सिंधुदुर्ग जिल्ह्यात भाजप आणि शिवसेनेतील वाद चिघळत असून स्थानिक राजकारणात तापमान वाढले आहे.
नितेश राणे यांच्या स्वबळाच्या नार्यानंतर निलेश राणे सतत भाजपविरोधात हल्लाबोल करत आहेत.
निलेश राणेंच्या आरोपांमुळे राजकीय वातावरण बदलत असून परिस्थिती शिवसेनेच्या बाजूने फिरवल्याची चर्चा आहे.
Sindhudurg News : तळकोकणातील सिंधुदुर्ग जिल्ह्यात मागच्या काही दिवसांपासून राजकीय वातावरण चांगलेच तापले असून येथे भाजप आणि शिवसेनेत वाद चिघळल्याचे दिसत आहे. भाजप नेते नितेश राणे यांनी स्वबळाचा नारा दिल्यानंतर सुरू झालेला वाद आता थेट प्रदेशाध्यक्ष रवींद्र चव्हाण यांच्यापर्यंत पोहोचला आहे. या सर्व राजकारणाच्या केंद्रस्थानी शिंदे गटाचे आमदार निलेश राणे असून ते भाजपविरोधात सतत आरोपांची मालिकाच चालवत आहेत.
जिल्ह्यात नगरपालिकांसह नगरपंचायतींच्या निवडणुकीच्या पार्श्वभूमीवर महायुतीत वाद सुरू झाला असून जागावाटप आणि नगराध्यक्ष पदाच्या मुद्द्यावरून महायुतीत फुट पडली आहे. भाजप आणि शिवसेनेतील हा वाद विकोपाला गेला असून स्थानिक निवडणुकीत राणे बंधू आमनेसामने आले आहेत. मात्र, मागील काही दिवसांत करण्यात आलेल्या खळबळजनक दाव्यांनी शिंदे गटाच्या शिवसेनेला बळ मिळाले आहे.
नुकताच निलेश राणेंनी भाजप नगराध्यक्षपदाचे उमेदवार समीर नलावडे यांच्यावर गंभीर आरोप करून पहिली खळबळ उडवून दिली होती. नलावडे यांच्या घरात मुस्लीम मतदार कुठून आले? असा सवाल त्यांनी उपस्थित केला. निलेश राणे यांनी सांगितले की, त्यांनी निवडणूक आयोगाला दिलेल्या तक्रारीत कणकवलीचे भाजप नगराध्यक्षपदाचे उमेदवार समीर नलावडे यांच्या घरी ३ मुस्लीम मतदार दाखवले गेले आहेत. हे मतदार कोठून आले? १६९ मतदार विविध भागांतून — नेपाळ, ठाणे इत्यादी ठिकाणांहून — येथे आणण्यात आल्याचा दावा त्यांनी केला. हे मतदार कधी आले? त्यांचा कणकवलीशी काय संबंध? अचानक मतदार यादीत नावे कशी समाविष्ट झाली? याचे पुरावेही दिल्याचे त्यांनी सांगितले. निवडणूक आयोगाने याचे समाधानकारक उत्तर न दिल्यास आपण आंदोलन छेडू, असा इशाराही त्यांनी दिला होता. त्यांच्या या आरोपांमुळे मोठी खळबळ उडाली होती.
यानंतर त्यांनी भाजप नगराध्यक्षपदाच्या उमेदवार शिल्पा खोत यांच्यावरही गंभीर आरोप करून भाजपची गोची केली. शिल्पा खोत यांचे जातप्रमाणपत्र खोटे असल्याचा दावा त्यांनी केला. "जे आधी मराठा होते ते अचानक कुणबी, म्हणजेच ओबीसी कसे झाले?" असा सवाल करत शिल्पा खोत यांच्या पतीने हा संपूर्ण प्रकार रचल्याचा आरोपही त्यांनी केला. शिल्पा खोत यांनी जनतेची दिशाभूल थांबवावी आणि माफी मागावी, अशी मागणीही त्यांनी केली.
या प्रकरणानंतर भाजपने आक्रमक भूमिका घेत निलेश राणेंवर पलटवार केला. शिल्पा खोत यांनी उत्तर देताना सांगितले की, निलेश राणे भाजपमध्ये येण्याआधी त्यांच्याचकडून नगराध्यक्षपदाची ऑफर देण्यात आली होती. सभेत यासंबंधीची एक ऑडिओ क्लिपही वाजवण्यात आली. "जेव्हा निलेश राणे यांनी मला नगराध्यक्षपदाची ऑफर दिली, तेव्हा मी पात्र होते; भाजपमध्ये आल्यावरच मी अपात्र कशी झाले?" असा सवाल त्यांनी उपस्थित केला. यामुळे शिल्पा खोत आणि निलेश राणे यांच्यातील वाद अधिक चिघळला आहे.
नलावडे, शिल्पा खोत आणि निलेश राणे यांच्या आरोप–प्रत्यारोपांमुळे नगरपरिषदेची निवडणूक रंगतदार झाली असतानाच निलेश राणेंनी थेट भाजपचे प्रदेशाध्यक्ष रवींद्र चव्हाण यांच्यावर आरोप केल्याने राज्यभरात चर्चा सुरू झाली. मालवण येथे रवींद्र चव्हाण यांच्या सभेनंतर निलेश राणे यांनी भाजप पदाधिकारी विजय केनवडेकर यांच्या घरावर धाड टाकली. या धाडीत तब्बल २५ लाखांची रोकड असलेली बॅग सापडल्याचा दावा त्यांनी केला.
राणेंचे म्हणणे आहे की, "रवींद्र चव्हाण येथे आल्यानंतरच पैसे वाटपाची प्रक्रिया सुरू झाली. निवडणूक पैशाने लढवण्याची ही पद्धत आहे का? मैदानात येऊन सामना करा. त्या घरात अजून पैशांच्या बॅगा आहेत. भाजपचे कोणकोण कार्यकर्ते पैसे वाटतात, याची यादी माझ्याकडे आहे. ती पोलिस आणि निवडणूक आयोगाकडे देणार आहे."
पप्पा तवटे, रुपेश कानडे, रणजीत देसाई, मोहन सावंत हे पैशाने भरलेल्या बॅगा वाटत असल्याचा गंभीर आरोपही त्यांनी केला. यानंतर त्यांच्या या स्टिंग ऑपरेशनवर आता त्यांचे बंधू नितेश राणे, मंत्री चंद्रशेखर बावनकुळे तसेच प्रदेशाध्यक्ष रवींद्र चव्हाण यांनी प्रतिक्रिया देत नाराजी व्यक्त केली आहे. दरम्यान, सुरू झालेल्या या आरोप–प्रत्यारोपामुळे राजकीय वर्तुळात गोंधळ उडाला असून मालवणसह संपूर्ण जिल्ह्यातील नगरपालिका निवडणुकीत मोठी रंगत येणार आहे.
FAQs :
1. सिंधुदुर्गमध्ये राजकीय वाद कशामुळे वाढला?
→ भाजप नेते नितेश राणे यांच्या स्वबळाच्या नार्यानंतर वाद चिघळला.
2. निलेश राणे नेमके कोणावर आरोप करत आहेत?
→ ते सतत भाजप आणि त्यांच्या नेत्यांवर विविध गंभीर आरोप करत आहेत.
3. या वादामुळे शिवसेनेचे काय फायदे होत आहेत?
→ वातावरण शिवसेनेच्या बाजूने फिरत असल्याची चर्चा आहे.
4. राणे बंधू एकमेकांविरोधात आहेत का?
→ राजकारणातील भूमिकांमुळे दोघांमध्ये ताण निर्माण झाल्याची चिन्हे आहेत.
5. हा वाद कोणत्या निवडणुकीशी संबंधित आहे?
→ सिंधुदुर्ग जिल्ह्यातील नगरपालिका आणि नगरपंचायत निवडणुकीशी.
सरकारनामाचे सदस्य व्हा
शॉपिंगसाठी 'सकाळ प्राईम डील्स'च्या भन्नाट ऑफर्स पाहण्यासाठी क्लिक करा.
Read Latest Marathi Political News, Breaking Political News from Maharashtra, India, Pune & Mumbai at Sarkarnama. To Get Live Political Marathi News on Mobile, Download the Sarkarnama Mobile App for Android and IOS. सरकारनामा आता सर्व सोशल मीडिया प्लॅटफॉर्मवर. ताज्या राजकीय घडामोडींसाठी फेसबुक, ट्विटर, इन्स्टाग्राम, शेअर चॅट, टेलिग्रामवर आणि व्हॉट्सॲप आम्हाला फॉलो करा. तसेच, सरकारनामा यूट्यूब चॅनेलला आजच सबस्क्राइब करा.