Uddhav Thackeray News : मनीषा कायंदेंमुळे ठाकरे गटाची अडचण; विधान परिषदेतील विरोधी पक्षनेतेपदही जाणार?

Manisha Kayande News : विधान परिषदेच्या आमदार मनीषा कायंदे यांनी रविवारी (१८ जून) शिवसेनेच्या शिंदे गटात प्रवेश केला. वर्षभरापूर्वी 40 आमदारांना बरोबर घेऊन मुख्यमंत्री एकनाथ शिंदे आघाडी सरकारला धक्का दिला. त्यामुळे उद्धव ठाकरे (Uddhav Thackeray) यांचे सरकार कोसळले.

मात्र, विधान परिषदेत ठाकरे गट हा दुसरा सर्वात मोठा पक्ष होता. विधान परिषदेत ठाकरे गटाकडे १० आमदार होते. त्यामुळे टाकरे गटाकडे विधान परिषदेचे विरोधी पक्षनेते पद आहे. ठाकरे गटाचे नेते अंबादास दानवे सध्या विधान परिषदेचे विरोधी पक्षनेते आहेत. मात्र, कायंदे यांनी शिंदे गटात प्रवेश केल्यामुळे ठाकरे गटाची संख्या कमी झाली आहे.

विधान परिषदेत ठाकरे गटाकडे १० तर शिंदे गटाकडे एकच आमदार होता. राष्ट्रवादी काँग्रेस पक्षाकडे ९ आमदार आहेत. दरम्यान, कायंदे यांनी ठाकरे गटाला रामराम केल्यामुळे विधान परिषदेत ठाकरे गट आणि राष्ट्रवादी काँग्रेस (NCP) या दोन्ही पक्षांकडे प्रत्येकी ९ आमदार राहिले आहेत. त्यातच विधान परिषदेचे उप सभापतीपद ठाकरे गटाकडेच आहे. निलम गोऱ्हे सध्या उपसभापती आहेत.

त्यातच सध्या विधानसभेचे विरोधी पक्षनेतेपद राष्ट्रवादी काँग्रेसकडे आहे. तर विधान परिषदेचे विरोधी पक्षनेतेपद ठाकरे गटाकडे. मात्र, मनीषा कायंदे यांच्या जाण्याने ठाकरे गटाचे विधान परिषदेतले संख्याबळ घडले आहे. त्यामुळे आता विधान परिषदेचे विरोधी पक्षनेते पद जाणार का? अशी चर्चा सुरु झाली आहे. मात्र, राष्ट्रवादी आणि ठाकरे गटाकडे सारखेच संख्याबळ आहे. तर काँग्रेसकडे (Congress) ८ जागा आहेत.

मात्र, महाविकास आघाडी असल्याचे राष्ट्रवादी काँग्रेस विरोधी पक्षनेते पदावर दावा करण्याची शक्यता तसी कमीच आहे. त्यामुळे सध्या तरी हे पद ठाकरे गटाकडेच राहु शकते. मात्र, मनीषा कायंदे यांच्या शिंदे गटातील प्रवेशामुळे ठाकरे गटाची डोकेदुखी वाढली आहे.