Rohit Pawar : निवडणुकीच्या तोंडावर रोहित पवारांना का झाली KGFच्या गरुडाची आठवण?

Pune News : केंद्रीय निवडणूक आयोगाची आज साडेतीन वाजता पत्रकार परिषद आहे. या पत्रकार परिषदेमध्ये महाराष्ट्रातील निवडणूक कार्यक्रम जाहीर होण्याची शक्यता असल्याने आजच आचारसंहिता लागणार हे जवळपास निश्चित मानले जात आहे. यापूर्वी राज्य सरकारने आता घाईगडबडीत राज्यपाल नियुक्त आमदारांचा शपथविधी कार्यक्रम घेण्याचा निश्चित केला आहे. यावरून राष्ट्रवादी काँग्रेस शरद पवार पक्षाचे आमदार रोहित पवार यांनी सरकारवर निशाणा साधला आहे.

आज निवडणूक आयोगाची पत्रकार परिषद होणार असल्याचे जाहीर झाल्यानंतर प्रशासनाकडून एक प्रसिद्धीपत्रक जाहीर करण्यात आला आहे. त्यात आज दुपारी १२ वाजता राज्यपाल नाम नियुक्त सात विधान परिषद सदस्यांचा शपथविधी होणार असून उपसभापती डॉ नीलम गोर्‍हे या शपथ देणार आहेत असं नमूद करण्यात आला आहे.

प्रसिद्धी पत्रकात म्हटलं आहे की, १५ ऑक्टोबर २०२४- महाराष्ट्र विधान परिषदेसाठी राज्यपाल नामनियुक्त सात सदस्य आज दिनांक १५ ऑक्टोबर रोजी दुपारी १२ वाजता उपसभापती डॉ.नीलम गोऱ्हे यांचेकडून सदस्यत्वाची शपथ घेतील. विधान भवन (Vidhan Bhavan) मुंबई येथील मध्यवर्ती सभागृह येथे हा शपथविधीचा कार्यक्रम होईल. आज शपथ घेत असलेल्या नामनियुक्त सन्माननीय सदस्यांची नावे पुढीप्रमाणे - चित्रा वाघ, विक्रांत पाटील, बाबुसिंग महाराज राठोड, पंकज छगन भुजबळ, इद्रिस इलियास नाईकवाडी, हेमंत श्रीराम पाटील, डॉ मनीषा कायंदे यांचा नावाचा समावेश आहे.

या शपथविधीची घोषणा करण्यात आल्यानंतर राष्ट्रवादी काँग्रेस शरद पवार (NCP) पक्षाचे आमदार रोहित पवार यांनी सोशल मीडियावर एक पोस्ट केली आहे त्यामध्ये रोहित पवार म्हणाले, 'शेवटच्या घटका मोजत असलेल्या घटनाबाह्य सरकारने शेवटच्या दिवशी सुद्धा घटनेला तडे देण्याचे प्रयत्न सोडलेले नाही. राज्यपाल नियुक्त आमदारांचा विषय न्यायप्रविष्ट असताना देखील शेवटच्या दिवशी आमदार बनवण्याचा केविलवाणा प्रयत्न करत आहे.

KGF च्या गरुडा- अधिराप्रमाणे सर्व नियम कायदे बाजूला सारून ‘हम करे सो कायदा’ या पद्धतीने वागणाऱ्या या संविधनविरोधी सरकारचा अंत केल्याशिवाय महाराष्ट्र शांत बसणार नाही. असो सरकारला सत्तेतून महाराष्ट्र हद्दपार करेल याची शाश्वती आली असावी आणि या भीतीतूनच आमदार नियुक्तीचा निर्णय घेतला असेल.