AAP Jalandhar News: काँग्रेसच्या बालेकिल्याला AAP ने पाडले खिंडार; माजी आमदाराला 'आप' कडून तिकीट

Jalandhar Lok Sabha by-election : कर्नाटक विधानसभा निवडणुकीपूर्वी केलेल्या पाहणीत काँग्रेसला सत्ता मिळेल, असा अंदाज व्यक्त केला असताना पंजाबमध्ये मात्र काँग्रेसला मोठा झटका बसला आहे.

जालंधर मतदारसंघात काँग्रेसचा मोठा फटका बसला आहे, माजी आमदार, दलित नेते सुशील कुमार रिंकू यांनी आम आदमी पक्षात प्रवेश केला आहे. सुशील कुमार यांच्या 'आप'मधील प्रवेशाच्या वेळी 'आप'चे राष्ट्रीय संयोजक आणि दिल्लीचे मुख्यमंत्री अरविंद केजरीवाल, पंजाबचे मुख्यमंत्री भगवंत मान यावेळी उपस्थित होते.

त्यांना जालंधर लोकसभा पोटनिवडणुकीत आम आदमी पक्षाने तिकीट दिले आहे. काँग्रेसने येथे आपला उमेदवार जाहीर केला आहे. पण सुशील कुमार रिंकू यांच्या 'आप'मधील प्रवेशामुळे येथील राजकीय समीकरण बदलणार असल्याचे जाणकारांचे मत आहे. 'आप'ने जालंधर पश्चिमचे माजी आमदार सुशील कुमार रिंकू यांनी तिकीट दिल्याने काँग्रेसच्या गोटात चिंता वाढली आहे.

१० मे रोजी जालंधर लोकसभा पोटनिवडणूक होत आहे. या जागेवर कमरजीत कौर यांच्या नावाची घोषणा केली होती, पण दलित नेता सुशील कुमार रिंकू विरोधात असल्यामुळे काँग्रेसची राजकीय समीकरण बिघडली आहेत. कमरजीत कौर या काँग्रेसचे माजी खासदार दिवंगत संतोख सिंह चौधरी यांच्या पत्नी आहेत.

राहुल गांधी यांच्या भारत जोडो यात्रेदरम्यान संतोख चौधरी यांचे ह्दयविकाराने निधन झाले होते. त्यामुळे ही पोटनिवडणुक होत आहे. आता काँग्रेस येथे कुणाला मैदानात उतरवणार हे पाहणे महत्वाचे ठरणार आहे. २० एप्रिल ही अर्ज भरण्याची शेवटची तारीख आहे.

जालंधर हा काँग्रेसचा बालेकिल्ला समजला जातो. गेल्या विधानसभेच्या वेळी जेव्हा पंजाबमध्ये आप आदमी पक्षाचे लाट असताना जालंधर मध्ये काँग्रेसने ९ जागांपैकी ५ जागांवर विजय मिळवला आहे. सुशील कुमार रिंकू यांच्या माध्यमातून आप आदमी पक्षाचे नजर जालंधरच्या दलित व्होटबॅकवर आहे. ते २०१७ मध्ये काँग्रेसच्या तिकीटावर आमदार झाले होते.