Amit Shah Interview : राहुल गांधी न्यायालयात जाऊ शकले असते, पण इतकी मुजोरी येते कुठून? अमित शाहंचा सवाल!

National Politics : केंद्रीय गृहमंत्री अमित शाह (Amit Shah) यांनी काँग्रेसचे माजी अध्यक्ष राहुल गांधी (Rahul Gandhi) यांच्यावर सडकून टीका केली आहे. खासदारकी रद्द होऊन इतके दिवस उलटून गेले,पण अजूनही राहुल गांधी आपल्यावरील कारवाईविरोधात न्यायालयात गेले नाहीत. ते या सगळ्याचा दोष पंतप्रधान नरेंद्र मोदींना देतात. राहुल गांधींकडे इतकी मुजोरी येते कुठून? अशा शब्दात शाह यांनी राहुल गांधींचा समाचार घेतला.

खासदारकी रद्द होण्याचं हे पहिलं उदाहरण नाही. या आगोदर ही राष्ट्रीय जनता दलाचे लालू प्रसाद यादव, काँग्रेस नेते राशीद अल्वी, राष्ट्रवादीचे खासदार मोहम्मद फैजल, तामिळनाडूच्या माजी मुख्यमंत्री जय ललिता यांच्यासह १७ जणांची खासदारकी किंवा आमदारकी रद्द झाली आहे. पण यापैकी कोणीही काळे कपडे परिधान करून निषेध केला नाही. लोकशाही धोक्यात आल्याची ओरड ही केली नाही. मग राहुल गांधी कशासाठी इतका बाऊ करतात? असा सवाल गृहमंत्री शाह यांनी विचारला आहे. एका माध्यमसमूहाच्या कार्यक्रमात ते बोलत होते.

गृहमंत्री शाह म्हणाले, "राहुल गांधींना दोन वर्षांची शिक्षा सुनावली, त्याच क्षणी त्यांचं संसद सदस्यत्व गेले. राहुल गांधी यांनी तातडीने न्यायालयात जाणे गरजेचे होते. मात्र ते अद्यापही न्यायालयात गेले नाहीत. इतकी मुजोरी येते कुठून असा मला प्रश्न पडतो. गांधी घराणं धोक्यात आले की लोकशाही धोक्यात येते का? ज्यामुळे खासदारकी गेली, तो न्यायालायाचा निर्णय २०१३ चा आहे. या निर्णयामुळे आतापर्यंत १७ सदस्यांची खासदारकी गेली आहे. त्यापैकी कुणीही पंतप्रधान मोदींवर आरोप केलेले नाहीत. गुजरातचा गृहमंत्री असताना खोट्या केसमध्ये मला तुरूंगात पाठवलं. पण आम्ही काळे कपडे परिधान करून आंदोलनं केली नाहीत."

"ते कायदा वाचणार नाहीत, त्यांना समजणारही नाही. पण काँग्रेसकडे राज्यसभेत बसणारे मोठे वकील आहेत, ते ही काही समजावत नाही. लोकसभा अध्यक्षही काही करू शकत नाहीत. ज्या वेळी तुम्ही दोषी ठरलात, तेव्हाच तुमचं सदस्यत्व गेलं," असे ही अमित शाह म्हणाले.