BSP Chief Mayawati : धूर, गोंधळ अन् कार्यकर्त्यांची पळापळ! भर पत्रकार परिषदेत मायावतींसमोर नेमकं काय झालं?

Smoke during Mayawati press conference: उत्तर प्रदेशच्या माजी मुख्यमंत्री आणि बहुजन समाज पार्टीच्या प्रमुख मायावती यांनी लखनऊ येथील पक्ष कार्यालयात आपल्या 70व्या वाढदिवसानिमित्त पत्रकार परिषद घेतली. या पत्रकार परिषदेदरम्यान एक मोठी दुर्घटना टळली. कार्यक्रम सुरू असतानाच अचानक शॉर्ट सर्किटमुळे भिंतीवरील लाईटमधून धूर निघू लागला. काही क्षणांसाठी तिथे गोंधळाची परिस्थिती निर्माण झाली.

धूर दिसताच तिथे उपस्थित असलेले सुरक्षाकर्मी तातडीने सतर्क झाले. त्यांनी लगेच परिस्थिती नियंत्रणात आणण्यासाठी स्प्रेचा वापर केला. वेळेत उपाय केल्यामुळे आग पसरण्यापूर्वीच धोका टळला.

या घटनेत कोणालाही इजा झाली नाही आणि कार्यक्रम पुन्हा सुरळीतपणे पार पडला. अचानक घडलेल्या या प्रकारामुळे काही काळ उपस्थितांमध्ये भीतीचे वातावरण होते, मात्र प्रशासनाच्या तत्परतेमुळे सर्व काही आटोक्यात आले.

या पत्रकार परिषदेत मायावती यांनी आपल्या वाढदिवसाबाबत भूमिका मांडली. त्या म्हणाल्या की, आज माझा 70वा वाढदिवस असून तो वैयक्तिक आनंदाचा दिवस न मानता जनकल्याणाचा दिवस म्हणून साजरा केला जातो.

दरवर्षी नववर्षाच्या पहिल्या महिन्यात देशभरात हा दिवस साधेपणाने आणि लोकांच्या हितासाठी उपक्रम राबवून साजरा केला जातो. बहुजन समाज पार्टीने सुरू केलेल्या विविध जनकल्याणकारी योजनांचा लाभ समाजातील सर्व घटकांना मिळाला असून, त्यामुळे जनतेच्या मनात पक्षाबद्दल विश्वास निर्माण झाला आहे, असेही त्यांनी सांगितले.

मायावती यांनी सांगितले की, ज्या गुरूंनी आणि महापुरुषांनी समानतेचा मार्ग दाखवला, त्यांना त्या नमन करतात. दलित, वंचित आणि उपेक्षित समाजाच्या सन्मानासाठी आयुष्य समर्पित केले असून ही लढाई पुढेही सुरू राहील. मी कोणाच्याही दबावाला बळी पडणार नाही आणि कोणत्याही लालचात येणार नाही, असे ठाम शब्दांत त्यांनी सांगितले.