T Raja Singh : भाजपला मोठा झटका; आक्रमक नेते टी राजा यांचा राजीनामा, अध्यक्ष निवडीवरून उचललं टोकाचं पाऊल

BJP Politics : महाराष्ट्रासह देशातील विविध राज्यांमध्ये शुक्रवारी भाजप प्रदेशाध्यक्ष निवडीची प्रक्रिया पार पडली. या निवडीनंतर पुढील काही दिवसांत राष्ट्रीय अध्यक्षांची निवडणूक होणार आहे. राज्यांतील निवडींवरून पक्षातील धुसफूस चव्हाट्यावर आली आहे. पक्षाचे आक्रमक नेते टी. राजा सिंह यांनी थेट पक्षाला रामराम ठोकला आहे.

तेलंगणातील भाजप आमदार टी. राजा सिंह हे हिंदुत्वाचे कट्टर समर्थक आहे. तेलंगणासह महाराष्ट्रातही त्यांच्या तडाखेबंद भाषणांनी वाद निर्माण झाला होता. तेलंगणामध्येही आज भाजपच्या प्रदेशाध्यक्षांची निवड झाल्याचे समजते. याच निवडीवरून उघडपणे नाराजी व्यक्त करत टी. राजा यांनी थेट पक्षाला सोडचिठ्ठी दिल्याने खळबळ उडाली आहे.

टी राजा सिंह हे तेलंगणातील भाजपचे बडे नेते मानले जात होते. त्यांनी पक्षाचे प्रदेशाध्यक्ष जी. किशन रेड्डी यांच्याकडे राजीनामा पाठवला. मुस्लिमांविषयीची त्यांची विधाने अनेकदा वादात सापडली होती. त्यांनी सोशल मीडियात एक पोस्ट करत आपली भूमिका स्पष्ट केली. हिंदुत्व आणि गोशामहलमधील लोकांच्या सेवेसाठी कटिबध्द आहे.

तेलंगणाच्या प्रदेशाध्यक्षपदी रामचंदर राव यांची निवड निश्चित मानली जात आहे. या शर्यतीत केवळ त्यांचा अर्ज आला आहे. त्यामुळेच नाराज झाल्याने टी. राजा यांनी राजीनामा दिला आहे. तसा उल्लेखही त्यांनी पत्रात केला आहे. भाजपने यापूर्वी त्यांना पक्षातून काही काळासाठी निलंबितही केले होते.

2022 मध्ये टी राजा यांनी पैगंबर मोहम्मद यांच्याविषयी वादग्रस्त विधान केले होते. त्यावरून वाद निर्माण झाल्याने राज्य सरकारच्या आदेशानंतर पोलिसांनी त्यांना अटक केली होती. याच वादानंतर भाजपने त्यांना निलंबित केले होते. पण काही महिन्यांत त्यांचे निलंबन रद्द करण्यात आले. मात्र, त्यानंतर त्यांच्याकडून अशी विधाने करण्यात आले. हिंदुत्व आणि गोरक्षा आदी मुद्द्यांवर ते आक्रमकपणे भाषण करतात. महाराष्ट्रतही त्यांच्या विधानांमुळे वाद निर्माण झाला होता.