Radhakrishna Vikhe Patil: अजितदादांच्या माजी आमदाराला अध्यक्ष करीत विखेंनी साधला राजकीय डाव

Ahilyanagar District Bank News: अहिल्यानगर जिल्हा बँकेच्या अध्यक्षपदी राष्ट्रवादी काँग्रेसचे माजी आमदार चंद्रशेखर घुले पाटील बिनविरोध निवड झाली आहे. या निवडणुकीमुळे पुन्हा एकदा भाजपचे ज्येष्ठ नेते राधाकृ्ष्ण विखे पाटील हेच किंग मेकर ठरल्याची चर्चा राजकीय वर्तुळात आहे. विखेंनी यांनी घुले यांना अध्यक्ष करीत राजकीय डाव साधला असल्याचे राजकीय विश्लेषकांचे मत आहे.

काल (सोमवारी) अहिल्यानगर जिल्हा बँकेच्या अध्यक्षपदी राष्ट्रवादीचे चंद्रशेखर घुले यांची बिनविरोध निवड झाली, ही निवड बिनविरोध करण्यात राधाकृष्ण विखे पाटलांनी पुढाकार घेतला होता.

बँकेचे अध्यक्ष,आमदार शिवाजी कर्डिले पाटील यांच्या निधनाने अध्यक्षपद रिक्त झाले होते. पालकमंत्री विखे पाटलांनी सुत्रे फिरवत ही निवडणूक बिनविरोध केली. गेल्या वेळी बहुमत नसतानाही विखेंनी आमदार कर्डिले यांना अध्यक्ष करुन दाखवलं होते. आताही त्यांनी सुत्र फिरवत अध्यक्षपदी घुले यांची निवड केली आहे.

घुलेची अध्यक्ष करुन विखेंनी पुढील राजकीय डावपेच आखले आहेत. फेब्रुवारीमध्ये बँकेच्या अध्यक्षपदाची निवड संपणार होती, पण शिवाजी कर्डिले यांच्या निधनामुळे ही निवडणुक आता घेण्यात आली. तीन महिनेचे घुले हे अध्यक्षपदी राहणार आहे. पण हे तीन महिने आगामी निवडणुकांसाठी महत्वाचे मानले जातात.

साडेतीन वर्षांपूर्वी झालेल्या संचालक मंडळाची निवडणूक थोरात आणि राष्ट्रवादी काँग्रेसने एकत्र लढवली व बँकेवर वर्चस्व प्रस्थापित केले होते. चंद्रशेखर घुले या गटाकडून निवडून आलेले आहेत. अध्यक्षपदासाठी थोरात व एकत्रित राष्ट्रवादी काँग्रेसचे पाच संचालक फुटल्याने चंद्रशेखर घुले यांना पराभव पत्करावा लागला होता.

भाजपकडे केवळ सहा सदस्य असतानाही विखेंनी त्यावेळी भाजपचे शिवाजी कर्डिले अध्यक्ष यांना अध्यक्ष केले होते, कर्डिलेंच्या रुपाने बँकेच्या इतिहासात प्रथम भाजपचा अध्यक्ष झाला होता. १०-९ फरकाने कर्डिले विजयी झाले होते.

कर्डिले यांच्या निधनानंतर बँकेच्या अध्यक्षपदाची माळ त कुणाच्या गळ्यात घालतात, याकडे सगळ्याचे लक्ष होते. काल (सोमवारी) सकाळी विखे पाटलांनी नगरमधील एका हॉटेलमध्ये संचालकांनी बैठक बोलवली. नगर जिल्ह्यातील अनेक बडे नेते, जे बँकेचे संचालक आहेत. ते अध्यक्षपदासाठी मतदान करणार होते. त्यांनी विखेंचा शब्द पाळला.

बैठकीत अजित पवार यांच्या राष्ट्रवादी काँग्रेसचे माजी आमदार घुले यांच्या नावाला एकमताने मंजुरी देण्यात आली. विखे प्रत्येक चालीतून नवा डाव टाकतात, हे जगजाहीर आहे. आताही जिल्हा बँक अध्यक्षपदाच्या निवडीनंतर ते किंग मेकर ठरले आहे.स्थानिक स्वराज्य संस्था निवडणुकीत पंचायत समिती, नगरपालिका, महापालिकेत भाजपचाच उमेदवार विजयी होईल, अशी रणनीती विखेंनी आखली असल्याचे यानिमित्ताने दिसते.

जिल्ह्यातील सर्वपक्षीय नेत्यांकडून आणि सहकार क्षेत्रातील मान्यवरांकडून घुले पाटलांचे अभिनंदन करण्यात येत आहे. माजी अध्यक्ष कर्डिले यांच्या कार्याचा वारसा पुढे नेत, घुले पाटील जिल्हा बँकेला अधिक उंचीवर घेऊन जातील, असा विश्वास व्यक्त केला जात आहे.