Mumbai News : स्थानिक स्वराज्य संस्थेच्या निवडणुकीची घोषणा दिवाळीनंतर होण्याची शक्यता आहे. त्यामुळे राज्यातील वातावरण ढवळून निघाले आहे. महायुती व महाविकास आघाडी एकत्रित निवडणूक लढणार की स्वबळ अजमाविणार याबाबत उत्सुकता शिगेला पोहचली आहे. त्यातच आता महायुती मुंबईत एकत्रित तर अन्य ठिकाणी मैत्रीपूर्ण लढत होण्याची शक्यता आहे तर दुसरीकडे ठाकरे बंधूंची युती झाली तर महाविकास आघाडीचे काय होणार ? याची उत्सुकता शिगेला पोहचली आहे. त्यातच ठाणे महापालिका निवडणुकीसाठी आता महाविकास आघाडी वेगळे प्लॅनिंग करीत असून मनसेलासोबत घेत महायुतीपुढे मोठे आव्हान उभा करण्याचा प्रयत्न आहे. त्यामुळे हे चार पक्ष एकत्र आल्यास हा 'ठाणे पॅटर्न' महायुतीसाठी धोक्याची घंटा? ठरण्याची शक्यता आहे.
स्थानिक स्वराज्य संस्थेच्या निवडणूका तोंडावर आल्या असल्याने सर्वच पक्षात हालचालीना वेग आला आहे. त्यामुळे वातावरण तापण्यास सुरुवात झाली आहे. प्रत्येक ठिकाणी निवडणुकीसाठी जुळवाजुळव सुरु झाली आहे. त्यामुळे ऐन मोक्याच्या क्षणी काय प्लॅनिंग होणार याकडे लक्ष लागले आहे. विशेषतः येत्या काळात सर्वांचे लक्ष ठाणे महापालिकेच्या निवडणुकीकडे लागले आहे. ठाणे हा उपमुख्यमंत्री एकनाथ शिंदे यांचा बालेकिल्ला आहे. त्यामुळे सर्वांचे त्याकडे लक्ष असून शिंदेंची गड असणाऱ्या ठाण्यात कोंडी करण्याच्या हालचाली विरोधी पक्षाकडून सुरु आहेत.
मुंबईत तीन पक्षाची महायुती होईल, अशी घोषणा सीएम देवेंद्र फडणवीस यांनी केली आहे. त्यासोबतच ठाणे महापालिकेत भाजप व अजित पवार यांची राष्ट्रवादी काँग्रेसची युती होणार आहे तर दुसरीकडे त्यांची एकनाथ शिंदे यांच्या शिवसेनेशी मैत्रीपूर्ण लढत होणार असल्याचे स्पष्ट केले आहे. त्यामुळे महायुतीमध्ये पडलेल्या उभ्या फुटीचा फायदा उचलण्याची तयारी आता विरोधकांनी सुरु केली आहे.
ठाणे महापालिका निवडणुकीसाठी शरद पवार यांच्या राष्ट्रवादी काँग्रेसचे नेते व माजी मंत्री जितेंद्र आव्हाड, उद्धव ठाकरे यांच्या शिवसेनेचे माजी खासदार राजन विचारे, काँग्रेसचे शहराध्यक्ष विक्रांत चव्हाण आणि मनसेचे ठाणे जिल्हाध्यक्ष अविनाश जाधव उपस्थित होते. त्यांच्यामध्ये आगामी काळात होत असलेल्या निवडणुकीत एकत्र लढण्याचा प्लॅन ठरला आहे. त्यामुळे येत्या काळात हे चार पक्ष एकत्रित आल्यास महायुतीची कोंडी होण्याची शक्यता आहे.
अविनाश जाधव यांच्या उपस्थितीमुळे ठाणे शहरात महायुतीविरोधात मनसे महाविकास आघाडीत येणार अशा चर्चा सुरू झाल्या आहेत. या बैठकीमध्ये महाविकास आघाडीत मनसेच्या प्रवेशाबाबत चर्चा झाली की नाही याबाबत खात्रीशीर माहिती नाही. मात्र, ठाणे शहराच्या समस्येबाबत सर्व पक्षांनी एकत्र मिळून आंदोलन करण्याचे ठरवण्यात आल्याची माहिती आहे.
ठाणे जिल्ह्यात मनसेची विशिष्ट ताकद आहे. महाविकास आघाडीसोबत मनसे आल्यास, ठाकरे विरुद्ध ठाकरे (उद्धव आणि राज) असा थेट सामना न होता, तिहेरी लढत टाळली जाईल. त्याचा फायदा या निवडणुकीत आघाडीला होण्याची शक्यता अधिक आहे. त्यासोबतच हे चार पक्ष एकत्र आल्यास येत्या काळात महायुतीच्या मराठी मतांमध्ये मोठी फूट पडण्याची शक्यता निर्माण झाली आहे.
येत्या काळात ठाण्यात जर काँग्रेस, शरद पवार यांची राष्ट्रवादी काँग्रेस, उद्धव ठाकरे यांची शिवसेना (Shivsena) व मनसे एकत्रित आली. एकत्रित येऊन निवडणूक लढविल्यास हा 'पॅटर्न' यशस्वी होण्याची शक्यता आहे. त्यामुळे आगामी ठाणे महापालिका निवडणुकीत महायुतीचा बालेकिल्ला धोक्यात येऊ शकतो.
भाजप (BJP) व अजित पवार यांच्या राष्ट्रवादी काँग्रेसची युती झाली तर एकनाथ शिंदे यांच्या शिवसेनेसोबत मैत्रीपूर्ण लढत झाल्याने महायुतीच्या मताची विभागणी मोठ्या प्रमाणात होणार आहे. त्याचा फटका महायुतीमधील दोन पक्षांना बसणार आहे. त्यामुळे या तीन पक्षांच्या नेत्यांनी एकत्रित बैठक घेतल्यामुळे, येणाऱ्या निवडणुकीत ठाण्यात एकत्रित लढण्याची रणनीती ठरली असल्याचे स्पष्ट संकेत मिळत आहेत. आव्हाड यांच्या पुढाकाराने झालेली ही बैठक ठाण्यातील भाजप-शिंदे गटाच्या वर्चस्वाला थेट आव्हान देणारी ठरणार असून ज्यामुळे येत्या काळात ठाण्याच्या राजकारणात मोठा भूकंप होण्याची शक्यता आहे.
सरकारनामाचे सदस्य व्हा
शॉपिंगसाठी 'सकाळ प्राईम डील्स'च्या भन्नाट ऑफर्स पाहण्यासाठी क्लिक करा.
Read Latest Marathi Political News, Breaking Political News from Maharashtra, India, Pune & Mumbai at Sarkarnama. To Get Live Political Marathi News on Mobile, Download the Sarkarnama Mobile App for Android and IOS. सरकारनामा आता सर्व सोशल मीडिया प्लॅटफॉर्मवर. ताज्या राजकीय घडामोडींसाठी फेसबुक, ट्विटर, इन्स्टाग्राम, शेअर चॅट, टेलिग्रामवर आणि व्हॉट्सॲप आम्हाला फॉलो करा. तसेच, सरकारनामा यूट्यूब चॅनेलला आजच सबस्क्राइब करा.