सरकारने काळया यादीत टाकलेल्या कंपनीला राजेश टोपे यांनी कंत्राट का दिले?

पुणे : आरोग्य विभागाच्या (Department of Health) रविवारी आज (ता.24ऑक्टोबर) झालेल्या परीक्षेत तिसऱ्यांदा गोंधळ उडाल्याने अनेक विद्यार्थ्यांना नाहक मनस्ताप करावा लागला. या गोंधळाला आरोग्यमंत्री राजेश टोपे (Rajesh Tope) हेच जबाबदार असून या गोंधळाची जबाबदारी स्वीकारत मंत्री टोपे यांनी राजीनामा द्यावा, अशी मागणी भारतीय जनता पार्टीचे (BJP) प्रदेश उपाध्यक्ष माधव भंडारी (Madhav Bhandari) यांनी प्रसिद्धी पत्रकाद्वारे केली आहे.

भंडारी यांनी पत्रकात म्हटले की, आरोग्य विभागातर्फे मागील परीक्षा घेण्याचे कंत्राट न्यासा कंपनीला देण्यात आले होते. या कंपनीने केलेल्या गोंधळामुळे ही परीक्षा पुढे ढकलण्याची नामुष्की राज्य सरकारवर आली होती. उत्तर प्रदेश सरकारने (UP Government) आणि राज्यातील महविकास आघाडी सरकारनेही या कंपनीला काळया यादीत टाकले होते. मात्र, आरोग्य मंत्री टोपे यांच्या आग्रहामुळेच या कंपनीला आज (ता.24ऑक्टोबर) झालेल्या परीक्षाचे कंत्राट देण्यात आले होते. त्यामुळे आज झालेल्या गोंधळाला आरोग्यमंत्री टोपे हेच जबाबदार असल्याने त्यांनी राजीनामा द्यावा, अशी भाजपाची मागणी आहे.

परीक्षेवेळी अनेक ठिकाणी उडाला गोंधळ!

भंडारी म्हणाले, आज झालेल्या झालेल्या परीक्षेवेळी अनेक ठिकाणी गोंधळ उडाला आहे. अनेक विद्यार्थ्यांना वेळेवर प्रश्नपत्रिकाच मिळाल्या नसल्याचे उघड झाले आहे. उमेदवारांच्या आसन व्यवस्थेमध्येही गोंधळ उडाल्याच्या घटनाही घडल्या. मुंबई, पुणे, नाशिक या केंद्रांवर परीक्षेवेळी गोंधळ झाल्याच्या तक्रारी विद्यार्थ्यांनी केल्या आहेत. काही विद्यार्थ्यांना सकाळच्या परीक्षेसाठी एक केंद्र तर, दुपारच्या परीक्षेसाठी दुसऱ्या जिल्ह्यातील केंद्र दिले गेले. तसेच, नाशिक येथे खासगी वाहनांतून प्रश्नपत्रिका आणल्या गेल्याचीही तक्रार आहे. या परीक्षा प्रक्रियेबाबत संशय व्यक्त होत असल्याने परीक्षा नव्याने घेण्यात याव्या अशी मागणी त्यांनी केली आहे.