शिवाजीराव भोसले बँक : अडीच हजार ठेवीदारांना ४९ कोटींच्या ठेवी मिळाल्या

पुणे : शिवाजीराव भोसले सहकारी बॅंकेमधील ठेवीदारांना मंगळवार (ता. ९) अखेर दोन हजार ५५१ ठेवीदारांना ४८ कोटी ६३ लाख रुपयांच्या ठेवी परत करण्यात आल्या आहेत. उर्वरित ठेवीदारांना येत्या दोन महिन्यांत टप्प्याटप्प्याने ठेवी वितरित करण्यात येतील, अशी माहिती शिवाजीराव भोसले सहकारी बॅंकेचे अवसायक डॉ. आर. एस. धोंडकर यांनी दिली.

पाच लाख रुपयांच्या आतील सुमारे ७० हजार ठेवीदारांना त्यांच्या ठेवी परत करण्याची प्रक्रिया ऑक्टोबरअखेरपासून सुरू आहे. रिझर्व्ह बॅंकेने शिवाजीराव भोसले सहकारी बॅंकेवर आर्थिक निर्बंध लादले होते. त्यामुळे ठेवीदारांना खात्यातून एक हजार रुपयांपेक्षा अधिक रक्कम काढता येत नव्हती. त्यामुळे गरीब, मध्यमवर्गीय ठेवीदार अडचणीत आले होते. ठेव विमा महामंडळाकडून निधी प्राप्त झाल्यानंतर या बॅंकेतील ठेवीदारांना पाच लाखांपर्यंतच्या ठेवी परत करण्यात येत आहेत.

ठेव विमा महामंडळाकडून २७० कोटी रुपये प्राप्त झाले असून, बॅंकेकडील ११ कोटी रुपये अशा एकूण २८१ कोटींच्या ठेवी वितरित करण्यात येणार आहेत. त्यापैकी आजअखेर ४८ कोटी ६३ लाखांच्या ठेवी वितरित करण्यात आल्या आहेत. ठेवीदारांच्या खात्यामध्ये ३१ मे २०२१ अखेर शिल्लक रक्कम परत करण्यात येत आहे. ही रक्कम व्याजासह जास्तीत जास्त पाच लाख रुपयांपर्यंत असेल, असे बॅंकेचे अवसायक डॉ. धोंडकर यांनी सांगितले.

ज्या ठेवीदारांनी बॅंकेच्या शाखेत अद्याप केवायसी अर्ज जमा केलेले नाहीत. त्यांनी अर्जासोबत ठेव रकमेची पावती, दोन छायाचित्रे, आधार कार्ड, पॅन कार्ड, वीज बिल, इतर बॅंकेचा खाते क्रमांक, आयएफएससी कोड अशी कागदपत्रे (झेरॉक्स दोन प्रतींमध्ये) जमा करावीत, असे आवाहन अवसायकांकडून करण्यात आले आहे.

बॅंकेची सद्यःस्थिती

शाखा - १४

एकूण ठेवी - ४३२ कोटी रुपये

ठेवीदार संख्या - ७१ हजार ७७०

- एक लाख रुपयांच्या आतील ठेवीदार : ६३ हजार ६५८

- एक ते पाच लाख रुपयांपर्यंत ठेवीदार : ६ हजार ३००

- पाच लाख रुपयांवरील ठेवीदार : १ हजार ८१२