Modi Government : आता निवडणूक लढणार नाही! पंतप्रधान मोदींच्या मंत्र्यांनी वर्षभरातच केली धक्कादायक घोषणा

Impact on Modi Cabinet and BJP’s Strategy : पंतप्रधान नरेंद्र मोदी यांच्या मंत्रिमंडळात येण्यासाठी अनेक खासदारांची चढाओढ असते. काहींना संधी मिळते तर काहींचा भ्रमनिरास होतो. पण केंद्रीय मंत्री झालेल्या एका नेत्यानं वर्षभरातच एक धक्कादायक घोषणा केली आहे. सक्रीय राजकारणातून संन्यास घेत असल्याचे सांगत या मंत्र्यांनी पुन्हा निवडणूक लढणार नसल्याचे स्पष्ट केले आहे.

केंद्रीय जनजातीय कार्य मंत्री जुएल ओराम यांनी ही घोषणा करत राजकारणात खळबळ उडवून दिली आहे. केंद्रीय मंत्रिपदावर कार्यरत असताना त्यांनी हे जाहीर केल्याने आश्चर्य व्यक्त केले जात आहे. ओराम हे ओडिशातील भाजपचे ज्येष्ठ नेते आहेत. या राज्यांत भाजपने इतिहास घडवत पहिल्यांदाच सत्ता खेचून आणली आहे.

संभलपूर येथील एका सार्वजनिक कार्यक्रमात बोलताना ओराम यांनी शनिवारी आपल्या राजकीय वाटचालीबाबत मोठं विधान केलं आहे. ते म्हणाले, आता मी निवडणूक लढणार नाही. मी आठवेळा लोकसभा आणि दोनदा विधानसभेची निवडणूक लढली आहे. आता पक्षासाठी काम करण्याची आणि युवकांना पुढे आणण्याची माझी इच्छा आहे. पक्ष जी जबाबदारी देईल, ती पार पाडीन, असेही ओराम यांनी स्पष्ट केले आहे.

मीडियाशी बोलतानाही ओराम यांनी निवडणूक न लढण्याबाबत स्पष्ट संकेत दिले. आता युवकांना पुढे येताना पाहू इच्छित असल्याचे ते म्हणाले. राज्यसभा सदस्य किंवा राज्यपाल बनण्याबाबतच्या प्रश्नावर ते म्हणाले की, असे नाही झाले तरी मी संघटनेसाठी काम करत राहीन.

कोण आहेत ओराम?

ओराम हे भाजपचे ओडिशातील ज्येष्ठ नेते असून प्रमुख आदिवासी चेहरा म्हणून त्यांच्याकडे पाहिले जाते. ते सुंदरगढ लोकसभा मतदारसंघाचे 1998 पासून नेतृत्व करत आहेत. 1999 मध्ये जनजातीय कार्य मंत्री म्हणून त्यांचा पहिल्यांदाच केंद्रीय मंत्रिमंडळात समावेश झाला होता. त्यानंतर 2024 मध्ये एनडीएची सलग तिसऱ्यांदा सत्ता आल्यानंतर त्यांच्या गळ्यात केंद्रीय मंत्रिपदाची माळ पडली.