Youngest MLA In India : राष्ट्रवादीच्या रोहित पाटील यांचा रेकॉर्ड बिहारच्या लेकीने मोडला : मैथिली ठाकूर ठरल्या वरचढ

Youngest MLA in India : काल-परवापर्यंत महाराष्ट्रातीलच नव्हे तर संपूर्ण भारतातील सर्वात तरुण आमदार म्हणून राष्ट्रवादी काँग्रेस शरदचंद्र पवार पक्षाचे आमदार रोहीत आर. आर. पाटील यांचे नाव होते. पण बिहारच्या मैथिली ठाकूर यांनी हा रेकॉर्ड ब्रेक केला आहे. ठाकूर आता देशातील सर्वात तरुण आमदार बनल्या आहेत.

भारतात लोकसभा आणि विधानसभा निवडणूक लढविण्यासाठी 25 वर्षांची अट बंधनकारक आहे. रोहित पाटील यांनी गतवर्षी विधानसभा निवडणूक जिंकली त्यादिवशी त्यांचे वय 25 वर्षे 4 महिने आणि 16 दिवस असे वय होते. पण मैथिली ठाकूर यांनी विधानसभा निवडणूक जिंकली त्यादिवशी त्यांचे वय 25 वर्षे 3 महिने आणि 20 राहिले.

स्वतः रोहीत पाटील यांनी एका मुलाखतीत बोलताना वय आणि आमदारकी याबद्दल सांगितले होते. त्यांना आपण वयाच्या 25 व्या वर्षी आमदार झालो ही गोष्ट सुरुवातीला पचवण्यासाठी जड गेली. पण ते आमदार झाले. त्यापूर्वी झिशान सिद्दकी हे 26 व्या वर्षी आमदार झाले होते. शिवाय तेलंगणातील रोहित म्हणून ते देखील 26 व्या वर्षी आमदार झाले होते.

मैथिली ठाकूर बनल्या आमदार :

मैथिली ठाकूर यांनी दरभंगाच्या अलीनगर मतदारसंघातून दणदणीत विजय मिळवून सर्वांना आश्चर्यचकित केले आहे. मैथिली यांनी निवडणूक प्रचारात बरीच मेहनत घेतली. २५ वर्षीय लोकगीत गायिका ते तरुण नेता होणाऱ्या मैथिली यांनी ऑक्टोबर महिन्यांत भाजपमध्ये प्रवेश केला होता. अलीनगर मतदारसंघात राष्ट्रीय जनता दलाचे उमेदवार विनोद मिश्रा यांच्याविरोधात त्या उभ्या होत्या.

निकालानंतर आपण बिहारच्या जनतेची सेवा करण्यासाठी तयार आहोत, अशी प्रतिक्रिया त्यांनी नोंदविली. पराभवाचा विचार माझ्या मनालाही शिवला नाही आणि तसेच घडले व विजयी झाले, अशा शब्दांत त्यांनी भावना व्यक्त केल्या. गेल्या तीस दिवसांत त्यांनी मतदारसंघ पिंजून काढला होता. लोकांनी माझ्यावर टाकलेला विश्‍वास सार्थ करण्यास सज्ज आहे, असे त्या म्हणाल्या.