Eknath Shinde Shiv Sena : ‘सुपडा साफ’चा बदला झेडपीत? पुण्यात शिवसेना किंगमेकर बनणार, आमदारांचा राजकीय डाव!

Pune Zilla Parishad Election : पुणे महापालिका निवडणुकीमध्ये भाजप आणि उपमुख्यमंत्री एकनाथ शिंदे यांच्या शिवसेनेची युती होऊ शकली नाही. त्यानंतर शिंदेसेनेने स्वबळावरती तब्बल 100 हून अधिक जागा लढवल्या.

मात्र त्यांना एकही जागा जिंकता आली नाही. त्यानंतर आता शिंदेसेनेला जिल्हा परिषदेवरती झेंडा फडकवण्याची आशा आहे. मात्र हा विजय संपादन करत असताना आपली एक हाती सत्ता आली नाहीस तरी आपण किंगमेकरच्या भूमिकेत असू, असा विश्वास शिंदेला वाटत आहे.

एकनाथ शिंदे (Eknath Shinde) यांचे निकटवर्ती असलेल्या आमदार विजय शिवतारे यांनी याबाबतची गणितं मांडली आहेत. पुण्याचा जिल्हा परिषद अध्यक्ष हा शिवसेनेच्या सूचनेनुसारच होईल. सत्तेची चावी ना अजित पवारांकडे असेल ना भाजपकडे. त्या आपल्याकडे असतील असा विश्वास विजय शिवतारे यांना वाटत आहे.

भोरमध्ये झेडपीच्या पंचायत समिती निवडणुकीच्या अनुषंगाने शिवसेना (Shivsena) उमेदवारांच्या प्रचार शुभारंभ विजय शिवतारे यांच्या हस्ते भोरमधील मोहरी इथल्या अमृतेश्वर मंदिरातून केला. यानंतर आयोजित सभेमध्ये बोलताना माजी मंत्री आमदार विजय शिवतारे हे बोलत होते.

विजय शिवतारे म्हणाले, "आम्ही प्लॅन केलं आहे. उपमुख्यमंत्री एकनाथ शिंदे यांनी सांगितला आहे की, आपण पूर्ण ताकदीने या पुणे जिल्हा परिषदेच्या निवडणुकीमध्ये उतरायचं आहे. मागील जिल्हा परिषद निवडणुकांमध्ये आमचे 13 सिटिंग उमेदवार आहेत. तर अवघ्या काही मतांनी पडलेल्या 21 जागा आहेत."

त्यामुळे यंदाच्या निवडणुकीत 25 ते 30 सिट शिवसेनेचे येणारं हे निश्चित आहे. पूर्ण पुणे जिल्ह्यात शिवसेनेचे अस्तित्व मोठ्या प्रमाणावर निर्माण करण्यासाठी एकनाथ शिंदे यांनी चंग बांधलेला आहे. आगामी काळामध्ये पुणे जिल्ह्यातील आमदारही शिवसेनेचे असतील या दृष्टिकोनातून व्यूहरचना आखली जात असल्याचे देखील शिवतारे यांनी सांगितलं आहे.