Maval Lok Sabha Constituency : रावणाची उपमा देत श्रीरंग बारणेंवर निशाणा; संजोग वाघेरे नेमके काय म्हणाले?

Maval Lok Sabha Political News : लोकसभा निवडणुकीमुळे राज्याचे राजकीय वातावरण चांगलेच तापले आहे. सर्व मतदारसंघांतील प्रतिस्पर्धी उमेदवार एकमेकांवर आरोप-प्रत्यारोप करत आहेत. काही ठिकाणी उणी-दुणी काढत, इतिहास उगळत चिखलफेकही केली जात आहे. अशा वातावरणात मात्र मावळचे खासदार श्रीरंग बारणेंनी माझ्या विरोधात कोण आहे, हे मला माहीत नाही, असा टोला महाविकास आघाडीचे उमेदवार संजोग वाघेरेंना लगावला होता. यावर वाघेरेंनी बारणेंना रावणाची उपमा देत सडेतोड प्रत्युत्तर दिले. परिणामी मावळातील उभय उमेदवारांत चांगलाच कलगीतुरा रंगल्याचे दिसून येत आहे.

मावळ लोकसभा मतदारसंघातून महायुतीचे उमेदवार शिंदे गटाचे श्रीरंग बारणे आहेत, तर महाविकास आघाडीचे उमेदवार हे ठाकरे गटाचे संजोग वाघेरे Sanjog Waghere आहेत. मावळात दोन्ही नेत्यांनी प्रचाराची राळ उठवली आहे. दरम्यान, पिंपरी चिंडवड येथे बारणेंनी आपण वाघेरेंना अगदीच हलक्यात घेतल्याचे संकेत दिले. ते म्हणाले, मला माझ्या समोरचा उमेदवार कोण आहे, हे सध्या तरी माहीत नाही, असे म्हणत बारणेंनी आपण वाघेरेंना फारच हलक्यात घेतल्याचे स्पष्ट केले. यावर वाघेरेंनीही बारणेंचा अहंकार वाढल्याचे म्हणत पलटवार केला आहे.

संजोग वाघेरे मावळच्या तळेगावमध्ये आले असता गावभेटीदरम्यान साम टीव्हीशी बोलत होते. या वेळी वाघेरे म्हणाले, श्रीरंग बारणेंचा Shrirang Barne अहंकार वाढला आहे. त्यांनी मात्र लक्षात ठेवले पाहिजे, की या देशात रावणाचा अहंकार टिकला नाही, तर आपण कोण? येत्या 13 तारखेला त्यांच्या अहंकाराचा मतदारच अंत करेल, अशी जहरी टीका केली आहे. बारणे आणि वाघेरे यांच्या आरोप - प्रत्यारोपांनी मावळचे वातावरण ढवळून निघाले आहे.

(राजकारणातील महत्त्वाच्या बातम्यांचे अपडेट्ससाठी सरकारनामाचे अधिकृत WhatsApp चॅनल फॉलो करा!)

मावळचे खासदार श्रीरंग बारणे यांनी दोन वेळा आपला मतदारसंघ राखला आहे. गेल्यावेळी त्यांनी तत्कालीन राष्ट्रवादी काँग्रेसचे उमेदवार पार्थ पवारांचा मोठ्या फरकाने पराभव केला होता. आता बदलेल्या राजकीय स्थितीत यंदा उपमुख्यमंत्री अजित पवारच बारणेंच्या प्रचारासाठी उतरले आहेत. त्यांच्याविरोधात पूर्वाश्रमीचे अजितदादांचे शिलेदार आणि ठाकरे गटात गेलेले संजोग वाघेरेंना आव्हान उभे केले आहे.

(Edited by Sunil Dhumal)

R