राहुल गांधींनी पंतप्रधान मोदींना विचारला अच्छे दिनचा अँगल!

नवी दिल्ली : देशात सध्या महागाईचा भडका उडाला आहे. पेट्रोल (Petrol) आणि डिझेलच्या (Diesel) दरवाढीमुळे नागरिक त्रस्त झाले आहेत. आजही सलग तिसऱ्या दिवशी पेट्रोल आणि डिझेलची दरवाढ सुरूच असून, चालू महिन्यात 21 दिवस दरवाढ झाली आहे. देशात पेट्रोल आणि डिझेलचे दर ऐतिहासिक उच्चांकी पातळीवर पोचले आहेत. यावरुन काँग्रेस नेते राहुल गांधी यांनी पंतप्रधान नरेंद्र मोदींना सवाल केला आहे.

नरेंद्र मोदी यांनी 2014 च्या लोकसभा निवडणुकीवेळी अच्छे दिनची घोषणा केली होती. या घोषणेला जनतेने मोठा प्रतिसाद दिला होता. नंतर भाजपने ऐतिहासिक विजय मिळवला होता . त्यानंतर नरेंद्र मोदी पंतप्रधान बनले होते. मोदी यांनी त्या निवडणुकीच्या प्रचारात देशातील इंधन दरवाढीवरून तत्कालीन काँग्रेस सरकावर धारेवर धरले होते. पेट्रोल, डिझेलसह स्वयंपाकाच्या एलपीजी गॅसचे दर कमी करण्याचे आश्वासन दिले होते.

आता मोदींचा पंतप्रधानपदाचा दुसरा कार्यकाळ सुरू आहे. देशात 2014 च्या तुलनेत पेट्रोल, डिझेल, एलपीजी, पीएनजी आणि सीएनजीचे दर मोठ्या प्रमाणात वाढले आहेत. यावरुन आता राहुल गांधींनी मोदींवर निशाणा साधला आहे. देशातील पेट्रोल आणि डिझेलचे वाढलेले दर राहुल गांधींनी ट्विट केले आहेत. हे कुठल्या अँगलने अच्छे दिन आहेत, असा सवालही त्यांनी मोदींना केला आहे. करांच्या नावाखाली खंडणी वसूल केली जात असल्याचाही हॅशटॅग त्यांनी वापरला आहे.

पेट्रोल, डिझेलच्या दरात आज प्रतिलिटर 35 पैशांची वाढ करण्यात आली. दिल्लीत आज पेट्रोलचा दर 108.64 रुपये तर मुंबईत 114.47 रुपयांवर गेला आहे. डिझेलचा दर दिल्लीत 97.37 रुपये आणि मुंबईत 105.49 रुपयांवर पोचला आहे. देशातील चार राज्ये व एका केंद्रशासित प्रदेशातील विधानसभा निवडणुकीच्या निकाल लागल्यानंतर 2 मेपासून सातत्याने पेट्रोल आणि डिझेलच्या दरात वाढ होत आहे. यामुळे सामान्य नागरिकांना इंधन दरवाढीचे चटके बसत आहेत.

देशात 4 मे ते 17 जुलै या कालावधीत पेट्रोलच्या दरात 11.44 रुपये आणि डिझेलच्या दरात 9.14 रुपये वाढ झाली आहे. चालू महिन्यात पेट्रोल, डिझेलची दरात 21 दिवस वाढ झाली आहे. आंतरराष्ट्रीय बाजारात खनिज तेलाचे भाव वाढल्याने पुढील काळात पेट्रोल, डिझेलच्या दरवाढीचा भडका कायम राहण्याची शक्यता आहे. खनिज तेलाचे भाव मागील सात वर्षांतील उच्चांकी पातळीवर आहेत. खनिज तेलाचा भाव वाढल्याने आगामी काळात देशात इंधन दरवाढीचे चक्र कायम राहणार आहे.

देशात पेट्रोलचा दर विमान इंधनापेक्षा 33 टक्के जास्त आहे. विमान कंपन्यांना ज्या दरात इंधन विकले जाते त्यापेक्षा 33 टक्के जास्त दराने वाहनचालक पेट्रोलची खरेदी करीत आहेत. विमान इंधनाचा दर दिल्लीत प्रतिकिलोलीटर 79 हजार 20 रुपये म्हणजेच 79 रुपये लिटर आहे. यामुळे देशात आता विमान चालवण्यापेक्षा वाहन चालवणे महाग झाल्याची टीका होत आहे. सध्या देशात इंधनाचे दर ऐतिहासिक उच्चांकी पातळीवर पोचले आहेत.

पेट्रोलच्या दराने देशभरात शंभरी ओलांडली होती. आता डिझेलच्या दरानेही शंभरी ओलांडण्यास सुरवात केली आहे. अशातच स्वयंपाकाच्या गॅस सिलिंडरच्या (LPG Cylinder) दरातही वाढ सुरू आहे. चालू वर्षात एलपीजी सिलिंडरच्या दरात तब्बल 205 रुपयांची वाढ झाली आहे. दिल्ली आणि मुंबईत विनाअंशदानित गॅस सिलिंडरची किंमत 900 रुपयांवर पोचली आहे. यातच सरकारने एलपीजीवरील सबसिडीही बंद केल्याने सामान्यांची महागाईच्या आगीत होरपळ सुरू आहे.