'काश्मीर फाईल्स'च्या निर्मात्यांचे दहशतवाद्यांशी संबंध; भाजपच्या मित्रपक्षानेच टाकला बॉम्ब

मुंबई : 'द काश्मीर फाईल्स' (The Kashmir Files) चित्रपटावरुन सध्या मोठा प्रमाणात गदारोळ सुरू आहे. पंतप्रधान मोदींसह भाजप नेते या चित्रपटासाठी मैदानात उतरले आहेत. आता यात भाजपच्या सहकारी पक्षाने उडी घेतली आहे. या चित्रपटाच्या निर्मात्यांचे दहशतवाद्यांशी कनेक्शन असून, हा देशविरोधी शक्तींचा कट आहे, असा बॉम्बच भाजपच्या सहकारी पक्षाने टाकला आहे. यामुळे मोठी खळबळ उडाली आहे.

बिहारचे माजी मुख्यमंत्री जीनतराम मांझी (Jitan Ram Manjhi) यांनी काश्मीर फाईल्स चित्रपटाबद्दल अनेक गंभीर आरोप केले आहेत. हा चित्रपट दहशतवाद्यांचा कट असून, याच्या निर्मात्यांचे दहशतवाद्यांशी संबंध असू शकतात, असे त्यांनी म्हटले आहे. या प्रकरणी चौकशी करण्याची मागणी मांझी यांनी केली आहे. काश्मिरी पंडितांमध्ये दहशतीचे वातावरण निर्माण करून त्यांना काश्मीर खोऱ्यात परतण्यापासून रोखण्याचा हे षडयंत्र असू शकते, असा दावाही त्यांनी केला आहे.

बिहारमध्ये संयुक्त जनता दल आणि भाजप आघाडीचे सरकार आहे. या सरकारमध्ये मांझी यांचा हिंदुस्तानी आवाम मोर्चा (HAM) हा पक्षही सहभागी आहे. आता त्यांनी भाजपने प्रतिष्ठेच्या केलेल्या काश्मीर फाईल्सवर प्रश्नचिन्ह उपस्थित केले आहे. यामुळे बिहार सरकारमधील बिघाडी समोर आली आहे. असे असतानाच काश्मीर फाईल्सबाबतही संभ्रम निर्माण झाला आहे. चित्रपटाचे दिग्दर्शक विवेक अग्निहोत्री यांच्यासह सगळ्या युनिटचीच चौकशी करण्याची मागणी त्यांनी लावून धरली आहे. यामुळे आगामी काळात काश्मीर फाईल्समुळे राजकारण आणखी तापण्याची शक्यता आहे.

मोदींकडून चित्रपट अन् दिग्दर्शकाचे कौतुक

पंतप्रधान नरेंद्र मोदींसह (Narendra Modi) संपूर्ण मंत्रिमंडळ आणि भाजपचे (BJP) नेते या चित्रपटाचा प्रचार करताना दिसत आहे. काश्मिरी पंडितांवर आधारित असलेल्या या चित्रपटाचे दिग्दर्शक विवेक अग्निहोत्री आहेत. पंतप्रधान नरेंद्र मोदी यांनी काश्मीर फाईल्स चित्रपटाचे आणि दिग्दर्शक विवेक अग्निहोत्री यांचे जाहीर कौतुक केले होते. काश्मीर पंडितांवरील अत्याचार दाखवणारा हा चित्रपट पाहून प्रेक्षकांचे डोळे पाणावतात, असे मोदी म्हणाले होते. याचबरोबर मोदींनी अग्निहोत्री हे निडर असल्याची प्रशंसाही केली होती.