Eknath Shinde : एकनाथ शिंदेंनी संधी साधली; धनंजय मुंडेंच्या राजीनाम्यानंतर केली राष्ट्रवादीची कोंडी ?

Mumbai News : केज तालुक्यातील मस्साजोग येथील सरपंच संतोष देशमुख यांच्या हत्या प्रकरणात धनंजय मुंडे यांच्या निकटवर्तीयाचा सहभाग असल्याचे पुढे आल्यानंतर त्यांच्या अडचणीत वाढ झाली होती. त्यातच सीआयडीने न्यायालयात दोषारोपपत्र दाखल केल्यानंतर त्यांच्या हत्येच्या वेळेची छायाचित्र समोर आली. त्यानंतर संपूर्ण महाराष्ट्रात आगडोंब उसळला. त्यानंतर धनंजय मुंडे यांना तातडीने राजीनामा द्यावा लागला. धनंजय मुंडेंचा राजीनामा होताच शिंदे सेना आक्रमक झाली आहे. गेल्या काही दिवसापासून शिंदे सेनेच्या विरोधात संधी मिळताच राष्ट्रवादी काँग्रेसने घेरले होते. आता ही संधी साधत शिवसेनेने राष्ट्रवादीच्या विरोधात रस्त्यावर उतरून कोंडी केली.

मस्साजोग येथील सरपंच संतोष देशमुख यांच्या हत्या प्रकरणावरून राज्यातील वातावरण चांगलेच तापले आहे. त्यातच सीआयडीने न्यायालयात दोषारोपपत्र दाखल केल्यानंतर त्यांच्या हत्येच्या वेळेची छायाचित्र समोर आली. त्यामुळे तर राज्यातील जनमत पूर्णपणे धनंजय मुंडेंच्या (Dhananjay Munde) विरोधात गेले आहे. या सर्व बाबीची खात्री पटताच शिंदेंच्या शिवसेनेने सर्वत्र रस्त्यावर उतरून आंदोलन सुरु केले आहे. या प्रकरणात दोषी आढळलेलया आरोपीवर कठोर शिक्षा करण्याची मागणी केली आहे.

शिवसेनेकडून (Shivsena) ठाणे, पुणे, नागपूर, नाशिक, कोल्हापूर जिल्ह्यात आक्रमकपणे आंदोलन करण्यात आले. शिवसेना पक्षाच्या मुख्यालयातूनच आंदोलन करण्याचे आदेश दिले आहेत. त्यामध्ये वाल्मीक कराड यांच्या नावाचा उल्लेख करीत फाशीची शिक्षा देण्याची मागणी करण्यात आली.

संतोष देशमुख हत्या प्रकरणामुळे राष्ट्रवादी काँग्रेससमोरील अडचणी वाढल्या आहेत. याच प्रकरणावरून आरोप केले जात असल्याने मंत्री धनंजय मुंडे यांना मंगळवारी आपल्या पदाचा राजीनामा दिला. त्यानंतर लगेचच शिवसेनेने आंदोलन सुरू केले आहे. पोलिसांनी या संपूर्ण हत्या प्रकरणाची सखोल चौकशी करावी, आरोपी कोणाची कार्यकर्ते असले तरी त्यांची गय करू नये, त्यांना कठोर शिक्षा व्हावी, यासाठी रस्त्यावर उतरत आंदोलन सुरु केले आहे.

महायुतीमध्ये सरकारस्थापन झाल्यापासून राष्ट्रवादी काँग्रेस अजित पवार पक्षाला भाजपने जास्त महत्व दिले होते. त्यामुळे शिवसेनेची यावरून उघडपणे नाराजी होती. मात्र, अजित पवार यांच्या जवळचे मंत्री अशी ओळख असलेल्या धनंजय मुंडे यांच्यावर संतोष देशमुख हत्याप्रकरणी आरोप केले जात असल्याने त्यांना राजीनामा द्यावा लागला. त्यामुळे या प्रकरणामुळे अजित पवार गट थोडासा बॅकफुटवर गेला आहे. हे लक्षात येताच शिंदेच्या शिवसेनेने आक्रमक भूमिका घेतली आहे.

सामाजिक कार्यकर्त्या अंजली दमानिया, भाजपचे आमदार सुरेश धस, खासदार बजरंग सोनवणे, संदीप क्षीरसागर यांनी प्रकरण लावून धरले आहे. त्यामुळे धनंजय मुंडे अखेर यांना आपल्या पदाचा राजीनामा द्यावा लागला. या बसलेल्या धक्क्यामुळे राष्ट्रवादी काँग्रेस अडचणीत आली आहे. तर दुसरीकडे मित्रपक्ष असलेल्या शिंदेंच्या शिवसेनेने आंदोलन करीत संधी मिळताच राष्ट्रवादी काँग्रेसची कोंडी केली आहे.

मस्साजोग सरपंच देशमुख याची हत्या अतिशय संतापजनक आहे. अशा प्रकारच्या गुन्हेगारीला कधीही पोलिसांकडून सूट मिळता कामा नये. पोलिसांनी याबाबत गंभीर कारवाई केली पाहिजे. हे आंदोलन कुठल्याही पक्षाच्या विरोधात नसून गुन्हेगारी विरोधात आहेत. राज्यात घडणाऱ्या अशा सर्व प्रकारच्या गुन्हेगारीचा निषेध म्हणून हे आंदोलन करण्यात येत असल्याचे दावा एकनाथ शिंदे शिवसेनेकडून केला जात आहे.

संतोष देशमुख हत्याप्रकरणीतील व्हिडिओ तसेच फोटो समाज माध्यमांवर सगळीकडे व्हायरल झाले. त्यावर अतिशय तीव्र प्रतिक्रिया उमटल्या आहेत. राज्याच्या अनेक भागात त्याचा निषेध नोंदवत आंदोलन झाले. बीड प्रकरणावरून महायुतीच्या विरोधात राजकीय वातावरण पेटविण्यासाठी विरोधी पक्ष असलेल्या महाविकास आघाडीतील घटक पक्ष असलेल्या शिवसेना ठाकरे गट, काँग्रेस, राष्ट्रवादी काँग्रेस शरद पवार गटाकडून प्रयत्न सुरु होते. मात्र, सध्या महायुतीतील घटक पक्षच बीड प्रकरणावरून आक्रमक झाल्याचे चित्र आहे. या राष्ट्रवादी काँग्रेसच्या विरोधातील वातावरणाचा फायदा इतर पक्षांना होऊ नये, अशी भूमिका देखील शिंदेंच्या शिवसेनेची असू शकते, त्यामुळे येत्या काळात या प्रकरणावरून शिवसेना काय भूमिका घेणार? याकडे सर्वांचे लक्ष लागले आहे.