Shaniwarwada Namaz Controversy : शनिवार वाड्यातील मजार किती जुनी ! रूपाली ठोंबरे पाटलांनी मेधा कुलकर्णींना दिला पुरावा

Pune News : शनिवार वाड्यामध्ये काही महिला नमाज पठण करत असल्याचा दावा करत भाजप खासदार मेधा कुलकर्णी यांनी एक व्हिडिओ सोशल मीडियावर पोस्ट केला होता. सोशल मीडियावर व्हिडिओ पोस्ट करण्याबरोबर कुलकर्णी यांनी काही हिंदुत्ववादी कार्यकर्त्यांसोबत शनिवार पाडा येथे येत प्रतिकात्मक आंदोलन देखील केलं.

या प्रतिकात्मक आंदोलनादरम्यान कुलकर्णी आणि त्यांच्यासोबत आलेल्या कार्यकर्त्यांनी शनिवार वाडा परिसरात असलेल्या मजारीवर भगवा झेंडा फडकवण्याचा प्रयत्न केला. तसेच शनिवारवाडे परिसरात गोमूत्र शिंपडून आंदोलन केले. या दरम्यान शनिवार वाडा परिसरातील असलेली ही मजार अनधिकृत असल्याचा दावा मेधा कुलकर्णी आणि कार्यकर्त्यांनी केला होता. त्याला राष्ट्रवादी काँग्रेसकडून उत्तर देण्यात आले आहे.

रुपाली पाटील ठोंबरे म्हणाल्या, भाजपने मेधा कुलकर्णींना आवरावे, शनिवार वाडा ,कुणा एकाच्या बापाचा नाही. यानंतर त्यांनी मजारी बाबतचा ऐतिहासिक पुरावा पुढे केला आहे. त्या आधारे ही मजार 1936 साली नमूद असल्याचं नोंद असल्याचे सांगितले आहे.

याबाबत बोलताना रूपाली पाटील ठोंबरे म्हणाल्या, उठा उठा दिवाळी आली,नौटंकी करणाऱ्या खासदाराला मेधा ताईला पुरावा दाखवण्याची वेळ आली. पुरातन विभागात शनिवारवाडा येथील मजार ही 1936 साली नमूद, नोंद आहे. ही नोंद सदाशिव पेठेतील चित्रशाळा प्रेस इथे झाली.

माझा जन्म सोडा हो, खासदार बाईसुद्धा जन्मलेल्या नव्हत्या. त्यामुळे पुण्यातील हिंदु मुस्लिम तेढ निर्माण करणाऱ्या खासदार मेधाताईवर तेढ निर्माण करणे,सामाजिक शांतता भंग करणे गुन्हा दाखल झालाच पाहिजे.

'आणि हो मी हिंदू आहे आणि गर्वसे म्हणतो आम्ही हिंदू आहे. पण धर्मा धर्मात तेढ,भेद निर्माण करणारे ,सामाजिक शांतता भंग करणे हिंदू नक्कीच नाही.नौटंकी,नाटके करणाऱ्या लोकांनी लक्षात ठेवायचे. ', असं देखील रूपाली पाटील ठोंबरे म्हणाल्या.