EVM Hack Controversy : काँग्रेसचा भाजप मुख्यमंत्र्यावर 'ईव्हीएम'वरून पलटवार, करून दिली 70 वर्षापूर्वीची आठवण!

Rekha Gupta News : राहुल गांधी मागील काही काळापासून निवडणूक प्रक्रियेवर संशय व्यक्त करत आहेत.निवडणूक आयोगावर आरोप करत त्यांनी मतदार याद्यांमध्ये घोळ घातला असल्याचे म्हटले होते. तसेच ईव्हीएमवर देखील विरोधी पक्षांकडून संशय व्यक्त केला जात आहे. त्यावर भाजपच्या दिल्लीच्या मुख्यमंत्री रेखा गुप्ता यांनी काँग्रेस मागील 70 वर्षांपासून ईव्हीएम हॅक करून सत्तेत येत होती, असा दावा केला. तसेच आत्ता आम्ही केलं तर त्यांना वाईट वाटते, असे सांगितले.

रेखा गुप्ता यांच्या काँग्रेसने ईव्हीएम हॅक केल्याच्या दाव्यावर काँग्रेस प्रवक्ते अनुप अत्रे म्हणाले, 'त्या काँग्रेसवर आरोप करतात की 70 वर्षआधी काँग्रेस ईव्हीएम हॅक करत होती. पण त्यांना माहीत नाही की 70 वर्षापूर्वी ईव्हीए नव्हते. ईव्हीएम आल्यापासूनच भाजप जिंकत आहे.'

राहुल गांधी आणि विरोधी पक्षाचे नेते व्होटचोरीवर आवाज उठवत आहेत. आणि भाजपच्या मुख्यमंत्र्याने कबुल केले की ईव्हीएम हॅक करत ते सत्तेत आले आहेत. आता निवडणूक आयोगाचे डोळे उघडले पाहिजे की संवैधानिक पदावर बसलेल्या भाजपच्या मुख्यमंत्र्‍याकडून ईव्हीए हॅकची गोष्ट स्वीकारली जात आहे, असे देखील अनुप अत्रे म्हणाले.

रेखा गुप्ता नेमकं काय म्हणाल्या?

दिल्लीच्या मुख्यमंत्री तथा भाजप नेत्या रेखा गुप्ता यांची एका हिंदी वृत्तवाहिनीने मुलाखत घेतली. या मुलाखतीमध्ये ईव्हीएम हॅक करत भाजप जिंकत असल्याचा आरोप विरोधक करत असल्याचे प्रश्न गुप्ता यांना विचारण्यात आला. त्यावर त्या म्हणाल्या, 'जेव्हा 70 वर्षापासून ते (काँग्रेस) ईव्हीएम हॅक करत होते तेव्हा काही नव्हत होतं. पण आता आम्ही केलं तर त्यांना वाईट वाटतंय, हे चांगलंय.'

'आप'ची गुप्तांवर टीका

रेखा गुप्ता यांचा ईव्हीएम हॅकवर बोलतानाचा व्हिडिओ दिल्लीचे माजी मुख्यमंत्री अरविंद केजरीवास यांनी ट्विट करत हे बघा दिल्लीच्या मुख्यमंत्री काय बोलत आहेत, असे म्हटले आहे. तसेच 'आप'चे आमदार कुलदीप कुमार यांनी म्हटले की, आत्तापर्यंत निवडणूक मतदारयाद्यांमधील नाव काढण्याची आणि काही नावे घालण्याच्या घोटाळ्याविषयी आम्ही बोलत होतो. मात्र, स्वतः भाजपाच्या मुख्यमंत्री रेखा गुप्ता यांनी मतचोरीची, ईव्हीएम हॅक करून सरकार बनवले असल्याचे मान्य केले आहे.