Someshwar election : 'सोमेश्वर'च्या निवडणुकीत दोन्ही राष्ट्रवादी एकत्र येणार? बिनविरोधसाठी पडद्यामागे सूत्रं हलली...

Baramati News : बारामती परिसरातील राजकीय आणि सहकार क्षेत्राचे लक्ष लागलेल्या सोमेश्वर सहकारी साखर कारखान्याच्या निवडणुकीबाबत सध्या राजकीय वर्तुळात जोरदार चर्चा सुरू आहे. 21 जागांसाठी तब्बल 514 उमेदवारी अर्ज दाखल झाल्याने सुरुवातीला निवडणूक चुरशीची होण्याची शक्यता व्यक्त केली जात होती. मात्र, पवार कुटुंबीयांच्या बैठकीनंतर निवडणूक बिनविरोध करण्याच्या हालचालींना वेग आल्याची चर्चा आहे.

सोमेश्वर साखर कारखान्याची निवडणूक बिनविरोध करण्यासाठी विविध राजकीय गटांमध्ये पडद्यामागे चर्चा सुरू असल्याचे बोलले जात आहे. विशेष म्हणजे, दोन्ही राष्ट्रवादी या निवडणुकीत एकत्र येणार का, याकडे सभासदांसह बारामती तालुक्यातील राजकीय नेत्यांचे लक्ष लागले आहे.

पवार कुटुंबीयांची नुकतीच महत्त्वाची बैठक झाल्याची माहिती समोर आली आहे. या बैठकीत सोमेश्वर कारखान्याच्या निवडणुकीबाबत चर्चा झाल्याचे सांगितले जात आहे. त्यामुळे निवडणूक बिनविरोध करण्यासाठी काही राजकीय समीकरणे जुळवली जात आहेत का, असा प्रश्न उपस्थित झाला आहे. मात्र, बैठकीत नेमका काय निर्णय झाला, याबाबत अधिकृत माहिती अद्याप स्पष्ट झालेली नाही.

दरम्यान, उमेदवारी अर्ज मागे घेण्यासाठी उद्या अंतिम मुदत आहे. दुपारी 3 वाजेपर्यंत उमेदवारांना अर्ज मागे घेता येणार आहेत. त्यामुळे किती उमेदवार माघार घेतात आणि अंतिम रिंगणात किती उमेदवार राहतात, यावर निवडणुकीचे खरे चित्र स्पष्ट होणार आहे.

सोमेश्वर सहकारी साखर कारखाना हा बारामती परिसरातील शेतकरी आणि सभासदांसाठी महत्त्वाचा सहकारी संस्था मानला जातो. त्यामुळे संचालक मंडळाच्या निवडीकडे संपूर्ण परिसराचे लक्ष आहे. 21 जागांसाठी दाखल झालेल्या 514 अर्जांमुळे निवडणुकीची उत्सुकता वाढली असतानाच आता बिनविरोध निवडीच्या चर्चेने राजकीय वातावरण आणखी तापले आहे.

अर्ज माघारीची प्रक्रिया पूर्ण झाल्यानंतर सोमेश्वर कारखाना निवडणुकीत प्रत्यक्ष लढत होणार की बिनविरोध संचालक मंडळ निवडले जाणार, हे स्पष्ट होईल. त्यामुळे उद्या दुपारी 3 वाजता सोमेश्वर साखर कारखाना निवडणुकीचे अंतिम चित्र समोर येणार आहे.