेना, त्यात शिवसैनिकांना मिळवून दिली काँग्रेसची उमेदवारी; संतापलेल्या ठाकरेंनी विभागप्रमुखाला अद्दलच घडवली

Yavatmal News: नगरपालिकेच्या निवडणुकीत उद्धव बाळासाहेब ठाकरेंच्या शिवसेना स्वबळावर निवडणूक लढवत आहे. येत्या 20 डिसेंबरला मतदान होणार आहे. मात्र, त्यापूर्वीच यवतमाळ विधानसभा मतदारसंघाचे प्रमुख संतोष ढवळे यांची पक्षातून हकालपट्टी करण्यात आली आहे. यामुळे शिवसैनिकांना मोठा धक्का बसला आहे.

उद्धव ठाकरेंच्या (Uddhav Thackeray) शिवसेनेच्या काही इच्छुकांना काँग्रेसमध्ये पाठवले. त्यांना उमेदवारी मिळवून दिल्याचा ठपका त्यांच्यावर ठेवण्यात आला आहे. शिवसेनेचा आक्रमक चेहरा अशी ओळख असलेले ढवळे आता एकनाथ शिंदेंच्या शिवसेनेत जाणार असल्याच्या चर्चा जिल्ह्यात रंगल्या आहेत.

यवतमाळ विधानसभा मतदारसंघाचे प्रमुख संतोष ढवळे यांच्या हकालपट्टीचे आदेश पक्षप्रमुख उद्धव ठाकरे यांनी दिले. पालिका निवडणुकीत ते पक्षविरोधी कारवाया करून काँग्रेसला सहकार्य करत असल्याने कारवाई केल्याची माहिती संपर्क प्रमुख राजेंद्र गायकवाड यांनी दिली.

राज्यात शिवसेना (Shivsena) उद्धव बाळासाहेब ठाकरे, काँग्रेस तसेच राष्ट्रवादी काँग्रेस शरदचंद्र पवार पक्षाची महाविकास आघाडी आहे. जिल्ह्यातील अनेक पालिकेत महाविकास आघाडी कायम असली तरी यवतमाळ पालिका निवडणुकीत शिवसेना स्वंत्रत लढत आहे. असे असतानाही संतोष ढवळे यांनी काही शिवसैनिकांना काँग्रेस पक्षाची उमेदवारी मिळवून दिली.

या उमेदवारांसाठी ते शिवसेनेच्या विरोधात प्रचार करीत आहे. त्यामुळे पक्षाकडून त्यांच्यावर कारवाई केल्याची माहिती संपर्क प्रमुख राजेंद्र गायकवाड यांनी दिली. यवतमाळ पालिका निवडणुकीचा प्रचार सुरू आहे. २० डिसेंबरला मतदान होणार आहे. अशास्थितीत मतदारांना मतदार यादीच्या चिठ्ठ्या काही पक्षाकडून वाटप केल्या जात आहे. मात्र, हे वाटप करीत असताना पक्षाकडून फोटो असलेल्या मतदार चिठ्ठी दिल्या जात आहे.

या प्रकरणी निवडणूक निर्णय अधिकाऱ्यांकडे तक्रार करणार असल्याची माहिती गायकवाड यांनी दिली. संतोष ढवळे हे शिवसेनेशी अनेक वर्षांपासून जोडले आहेत. शिवसेनेतील आक्रमक चेहरा म्हणून त्यांची ओळख आहे. त्यांनी अनेक राजकीय, सामाजिक आंदोलनात आक्रमकपणे आवाज उठविला होता.

एका प्रकरणात ढवळे यांनी भाजप नेत्यांवर टीका करताना बक्षीस जाहीर केले होते. त्यामुळे ते राज्यभर चर्चेत आले होते. संघटनेत विविध जबाबदाऱ्या सांभाळणाऱ्या संतोष ढवळे यांनी विधानसभा निवडणूकही पक्षाच्या चिन्हावर लढविली तर एक वेळा अपक्ष म्हणूनही निवडणूक रिंगणात उतरले होते. पक्षात फूट पडली तेव्हा ते उद्धव ठाकरे यांच्या बाजूने होते.