India Pakistan ceasefire violation : शस्त्रसंधीचं उल्लंघन, पाकिस्तानला प्रत्युत्तर देण्यासाठी तिन्ही सैन्यदलाला स्वातंत्र्य; भारतीय परराष्ट्र मंत्रालयाचा इशारा (VIDEO)

Vikram Misri press conference : भारताबरोबर युद्धबंदीची अवघ्या तीन तासांत उल्लंघन करत पाकिस्ताने पुन्हा भारताविरोधी कुरापती सुरू ठेवल्या आहेत. पाकिस्तानने शस्त्रसंधीचं उल्लंघन करत गोळीबार, ड्रोन हल्ले चालूच ठेवले आहेत. भारताने प्रत्युत्तरात हे सर्व हल्ले निष्फळ ठरवले.

पाकिस्तानच्या या शस्त्रसंधीच्या उल्लंघनावर भारताच्या परराष्ट्र सचिव विक्रम मिस्त्री यांनी पत्रकार परिषद घेत, पाकिस्तनाच्या प्रत्येक हालचालीवर भारताची करडी नजर आहे, पाकिस्तानने कुरापती थांबवल्या नाही तर, आम्ही आमच्या तिन्ही सैन्यदलांना प्रत्युत्तर देण्याचे पूर्ण स्वातंत्र्य दिलेले आहे, असं सुनावलं आहे.

भारत-पाकिस्तानमध्ये गेल्या तीन दिवसांपासून तणावाचं वातावरण आहे. युद्धस्थिती निर्माण झाली आहे. यातच आज दुपारानंतर अमेरिकेच्या मध्यस्थीने भारत (India) -पाकिस्तानमध्ये युद्धबंदीचा करार करण्यात आला. अमेरिकेचे राष्ट्राध्यक्ष डोनाल्ड ट्रम्प यांनी तशी त्यांच्या समाज माध्यमांवरून घोषणा केली. परंतु अवघ्या तीन तासात पाकिस्तानने युद्धबंदीचं उल्लंघन करण्यात आलं. पाकिस्तानने जम्मू-काश्मीर या सीमालगत भागात ड्रोन हल्ले, गोळीबार, तोफगोळ्यांचा मारा सुरू केला.

पाकिस्तानाच्या (Pakistan) या कुरापतीला भारतीय लष्करानं सडेतोड उत्तर दिलं आहे. परंतु पाकिस्तानच्या या कुरापतीवरून भारत चांगलाच संतापला आहे. परराष्ट्र मंत्रालयाने आज दिवसभरातील तिसरी पत्रकार परिषद घेत पाकिस्तानला चोख प्रत्युत्तर देणार, अशा कडक शब्दात सुनावलं.

भारताच्या परराष्ट्र मंत्रालयाचे सचिव विक्रम मिस्त्री यांनी पत्रकार परिषदेत सांगितले की, "भारत-पाकिस्तान दरम्यान झालेल्या शस्त्रसंधीच्या उल्लंघनाला पाकिस्तान जबाबदार आहे. भारताने या उल्लंघनाला चोख प्रत्युत्तर दिले असून, पाकिस्तानने या घटनेकडे गांभीर्याने पाहावे".

भारतीय सैन्य सतर्क असून, कोणतीही कारवाई करण्यासाठी तयार आहे. पाकिस्तानच्या प्रत्येक हालचालीवर भारताची करडी नजर आहे. परिस्थितीचे गांभीर्य ओळखून पाकिस्तानने आपले आक्रमक हल्ले थांबवावेत. अन्यथा आम्ही आमच्या तिन्ही सैन्यदलांना प्रत्युत्तर देण्याचे पूर्ण स्वातंत्र्य दिलेले आहेत, असे विक्रम मिस्त्री यांनी सांगितले.