प्रदेशाध्यक्षांना वैतागून माजी मुख्यमंत्री देणार धक्का

नवी दिल्ली : काँग्रेसची (Congress) डोकेदुखी कमी होण्याऐवजी आता वाढतच चालली आहे. पंजाबचे माजी मुख्यमंत्री अमरिंदरसिंग यांनी पक्ष सोडण्याचा निर्णय घेतला आहे. तर गोव्याच्या माजी मुख्यमंत्र्यांनी नुकताच तृणमूल काँग्रेसमध्ये प्रवेश केला आहे. आता आणखी एक माजी मुख्यमंत्री काँग्रेसला रामराम करण्याच्या वाटेवर आहेत. विशेष म्हणजे पंजाबप्रमाणेच मेघालयमध्ये (Meghalaya) प्रदेशाध्यक्षांना वैतागून माजी मुख्यमंत्री मुकुल संगमा (Mukul Sangma) पक्षातून बाहेर पडण्याची शक्यता आहे. ते हाय कमांडच्या भेटीसाठी दिल्लीत दाखल झाले आहेत.

पंजाबमधील राजकीय संकट अद्याप संपलेले नाही. अमरिंदरसिंग हे पक्ष सोडण्याच्या निर्णयावर ठाम असून, ते पुढील आठवड्यात नवी पक्षाची घोषणा करण्याची शक्यता आहे. त्यातच आता काँग्रेसला मेघालयमधून धक्का बसण्याची शक्यता आहे. मेघालयचे माजी मुख्यमंत्री मुकुल संगमा बाहेर पडण्याच्या वाटेवर आहेत. ते सध्या मेघालय विधानसभेचे विरोधी पक्षनेते आहेत. संगमा हे खासदार विन्सेन्ट पाला यांना प्रदेशाध्यक्षपदी नियुक्त केल्यापासून नाराज आहेत.

संगमा हे उद्या दिल्लीत दाखल होत आहेत. ते काँग्रेस हाय कमांडची भेट घेऊन त्यांच्या अडचणी मांडणार आहेत. हाय कमांडने राज्यात हस्तक्षेप करुन अंतर्गत वाद सोडवावेत, यासाठी ते आग्रही आहेत. संगमा यांनी पक्ष सोडण्याच्या चर्चेवर थेटपणे उत्तर देणे टाळले आहे. परंतु, याचा पूर्णपणे इन्कार केलेला नाही. हाय कमांडने मेघालयात लक्ष न घातल्यास आणखी एका राज्यात प्रदेशाध्यक्षांमुळे माजी मुख्यमंत्री पक्ष सोडण्याची परिस्थिती निर्माण होऊ शकते.

संगमा यांना फोडण्याची जबाबदारी तृणमूल काँग्रेसने राजकीय रणनीतीकार प्रशांत किशोर यांच्या संस्थेला दिल्याचे सूत्रांनी सांगितले. त्यामुळे गोव्यातील माजी मुख्यमंत्र्यांना फोडल्यानंतर आता मेघालयातील माजी मुख्यमंत्र्यांसाठी तृणमूलने फासे टाकले आहेत. अद्याप संगमा यांनी तृणमूलच्या ऑफरचा स्वीकार केलेला नाही. गोव्याचे माजी मुख्यमंत्री व काँग्रेसचे नेते लुईजिन्हो फलेरो यांनी नुकताच कोलकता येथे तृणमूल काँग्रेसमध्ये प्रवेश केला. त्यांच्यासोबत गोव्यातील काँग्रेसच्या काही वरिष्ठ पदाधिकाऱ्यांसह नऊ जण तृणमूलमध्ये दाखल झाले आहेत. फलेरो यांनी काँग्रेस सोडण्यात राजकीय रणनीतीकार प्रशांत किशोर यांचा मोठा हात असल्याचा खुलासा फलेरो यांनीच केला आहे.

मागील काही दिवसांपासून प्रशांत किशोर हे काँग्रेसच्या जवळ गेल्याचे मानले जाते. त्यांनी काँग्रेस अध्यक्षा सोनिया गांधी यांच्यासह राहुल व प्रियांका गांधी यांचीही भेट घेतली होती. त्यामुळे ते काँग्रेसमध्ये प्रवेश करणार असल्याच्या राजकीय चर्चाही रंगल्या होत्या. त्यातच फलेरो यांनी तृणमूलमध्ये जाण्यापूर्वी किशोर यांची भेट झाल्याचा गौप्यस्फोट गुरूवारी केला होता. आता संगमा यांच्याशीही किशोर यांच्या टीमचीच चर्चा सुरू असल्याचे समोर आलं आहे.