विधानसभा अध्यक्ष निवडीसाठी काँग्रेस आक्रमक : ही तीन नावे चर्चेत!

मुंबई : विधानसभा अध्यक्षपदाची निवडणूक ही येत्या हिवाळी अधिवेशनाच घेण्यात यावी, यासाठी काँग्रेस पक्ष प्रचंड आग्रही आहे. पक्षाच्या वरिष्ठ नेत्यांनी तशी मागणीही वारंवार केली आहे. दरम्यान, अध्यक्षपदासाठी माजी मुख्यमंत्री पृथ्वीराज चव्हाण (prithviraj chavan), संग्राम थोपटे (Sangram Thopte) आणि अमिन पटेल (Amin Patel) यांची नावे चर्चेत आहेत. यातील संग्राम थोपटे हे मंत्रीपदासाठी इच्छूक आहेत, त्यामुळे येत्या हिवाळी अधिवेशनात निवडणूक होणार का? आणि कोणाच्या नावावर शिक्कामोर्तब होते, हे पाहणे औत्सुक्याचे आहे. (Congress demands to hold elections for the post of Assembly Speaker in the coming session)

काँग्रेसचे प्रदेशाध्यक्ष नाना पटोले यांनी राजीनामा दिल्यापासून राज्यातील विधानसेचे अध्यक्षपद रिकामे आहे. मधल्या काळात झालेल्या दोन अधिवेशनात हंगामी अध्यक्षांनी काम पाहिले आहे. काँग्रेस पक्षश्रेष्ठींनी राज्यात पक्षाचा विस्तार करण्यासाठी तत्कालीन विधानसभा अध्यक्ष नाना पटोले यांच्या खांद्यावर सुमारे दहा महिन्यांपूर्वी प्रदेशाध्यक्षपदाची धुरा सोपवली आहे. तेव्हापासून विधानसभेचे अध्यक्षपद रिक्त आहे. मधल्या काळात विधीमंडळाची दोन अधिवेशने झाली, त्यातील एका अधिवेशनात विद्यमान उपाध्यक्ष नरहरी झिरवाळ यांनी, तर मागील अधिवेशनात शिवसेनेचे भास्कर जाधव यांनी काम पाहिले होते.

दरम्यान, विधानसभा अध्यक्षपदासाठी काँग्रेसकडून ज्येष्ठ नेते पृथ्वीराज चव्हाण, भोरचे आमदार संग्राम थोपटे, मुंबईचे आमदार अमिन पटेल यांची नावे चर्चेत आहेत. यातील थोपटे यांना मंत्रीपद हवे आहे. त्यासाठी त्यांनी दिल्लीतही जोरदार मोर्चेबांधणी केली आहे. वेल्हे तालुक्यात नुकत्याच झालेल्या पक्षाच्या शेतकरी मेळाव्यात प्रदेशाध्यक्ष नाना पटोले यांनीही तसे संकेत दिले आहेत. थोपटे हे वाघासारखे असून त्यांनी अडकून न राहत कायम मैदानात राहावे, अशी आपली इच्छा असल्याचे त्यांनी म्हटले होते. तसेच, तुमच्या मनातील इच्छा लवकरच पूर्ण होणार आहे, असे सांगून संग्राम थोपटे यांना लवकरच नवी जबाबदारी मिळणार असल्याचे स्पष्ट केले होते.

थोपटे मंत्रीपदासाठी इच्छूक असल्याने काँग्रेस पक्ष ही जबाबदारी कोणाकडे देणार, हे पाहणे महत्वाचे आहे. कारण, पृथ्वीराज चव्हाण यांनीही आपण या पदासाठी इच्छूक नसल्याचे मागे सांगितले होते. त्यामुळे अमिन पटेल तरी ही जबाबदारी घेणार का? याकडे राजकीय वर्तुळाचे लक्ष लागून राहिले आहे. विधानसभा अध्यक्षपदाची निवडणूक तातडीने घ्यावी, यासाठी काँग्रेस पक्ष आग्रही असला तरी महाविकास आघाडीतील राष्ट्रवादी आणि शिवसेना हे दोन पक्ष कसा प्रतिसाद देतात, यावरच ही निवडणूक होणार की नाही, हे ठरणार आहे.