Bihar Result : बिहारमध्ये 'गेम चेंजर' ठरलेल्या 10 हजार रोख देण्याच्या योजनेचा 'मास्टर माईंड' कोण? मोदी, नितीश कुमार नव्हे, 'या' नेत्याने पलटवली बाजी !

Himanta Biswa News : बिहारमध्ये भाजप-जेडीयूच्या एनडीए आघाडीने एकतर्फी विजय मिळवला. या निवडणुकीत महिलांना रोजगारासाठी 10 हजार रोख रुपये देणारी 'महिला रोजगार योजना' गेम चेंजर ठरली. तब्बल दीड कोटी महिलांना दहा हजार रुपये थेट त्यांच्या खात्यात देण्यात आले. या योजनेमुळेच पुन्हा एनडीची सत्ता आल्याचे विश्लेषक सांगत आहेत. आता 'गेम चेंजर' योजनेची आयडीया नेमकी कोणाची होती याची माहिती समोर आली आहे.

महिलांच्या खात्यात थेट दहा हजार जमा करण्याच्या योजनेमागे आसामचे मुख्यमंत्री हिमंता बिस्वा यांची रणनीती होती. बिस्वा यांनी सांगितले की, बिहार सरकारच्या विनंतीनंतर आसाममधील अधिकाऱ्यांनी पटना येथे जाऊन महिलांसाठी तयार करण्यात आलेल्या 'जीविका 10 हजार मॉडल'चे सादरीकरण केले. यातूनच बिहार सरकारने महिला रोजगार ही विस्तृत योजना तयार केली. सरमा यांनी हे देखील सांगितले की, या योजनेमागे पंतप्रधान नरेंद्र मोदी यांची लखपती दीदी योजनेची प्रेरणा होती.

आसामच्या टीमने पाटणामध्ये सादरीकरण करताना सल्ला दिला होता की, महिलांना व्यवसायासाठी सुरुवातीला 10 हजार रुपये देण्यात यावेत. ही रक्कम परत घेऊ नये. आणि ज्या महिला व्यवसायाचा विस्तार करतील त्यांना दोन लाखांपर्यंत अतिरिक्त निधी देण्यात यावा. कर भरणाऱ्या कुटुंबाला या योजनेतून वगळण्यात यावे, असे देखील आसामच्या टीमने सांगितले होते.

बिहार सरकारने आपल्या सोयीनुसार काही बदल करत महिला रोजगार योजनेच्या नावाने ही योजना अंमलात आणली तसेच महिलांना थेट दहा हजार रुपये दिले.

जेडीयूचे नेते काय म्हणाले?

नितीश कुमार यांच्या जेडीयूमधील नेत्यांचे म्हणणे होते की, महिला रोजगार योजनेसाठी आसाम माॅडेल हे मार्गदर्शक ठरले मात्र याचे पूर्ण श्रेय आसामचे नाही. कारण ही योजना एकत्रित विचाराचा परिणाम आहे. कारण मागील अनेक वर्षांपासून नितीश कुमार यांच्या नेतृत्वाखाली बिहारमधील महिलांना आर्थिक सक्षम करण्यासाठी विविध योजना राबवत आहेत. त्या वेगवेगळ्या माॅडेलच्या अनुभवाच्या आधारे या योजनेला अंतिम रुप देण्यात आले.