PM Modi: पंतप्रधान म्हणतात,"काँग्रेसमध्ये पुन्हा विभाजन होण्याची शक्यता"; PM मोदींच्या मनात नेमकं काय सुरु? राजकीय चर्चांना उधाण

PM Modi on Bihar Election Result: बिहार विधानसभा निवडणुकीत एनडीएला घवघवीत यश मिळाल्यानंतर पंतप्रधान नरेंद्र मोदी यांनी नवी दिल्लीतील भाजपच्या मुख्यालयात याचं सेलिब्रेशन करत उपस्थितांना संबोधित केलं. यावेळी त्यांनी काँग्रेसवर आणि त्यांच्या राजकारणावर सडकून टीका केली. काँग्रेसला त्यांनी 'मुस्लिम लीग माओवादी काँग्रेस' अशा शब्दांत बोचरी टीका केली. तसंच काँग्रेसमध्ये विभाजनं होऊ शकतं, अशी भूमिका मांडली. पण यामुळं त्यांच्या मनात नेमकं काय सुरु आहे? याची यानिमित्त चर्चा सुरु झाली आहे.

'मुस्लीम लीग माओवादी काँग्रेस'

मोदी म्हणाले, मी अत्यंत गांभीर्यानं सांगू इच्छितो की, आज काँग्रेस 'मुस्लीम लीग माओवादी काँग्रेस' अर्थात MMC बनली आहे. काँग्रेसचा पूर्ण अजेंडा यावरच चालतो. त्यामुळेच आता काँग्रेसच्या अंतर्गत एक वेगळाच स्फोट होऊ पाहतो आहे, जो त्यांच्या नकारात्मक राजकारणापासून अस्वस्थ आहे. काँग्रेसचे जे नामदार (राहुल गांधी) आहेत ते काँग्रेसला ज्या मार्गावर घेऊन जात आहेत. यामुळं काँग्रेस अंतर्गत घोर निराशा, नाराजी निर्माण होत आहे. त्यामुळं मला तर शंका वाटतेय की कदाचित यापुढे काँग्रेसचं एक आणखी विभाजन होऊ शकतं. तसंच काँग्रेसचे जे सहकारी पक्ष आहेत त्यांना देखील हे आता लक्षात येतंय की, काँग्रेस आपल्याला त्यांच्या नकारात्मक राजकारणासह सर्वांना सोबत घेऊन बुडणार आहे.

काँग्रेस मित्रपक्षांना घेऊन बुडणार

तुम्हाला लक्षात असेल की, मी काँग्रेसचे नामदार तलावात डुबकी मारुन बिहारच्या निवडणुकीत स्वतः बुडण्याची आणि दुसऱ्यांना बुडवण्याची प्रॅक्टिस करत आहेत, असं म्हणालो होते. यापूर्वी देखील याच मंचावरुन मी काँग्रेसच्या सहकाऱ्यांना इशारा दिला होता की, काँग्रेस एक अशी परजीवी आहे की ती आपल्या सहकाऱ्यांच्या व्होट बँकेला खाऊन पुन्हा प्रस्थापित होऊ इच्छिते आहे. त्यामुळं काँग्रेसपासून सावधान राहण्याची गरज त्यांच्या सहकाऱ्यांना आहे, अशा शब्दांत पंतप्रधान नरेंद्र मोदी यांनी काँग्रेसवर जहरी टीका केली.