Dhananjay Munde : अजितदादांनी सुनावताच धनंजय मुंडेंनी तो निर्णय बदलला...

मुंबई : रात्रीचा प्रवास करण्यावरूनही विरोधी पक्षनेते अजित पवार (Ajit Pawar) यांनी सभागृहातील आमदारांचे कान टोचले. मधल्या काळात आपण विनायक मेटेंना (Vinayak Mete) गमावले आहे. परवा जयकुमार गोरे (Jaykumar Gore) असाच रात्रीचा प्रवास करत होते. आमचे धनंजय मुंडेही (Dhananjay Munde) रात्रीच चालले होते. त्यावेळी त्यांना शहाणपणा करा; रात्री बारा ते पहाटे तीन प्रवास करू नका, असे स्पष्ट शब्दांत सांगितले. तेव्हा कुठे ते थांबले, असेही पवार यांनी सांगितले. (As soon as Ajit Pawar suggested, Dhananjay Munde changed his decision to travel at night)

पुरवणी मागण्यांच्या प्रस्तावावर चर्चा करताना अजित पवार यांनी आज उपमुख्यमंत्री देवेंद्र फडणवीस यांच्यापासून गिरीश महाजन आणि चंद्रशेखर बावनकुळेपासून चंद्रकांत पाटील यांच्यापर्यंत सर्वांचे वाभाडे काढले. त्याचदरम्यान त्यांनी रात्रीच्या वेळी प्रवास करणाऱ्या आमदारांना शहाणपणाचे चार शब्द सुनावले.

भाजपचे प्रदेशाध्यक्ष चंद्रशेखर बावनकुळे यांच्या ‘बारामती येऊन घड्याळ बंद करण्याचा करेक्ट कार्यक्रम करणार,’ या वाक्याचा समाचार घेताना त्यांना म्हणावं जरा दमानं, दमानं घ्या. पण, गाडी एकदम फास्ट चाललीय. फास्ट गाडीचा कधी अपघात होईल, कोलमडून पडेल, हे कळायचं पण नाही, असे सांगितले. यात अपघाताचा संदर्भ आल्याने अजित पवार यांनी रात्रीच्या प्रवासाबद्दलही सांगितले.

ते म्हणाले की, आपण मधल्या काळात विनायक मेटे यांना गमावलं. परवा आमदार जयकुमार गोरे यांनी विधानसभेत भाषणं केलं आणि रातोरात मतदारसंघ गाठण्याचा प्रयत्न केला. आपण सर्वजण म्हणतो की रात्री बारा ते पहाटे तीनपर्यंत प्रवास नका करू. आमचे धनंजय मुंडेही रात्रीच चालले होते. मी त्यांना म्हटलं शहापणा करा आणि रात्री बारा ते तीन प्रवास करू नका. तेव्हा ते थांबले.

त्या दोन ते तीन तासांमुळे काय होणार आहे. आपण कितीही जागे राहिलो तरी ड्रायव्हरला कधी डुलकी लागेल हे कळतही नाही. पण कुणीतरी हे केलंलं आहे का अशा शंका-कुशंका घेतल्या जातात. प्रत्येकाला आयुष्यात जीव महत्वाचा आहे. रस्ते, महामार्ग एवढे चांगले झाले आहेत. पण नियमांचे पालन आपण केलं पाहिजे. आपण स्वतःहून काही बंधनं घालून घेतली पाहिजेत, अशी अपेक्षाही पवार यांनी व्यक्त केली.