Vasant More : 'वंचित'च्या आणखी एका पराभूत उमेदवाराने घेतली नवीन कार

Vasant More News : लोकसभा निवडणुकीत पराभूत झालेले वंचित बहुजन आघाडीचे उमेदवार वसंत मोरे यांनी नवीन कार घेतली आहे. आपल्या एक्स (ट्विटरवर) 'एक नवी सुरुवात... #Added_88' असे लिहित गाडीसोबत आपला व्हिडिओ पोस्ट केला आहे. या व्हिडिओ रिलमध्ये वसंत मोरे गाडी खरेदीनंतर स्वतः चालवत ती घेवून जात असल्याचे दिसत आहे.

वसंत मोरे हे पुणे लोकसभा मतदारसंघातून 'वंचित'चे उमेदवार होते. येथून भाजपचे मुरलीधर मोहोळ विजयी झाले तर, काँग्रेसचे उमेदवार रवींद्र धंगेकर हे दुसऱ्या क्रमांकावर तर वसंत मोरे हे तिसऱ्या क्रमांकावर राहिले.

पुणे लोकसभा निवडणुकीत वसंत मोरे Vasant More यांना 31 हजार मतं मिळाली होती. भाजपचे उमेदवार मुरलीधर मोहोळ हे दीड लाखांच्या फरकाने लोकसभा निवडणुकीत विजयी झाले होते. पराभवानंतर मोरे यांनी ते वंचित सोबत राहणार असल्याचे स्पष्ट केले होते. दरम्यान, वसंत मोरे यांनी घेतलेली कार ही एमजी ग्लोस्टर असल्याचे व्हिडिओमध्ये दिसत आहे.

लातूरचा उमेदवारही चर्चेत

लोकसभा Lok Sabha निवडणुकीत लातूर मतदारसंघातून पराभूत झालेले वंचित बहुजन आघाडीचे उमेदवार नरसिंग उदगीरकर यांनी एकाच दिवशी चार कोटींच्या दोन गाड्या बुक केल्याने सोशल मीडियावर त्यांना ट्रोल केल्याची घटना दहा दिवसापूर्वी घडली होती. त्यावर नरसिंग उदगीरकर यांच्या मुलाने आपल्या परिवाराने वडिलांना गाडी गिफ्ट दिल्याचे सांगत ट्रोल करणारांना उत्तर दिले होते.