BJP News : भाजप सीमावासीयांच्या पाठिशी, राऊत काँग्रेसच्या दलालीसाठी आले; फडणवीसांची बोचरी टीका !

Sanjay Raut News : कर्नाटक राज्यात सद्या विधानसभा निवडणुकांची लगबग सुरू आहे. काँग्रेस, भाजपसह जेडीएसने इथे आपली प्रतिष्ठा पणाला लावत, निवडणुकीत प्रचार करताना दिसत आहेत. सीमाभागातील बेळगावात आणि एकूणच एकूण कर्नाटक राज्यात सगळीकडे कमळच फुललेले दिसेल. मागील 9 वर्षांमध्ये देशात परिवर्तन झाले आहे, असे महाराष्ट्राचे उपमुख्यमंत्री देवेंद्र फडणवीस (Devendra Fadnavis) यांनी म्हंटले आहे. ते कर्नाटकातील भाजपच्या प्रचार सभेत बोलत होते.

भाजप मराठी भाषिकांच्या पाठीशी :

भारतीय जनता पक्ष हा एक राष्ट्रीय पक्ष आहे. याआधीही बेळगावात मी आलो आहे. दिवंगत विलासराव देशमुख हे महाराष्ट्राचे मुख्यमंत्री होते, तेव्हा त्यांनी कर्नाटकात प्रभारीचं कामही केलं होतं. तेही पक्षासाठी सीमाभागात फिरत होते. मी स्वत: सीमाभागातील मराठी भाषकांच्या बाजूने मागे उभा आहे. आमचा भाजप पक्ष देखील सीमावासीयांच्या बाजूने ठामपणे उभा आहे, असे फडणवीस म्हणाले.

'राऊत काँग्रेसची दलाली करण्यासाठी आले होते'

संजय राऊत हे काँग्रेसची दलाली करायचे सोडलं तर मला इथे कर्नाटकात जाण्याची आवश्यकता पडणार नाही. संजय राऊत यांचा काँग्रेस हा मित्रपक्ष आहे. मात्र राऊतांनी आपल्या मित्रपक्ष काँग्रेसला प्रचार कुठे करावा आणि कुठे करु नये, याबाबत काही सल्ले दिले नाही. कारण ते फक्त काँग्रेसची दलाली करण्यासाठीच आले आहेत, अशी बोचरी टीका फडणवीसांनी केली

'कर्नाटकात काँग्रेसचा मुख्यमंत्री होणार नाही -

विरोधी पक्षांनी फक्त राजकारण केलं. विरोधकांच्या सरकारांनी मोदीजींच्या योजना, सामान्य लोकांपर्यंत पोहचू दिल्या नाहीत. कर्नाटकामध्ये काँग्रेस मुख्यमंत्री होणे शक्य नाही. काँग्रेस पक्षातच मुख्यमंत्रीपदासाठी भांडणं लागली आहेत, असे ही फडणवीस म्हणाले.