Malegaon Sugar Factory : अजित पवार गटाचे आणखी दोन उमेदवार आघाडीवर; नीळकंठेश्वर पॅनेल जिंकल्यास इतिहास घडणार

Baramati, 24 June : माळेगाव सहकारी साखर कारखान्याच्या निकालात उपमुख्यमंत्री अजित पवार गटाचे आणखी दोन उमेदवार आघाडीवर आहेत. तत्पूर्वी स्वतः अजितदादा हे ब वर्ग गटातून विजयी झाले आहेत, त्यामुळे अजित पवारांचा नीळकंठेश्वर पॅनेल तीन जागा जिंकण्याकडे वाटचाल करत आहे. दरम्यान, ‘माळेगाव’च्या निवडणुकीत अजित पवारांचे पॅनेल जिंकल्यास इतिहास घडणार आहे.

अनुसूचित जाती जमाती प्रवर्ग आणि इतर मागास प्रवर्गातून उपमुख्यमंत्री अजित पवारांच्या (Ajit Pawar) निळकंठेश्वर पॅनेलचे दोन्ही उमेदवार आघाडीवर आहेत. या दोन्ही उमेदवारांसह खुद्द अजित पवार असे तिघे जण नीळकंठेश्वर पॅनेल तिघे विजयाच्या उंबरठ्यावर आहेत.

माळेगाव सहकारी साखर कारखान्याच्या (Malegaon Sugar Factory) मतमोजणीत अनुसूचित जाती जमातीमधील 6820 मते आतापर्यंत मोजली आहेत. या प्रवर्गामध्ये अजित पवार यांच्या पॅनेलमधील उमेदवार रतनकुमार भोसले यांना 3440 मते मिळाली आहेत, तर तावरे गटातील बाबूराव गायकवाड यांना 3094 मते मिळाली आहेत. अजित पवार गटाचे रतनकुमार भोसले हे 376 मतांनी आघाडीवर आहेत. म्हणजेच या राखीव गटातसुद्धा तुल्यबळ सामना होत असल्याचे दिसून येत आहे.

माळेगावच्या निवडणुकीत रतनकुमार भोसले हे पहिली फेरीपासून आघाडीवर आहेत, तर विरोधी गटातील बाबूराव गायकवाड हे पिछाडीवर आहेत. भोसले यांनी पहिल्या फेरीपासून मिळविलेले आघाडी कायम ठेवली आहे. मात्र ही आघाडी फार मोठी मानली जात नाही, त्यामुळे कोण जिंकणार, याची उत्सुकता कायम असणार आहे.

इतर मागास प्रवर्गातून निळकंठेश्वर पॅनेलचा उमेदवार आघाडीवर आहे. इतर मागास प्रवर्गातील 1800 मते आतापर्यंत मोजली आहेत. इतर मागास प्रवर्गातून अजित पवार गटाच्या श्री निळकंठेश्वर पॅनेलचे नितीन शेंडे हे सुमारे 262 मतांनी आघाडीवर आहेत. आता ही आघाडी शेंडे कुठपर्यंत टिकवून ठेवणार, हे पाहावे लागणार आहे.

तत्पूर्वी, सकाळी माळेगाव सहकारी साखर कारखान्याच्या ब वर्ग गटातून म्हणजे सोसायटी मतदारसंघातून उपमुख्यमंत्री अजित पवार हे विजयी झाले आहेत. अजितदादांना सोसायटी मतदारसंघातून ९१ मते मिळाली आहेत, त्यांचे विरोधक सहकार बचाव पॅनेलचे भालचंद्र देवकाते यांना केवळ 10 मते मिळाली आहेत. अजित पवार यांनी तब्बल ८१ मते मिळवित विजय प्राप्त केला आहे.