UP Assembly election 2027 : योगींचा गड भेदण्यासाठी अखिलेश यादव यांचा फॉर्म्यूला ठरला, वारं फिरणार? उत्तर प्रदेशात भाजपसमोर आव्हान, वातावरण तापलं...

शरत् प्रधान

UP politics news : उत्तर प्रदेश विधानसभा निवडणुकीला अजून सहा महिन्यांचा अवधी असला, तरी निवडणुकीचा बिगूल वाजला आहे. सत्ताधारी भाजप आणि प्रमुख विरोधी पक्ष असलेल्या समाजवादी पक्षाकडून जनतेला आपल्या बाजूकडे आकर्षित करण्यासाठी वेगवेगळे राजकीय डावपेच टाकण्यात येत आहेत. त्यामुळे राजकीय वातावरण तापण्यास सुरुवात झाली आहे. यामध्ये समाजवादी पक्षाच्या मागास, दलित आणि अल्पसंख्याक (पीडीए) समीकरणामुळे सत्ताधारी भाजपसमोर आव्हान निर्माण झाल्याची चर्चा आहे.

देशातील सर्वाधिक लोकसंख्या आणि लोकसभेच्या सर्वाधिक जागा असणाऱ्या उत्तर प्रदेशची निवडणूक कायमच चर्चेत असते. मुख्यमंत्री योगी आदित्यनाथ बऱ्याच काळापासून ‘इलेक्शन मोड’मध्ये दिसत असताना, समाजवादी पक्षाचे प्रमुख अखिलेश यादव यांनी आता रस्त्यावर उतरत प्रचाराला सुरुवात केली. विशेष म्हणजे, त्यांनी गेल्या आठवड्यात काँग्रेस आणि गांधी कुटुंबाचा पारंपरिक बालेकिल्ला मानल्या जाणाऱ्या रायबरेली येथून प्रचाराचे रणशिंग फुंकले.

रायबरेलीतील मोठ्या सभेतून यादव यांनी काँग्रेस नेते राहुल गांधी यांना आव्हान दिल्याची चर्चा सुरू झाली. अखिलेश यांनी त्याबाबत खुलासा करत, समाजवादी पक्ष व काँग्रेस यांच्यातील आघाडी मजबूत करण्यासाठीच रायबरेलीत आलो असल्याचे स्पष्ट केले. अखिलेश यादव यांच्या रायबरेलीच्या सभेत मागास, दलित आणि अल्पसंख्याक (पीडीए) या समाजघटकांची मोठी उपस्थिती होती.

अखिलेश यांनी अनेक दिवसांपासून ‘पीडीए’चे समीकरण यशस्वी पद्धतीने उभे केले असून, हा प्रयोग भाजप आणि कडवे हिंदूत्ववादी योगी आदित्यनाथ यांच्यासाठी आश्चर्याचा धक्का ठरला आहे. याच सामाजिक आधाराच्या जोरावर अखिलेश आदित्यनाथ यांना आव्हान देण्याची तयारी करीत आहेत. आदित्यनाथ हिंदू-मुस्लिम ध्रुवीकरणाला राजकारणातील प्रमुख मुद्दा बनवत असताना, अखिलेश यांनी बिगरयादव ओबीसी, बिगरजाटव दलित आणि मुस्लिम समाजाला पक्षाच्या आधाराशी जोडण्यावर भर दिला आहे.

लोकसभा निवडणुकीच्या अगदी आधी दलित मतदारांचा कल समाजवादी पक्ष-काँग्रेस आघाडीकडे वळविण्यात राहुल गांधी यांच्या प्रचाराचीही भूमिका राहिली. भाजप सत्तेत आल्यास राज्यघटना बदलली जाऊ शकते आणि त्यामुळे आरक्षणाचे धोरणही धोक्यात येऊ शकते, असा मुद्दा राहुल गांधी यांनी प्रचारात सातत्याने मांडला.

बहुजन समाज पक्षाच्या मायावती म्हणजे भाजपची ‘बी टीम’ अशी धारणा निर्माण झाल्याने पारंपरिक दलित मतदारांपैकी मोठा वर्ग त्यांच्यापासून दूर गेला, तर इंडिया आघाडीतील सहभागामुळे समाजवादी पक्ष हा अधिक सक्षम पर्याय असल्याचे मानून मुस्लिम मतदारांचा पाठिंबा अधिक दृढ झाला.

काँग्रेसच्या मर्यादा असूनही राहुल गांधी हे पंतप्रधान नरेंद्र मोदी यांना थेट आव्हान देणारे प्रमुख विरोधी नेते आहेत. दुसरीकडे, आदित्यनाथ यांना भाजपचा सामाजिक आधार विस्तारण्यात अडचणी येत येत आहेत. ‘सनातन धर्मा’ला धोका असल्याचा उल्लेख करताना योगी आदित्यनाथ भाषणांत ऐतिहासिक संदर्भांचा वारंवार वापर करतात.