मंत्री व भाजप आमदार नितेश राणे यांनी शिवसेनेचे आमदार निलेश राणे यांनी केलेल्या आरोपानंतर विजय केनवडेकर यांची भेट घेतली. त्यानंतर केनवडेकर यांच्या घरी सापडलेल्या पैशांवर भाष्य केलं आहे. ते म्हणाले, भाजपला पैशांचे वाटप करून निवडणुका लढवण्याची गरज नाही. पंतप्रधान नरेंद्र मोदी आणि मुख्यमंत्री देवेंद्र फडणवीस यांच्या नेतृत्वात भाजप निवडणुका लढवत आहे. तसेच घरात व्यवसायासाठी पैसे ठेवण्यात काय गैर आहे. विजय केनवडेकर हे वर्षानुवर्षे व्यवसायात आहेत आणि त्यांची बाजारात दुकान आहे. त्यामुळे व्यवसायाच्या दृष्टीने त्यांच्या घरात पैशांची उलाढाल असणे सामान्य असल्याचंही राणे म्हणाले.
नागपूर जिल्ह्यातील हिंगणा तालुक्यांतर्गत डिगडोह नगरपरिषद परिसरात भाजपचे नगरसेवक पदाचे उमेदवार अनिल शर्मा यांच्यासह त्यांच्या 10 ते 12 कार्यकर्त्यांनी पोलिसाला बेदम मारहाण केल्याची धक्कादायक घटना समोर आली आहे. पोलिसाला मारहाण करतानाचा व्हिडीओ सोशल मीडियावर व्हायरल होत आहे.
अजित पवारांची राष्ट्रवादी काँग्रेस पक्ष हा सोलापूर महापालिकेची निवडणूक स्वबळावर लढवणार असल्याची घोषणा विधानसभेचे उपसभापती व पिंपरीचे आमदार अण्णा बनसोडे यांनी केली आहे. सोलापूर शहरातील सर्व 26 प्रभागांत आणि 102 जागा आम्ही स्वबळावर लढवणार असून 75 जागा जिंकणार असल्याचं बनसोडे यांनी म्हटलं आहे. राष्ट्रवादी काँग्रेस पक्षात प्रवेश करणाऱ्यांची संख्या वाढत असल्यानं पक्षानं हा निर्णय घेतल्याचंही त्यांनी सांगितलं.
मुख्यमंत्री देवेंद्र फडणवीस यांच्यासमोरच व्यासपीठावर हिंगोलीचे भाजप आमदार तान्हाजी मुटकुळे यांनी शिवसेनेचे आमदार संतोष बांगर यांच्यावर गंभीर आरोप केला. मताला पाच हजारांचा भाव ते देत आहेत. मुस्लिम प्रभागांमध्ये जाऊन, मै तुमको चिकन, मटन अनाज दूंगा, असे अमिष त्यांच्याकडून दाखवले जात असल्याचे मुटकुळे यांनी सांगितले.
सध्या महाराष्ट्रात नगरपालिका, नगरपरिषदेची निवडणूक चालू आहे. वंचित बहुजन आघाडीच्या सर्व उमेदवारांना गॅस सिलिंडर हे निवडणूक चिन्ह मिळालेले आहे. एकंदरित आमच्या पक्षाच्या उमेदवारांची परिस्थिती चांगली आहे, असे मत प्रकाश आंबेडकर यांनी व्यक्त केले. तसेच स्थानिक स्वराज्य संस्थांच्या निवडणुकीत व्हीव्हीपॅट नाहीत. राष्ट्रवादी, काँग्रेस, ठाकरे गट हे महाविकास आघाडीत एकत्र आहेत. या निवडणुका बॅलेट पेपरवर घेण्यासाठी हे तिन्ही पक्ष दबाव टाकू शकतात. पण त्यासाठी ते एकत्र का येऊ शकत नाहीत, हाच मोठा सवाल आहे, असा प्रश्नही त्यांनी उपस्थित केला.
संतोष बांगर यांच्या घरावर पहाटे पाच वाजता 100 पोलिसांनी धाड टाकून झाडाझडती घेतली. संतोष बांगर यांची 75 वर्षांची आई आजारी असताना त्यांच्या घराची झाडाझडती घेऊन त्रास देणे ही अतिशय वाईट गोष्ट असल्याचे सांगत शिवसेनेचे आमदार हेमंत पाटील यांनीही या घटनेला दुजोरा दिला. आमदार असल्याने त्यांच्या घराची झाडाझडती करताना पूर्व परवानगी घ्यावी लागते. पण विधानसभा अध्यक्षांकडून तसा कुठलाही आदेश वा मेल आला नाही. मग सत्ताधारी आमदार मुटकुळेंच्या दबावाखाली ही कारवाई करण्यात आली आहे का? असा सवाल पाटील यांनी केला.
राष्ट्रवादी काँग्रेस (अजित पवार गट) युवक-विद्यार्थी आघाडीचे अकोला महानगरप्रमुख वैभव घुगे यांनी आपल्या आयुष्याची अखेर केल्याने संपूर्ण जिल्ह्यात खळबळ उडाली आहे. यादरम्यान, जुन्या आरटीओ रोड जवळील रेल्वे ट्रॅकवर धावत्या ट्रेन समोर उडी मारून त्यांनी जीवनयात्रा संपवल्याची माहिती आहे. वैभव घुगे हे राष्ट्रवादीचे ज्येष्ठ नेते तथा माजी मंत्री आणि आमदार धनंजय मुंडे यांचे अगदी जवळचे सहकारी म्हणून ओळखले जात होते.
गौरी गर्जे आत्महत्या प्रकरणात पती अनंत गर्जेच्या पोलीस कोठडीत 2 डिसेंबरपर्यंत वाढ करण्यात आली आहे. मुंबईतील वर्ली येथे घडलेल्या या घटनेत गौरीला आत्महत्येस प्रवृत्त केल्याचा आरोप अनंत गर्जेवर आहे. प्राथमिक अहवालानुसार, गौरीच्या शरीरावर अनेक जखमा आढळल्या आहेत, तर आरोपीच्या शरीरावरही काही जखमा आढळून आल्याचा पोलिसांचा दावा आहे. सरकारी वकिलांनी न्यायालयात सांगितले की, हे प्रकरण आत्महत्या आहे की हत्या, याचा तपास करणे आवश्यक आहे. त्यासाठी सीसीटीव्ही फुटेज आणि मोबाईल डेटाची तपासणी केली जाईल. या प्रकरणात आत्महत्येस प्रवृत्त करणे आणि कलम 498 अंतर्गत गुन्हा दाखल करण्यात आला आहे.
उपमुख्यमंत्री एकनाथ शिंदे यांच्या शिवसेनेत जाण्यासाठी आमदार संतोष बांगर यांनी ५० कोटी घेतल्याचा आरोप भाजप आमदार तानाजी मुटकुळे यांनी केला आहे. त्यावरून राजकारण तापले आहे. त्यानंतर आता शिवसेनेच आमदार मुख्यमंत्री देवेंद्र फडणवीस यांच्याकडे मुटकुळेंची तक्रार करणार असल्याचे समजते.
महाराष्ट्र लोकसेवा आयोगाकडून संयुक्त पूर्व परीक्षा (गट-ब) 2025 साठी एकूण 674 पदांची जाहिरात काढण्यात आलेली असून त्यामध्ये पोलीस उपनिरीक्षक (PSI) 392 पदांचा समावेश आहे. सामान्यतः संयुक्त पूर्व परीक्षेची जाहिरात डिसेंबरमध्ये प्रकाशित होऊन परीक्षा फेब्रुवारी/मार्च या कालावधीमध्ये घेण्यात येते, मात्र यावेळी सदर जाहिरात जुलै 2025 रोजी प्रकाशित होऊन परीक्षा 21 डिसेंबर 2025 रोजी होत असून वयोमर्यादा गणण्याचा दिनांक 1 नोव्हेंबर असल्यामुळे कम्बाईन परीक्षेचा अभ्यास करणारे विशेषतः PSI पदासाठी तयारी करणाऱ्या हजारो विद्यार्थ्यांचे वयोमर्यादा ओलांडल्यामुळे नुकसान होणार आहे. परीक्षेच्या वेळापत्रकाला धक्का न लावता कम्बाईन विशेषतः PSI पदासाठी तयारी करणाऱ्या विद्यार्थ्यांना एक वर्षाची वय सवलत देण्यात यावी, अशी मागणी आमदार रोहित पवार यांनी केली आहे.
शिवसेनेचे आमदार निलेश राणे यांनी भाजपचे कार्यकर्ते विजय केनवडेकर यांच्या घराची झाडाझडती घेतली होती. यावरून राणेंनी भाजपकडून निवडणुकीत पैसे वाटप केले जात असल्याचा आरोप केला होता. केनवडेकर यांच्या घरात काही पैसेही सापडले होते. राणेंचे हे आरोप केनवडेकर यांनी फेटाळले आहे. मी प्रामाणिकपणे व्यवसाय करून घर चालवतो. निलेश राणेंनी घरात अनधिकृतपणे प्रवेश केला. बेडरुममध्येही घुसले. आमचे कुटुंब दहशतीखाली असल्याचे केनवडेकर यांनी म्हटले आहे.
शरद पवार गटाचे नेते जयंत पाटील यांचा राम खाडे यांच्या कुटुंबियांना फोन करून तब्येतीची विचारपूस केली. जयंत पाटील यांनी राम खाडे यांच्या प्रकृतीची विचारपूस केली. शरद पवारांकडून सुद्धा खाडे यांना फोन गेल्याची माहिती मिळत आहे. पक्ष तुमच्या पाठीशी असून योग्य कारवाई करण्यासाठी पाठपुरावा करणार असल्याची ग्वाही जयंत पाटील यांनी दिली. राम खाडे यांच्यावर सध्या पुण्यातल्या एका खासगी रुग्णालयात उपचार सुरू आहेत.
स्थानिक स्वराज्य संस्थांच्या निवडणुकीदरम्यान राज्यात अनेक मोठ्या घडामोडी घडताना दिसत आहे. सर्वच राजकीय पक्षांकडून जोरदार प्रचार सुरू आहे. अशातच अनेक ठिकाणी महायुतीमधील अंतर्गत वाद चव्हाट्यावर येताना दिसत आहेत. बदलापुरमधील महायुतीमध्ये राडा झाल्याचे पाहायला मिळाले.
उमरगा नगरपालिका निवडणुकीत लावलेल्या बॅनरवरून वातावरण तापले आहे. पुढाऱ्याला किंवा नेत्याला माहीत नसते. हा जो बॅनरचा विषय आहे, हा स्थानिक पातळीवर झाला असेल याची कल्पना एकनाथ शिंदे,सोनिया गांधी,राहुल गांधींना सुद्धा नसेल. अंबादास दानवे यांनी ट्विट करण्यापेक्षा महाराष्ट्रात किती जागा येतील, आता हे तपासावे आणि त्या वेळेला तुमची तुम्हाला लायकी कळेल” अशा शब्दात संदीपान भुमरे यांनी हल्लाबोल केला. “तुम्ही शिंदे साहेबावर बोलत असाल तर तुमची काय परिस्थिती आहे, ही लायकी तुम्हाला कळेल. मला तरी वाटते अंबादास दानवे यांनी एकनाथ शिंदें विषयी बोलू नये, कारण जे काही आज अंबादास दानवे आहेत ते एकनाथ शिंदेंमुळे आहेत” असे संदीपान भुमरे म्हणाले.
राजगुरुनगर नगरपरिषदेतील ठेकेदार पद्धतीवरील कामगारांनी पगार थकबाकीच्या मुद्द्यावर आंदोलन सुरु आहे. मागील पाच महिन्यांपासून पगार न मिळाल्याने हे कामगार कामबंद आंदोलन करीत आहेत.
शिवसेना उद्धव बाळासाहेब ठाकरे पक्षाचे प्रमुख उद्धव ठाकरे आणि मनसे प्रमुख राज ठाकरे यांच्या सुमारे दीड तास खलबत झाले. मनसेला महाविकास आघाडीत घेण्याबाबत बैठकीत चर्चा झाल्याचे समजते.
मालवणमध्ये नगरपालिका निवडणुकीत पैसे वाटप झाल्याचा आरोप निलेश राणे यांनी केला आहे. याप्रकरणी ते निवडणूक निर्णय अधिकाऱ्यांना भेटण्यासाठी मालवण नगरपालिकेत दाखल झाले आहेत.
पंतप्रधान नरेंद्र मोदी आणि केंद्रीय गृहमंत्री अमित शाह तीन दिवसांच्या छत्तीसगड दौ-यावर जाणार आहेत. सर्व राज्यांमधील पोलिस महासंचालक आणि निरीक्षक जनरल यांच्या सर्वात मोठ्या परिषदेत दोन्ही नेते सहभागी होणार आहेत. मोदींच्या हस्ते या परिषदेचं उद्घाटन होणार असून शाह परिषदेचा समारोप करणार आहेत.
लातूर ग्रामीणचे काँग्रेसचे माजी आमदार त्र्यंबक भिसे हे आज उदगीर येथे मुख्यमंत्री देवेंद्र फडणवीस यांच्या उपस्थितीमध्ये भाजपात प्रवेश करणार आहेत.
उद्धव ठाकरे हे मनसे अध्यक्ष राज ठाकरे यांच्या भेटीसाठी शिवतीर्थावर पोहचले आहेत. नगरपालिका, महापालिका निवडणुकीच्या जागावाटपाबाबत त्यांच्यात चर्चा होण्याची शक्यता आहे.
आमदार संतोष बांगर यांनी एकनाथ शिंदे गटात सामील होण्यासाठी पन्नास कोटी रुपये घेतल्याचा गंभीर आरोप भाजप आमदार तानाजी मुटकुळे यांनी केला आहे. ते म्हणाले की, शंभर टक्के खरे आहेत बांगर यांनी शिंदेंकडून 50 कोटी घेतले.
पोलीस उपनिरीक्षक प्रमोद चिंतामणी यांना पोलिस सेवेतून बडतर्फ करण्यात आले आहे. दोन कोटींच्या लाच प्रकरणात ते निलंबित होते. पैसे दुप्पट करण्याच्या प्रकरणात त्यांच्यावर गुन्हा आणखी एक गुन्हा भोसरी पोलिस ठाण्यात दाखल करण्यात आला आहे.
एकनाथ शिंदेंच्या शिवसेनेकडून डोंबिवलीत झळकवलेल्या फलकांमध्ये “जनता ओळखते विकासाचा खरा योद्धा कोण”, “आमचे काम बोलते” अशा घोषणांमधून खासदार डॉ. श्रीकांत शिंदे यांचा विकासकार्यातील वाटा अधोरेखित करत भाजपा प्रदेश अध्यक्ष रवींद्र चव्हाण यांना अप्रत्यक्ष टोलेबाजी करण्यात आली. या फलकांनी रवींद्र चव्हाण यांना डिवचल्याची चर्चा आहे.
कल्याणचे काँग्रेसचे जिल्हाध्यक्ष आणि माजी नगरसेवक सचिन पोटे यांनी आपल्या पदाचा राजीनामा दिला आहे. पोटे यांच्या समर्थका पदाधिकाऱ्यांनीही पक्षातील पदांचे सामूहिक राजीनामे दिले आहेत.
अंबरनाथमध्ये फोडाफोडीचे राजकारणाला वेग आला आहे. भाजपच्या महिला पधिकारी रोजनील फर्नांडिस यांनी भाजपची साथ सोडली. त्यांनी एकनाथ शिंदेंच्या शिवसेनेत प्रवेश केला आहे.
निवडणुकीच्या प्रचारादरम्यान अंबरनाथमध्ये भाजप कार्यकर्ते सत्यम तेलंगे याच्यावर कोयत्याने हल्ला केल्याची घटना घडली आहे. हल्ला करणारे शिवसेनेचे कार्यकर्ते असल्याचा आरोप करण्यात येत आहे. या प्रकरणी अंबरनाथ पोलिस ठाण्यात गुन्हा दाखल करण्यात आला आहे. दसम्यान, हल्ला करणारा साहील हा शिवसेनेचा कार्यकर्ता नसल्याचा आरोप करण्यात आहे. दरम्यान, हा आरोप शिवसेनेच्या पदाधिकाऱ्यांनी फेटाळला आहे.
नागपूर महापालिकेच्या निवडणुकीसाठी प्रसिद्ध करण्यात आलेल्या प्रारूप मतदार यादीमध्ये 45 हजार मतदारांची नावे दोन दुबार असल्याचं समोर आलं आहे. दुबार नाव असलेल्या मतदारांच्या समोर 'डबल स्टार' असे चिन्ह देण्यात आले आहे.
राज्यातील वाळू तस्करी रोखण्यासाठी राज्य सरकारने मोठं पाऊल उचललं आहे. त्यानुसार आता वाळू तस्करी करणारी वाहने सापडल्यास परवाने निलंबित किंवा तिसऱ्यांदा गुन्हा सापडल्यास वाहनांचा परवाना कायमचा रद्द केला जाणार असल्याचा निर्णय महसूल विभागाने घेतला आहे.
कुर्डूवाडी नगरपालिकेच्या प्रचारासाठी आलेल्या शरद पवारांच्या राष्ट्रवादी काँग्रेसचे प्रदेशाध्यक्ष शशिकांत शिंदे यांनी राज्यभरात सध्या अनेक युत्या होत आहेत. मात्र, कुर्डूवाडीतील एकनाथ शिंदेंच्या शिवसेनेसोबत झालेली आमची युती महाराष्ट्राच्या भविष्यातील नांदी देखील ठरू शकते, असं वक्तव्य केलं आहे. त्यांच्या या वक्तव्यामुळे भविष्यात राज्याच्या राजकारणात नवी युती उदयास येणार की काय या चर्चांना उधाण आलं आहे.
सोलापूर जिल्ह्यातील सांगोला नगरपरिषद निवडणुकीत शिवसेना विरुद्ध भाजप अशी लढत होत आहे. शिवसेनेचे माजी आमदार शहाजीबापू पाटील यांनी भाजपसमोर मोठं आव्हान उभं केल्यामुळे भाजपची प्रतिष्ठा पणाला लागली आहे. अशातच आता भाजप उमेदवारांसाठी मुख्यमंत्री देवेंद्र फडणवीस सांगोल्यात सभा घेणार आहेत.
शरद पवारांच्या राष्ट्रवादीचे नेते राम खाडे यांच्यावर दहा ते पंधरा जणांनी धारदार शस्त्रांनी हल्ला केल्याची घटना समोर आली आहे. अहिल्यानगर-बीड जिल्ह्याच्या सीमेलगत मांदगाव जवळ हा हल्ला करण्यात आला आहे. यामध्ये राम खाडे गंभीर जखमी झाले आहेत.
अन्न व औषध प्रशासनाकडून करण्यात येणाऱ्या कारवाई अंतर्गत मागील सात महिन्यात राज्यात सुमारे 22 कोटी रुपयांपेक्षा जास्त किमतीचा गुटखा जप्त करण्यात आलाय गुटखा आणि तंबाखू जन्य पदार्थांची चोरट्या पद्धतीने विक्री करणाऱ्यांवर मुकोका कायद्यान्वये कारवाई करण्याबाबत एफडीए गांभीर्याने विचार करीत असल्याची माहिती.
सरकारनामाचे सदस्य व्हा
शॉपिंगसाठी 'सकाळ प्राईम डील्स'च्या भन्नाट ऑफर्स पाहण्यासाठी क्लिक करा.
Read Latest Marathi Political News, Breaking Political News from Maharashtra, India, Pune & Mumbai at Sarkarnama. To Get Live Political Marathi News on Mobile, Download the Sarkarnama Mobile App for Android and IOS. सरकारनामा आता सर्व सोशल मीडिया प्लॅटफॉर्मवर. ताज्या राजकीय घडामोडींसाठी फेसबुक, ट्विटर, इन्स्टाग्राम, शेअर चॅट, टेलिग्रामवर आणि व्हॉट्सॲप आम्हाला फॉलो करा. तसेच, सरकारनामा यूट्यूब चॅनेलला आजच सबस्क्राइब करा.