NCP MLA Disqualification Case : अजित पवारांना नागालँडमध्येही मोठा दिलासा; शरद पवारांना तिथेही धक्का...

Nagaland News : महाराष्ट्र विधानसभेचे अध्यक्ष राहुल नार्वेकर यांनी राष्ट्रवादी काँग्रेस पक्ष अजित पवारांचाच असल्याचा निकाल नुकताच दिला. तसेच त्यांच्या सर्व 41 आमदारांनाही पात्र ठरवलं. त्यामुळे शरद पवारांना मोठा धक्का बसला. त्यानंतर नागालँडमध्येही अजित पवारांना मोठा दिलासा मिळाला आहे. (NCP MLA Disqualification Case) 

राष्ट्रवादीत दोन गट पडल्यानंतर नागालँडमधील पक्षाच्या सात आमदारांनी अजित पवार (Ajit Pawar) गटाला पाठिंबा दिला होता. त्यांच्याविरोधात शरद पवार (Sharad Pawar) गटाकडून तेथील विधानसभा अध्यक्षांकडे अपात्रता याचिका दाखल करण्यात आली होती. महाराष्ट्रातील (Maharashtra) निकाल आल्यानंतर नागालँडमधूनही अजित पवारांसाठी खूशखबर समोर आली आहे.

राष्ट्रवादीचे सर्व सात आमदार पात्र असल्याचा निकाल नागालँड विधानसभेचे अध्यक्ष शेरिंगेन लोंगकुमेर यांनी दिला आहे. शरद पवार गटाकडून करण्यात आलेली याचिका त्यांनी फेटाळली आहे. केंद्रीय निवडणूक आयोगाने अजित पवारांच्या बाजूने दिलेल्या निकालाचा आधार घेत त्यांनी हा निकाल दिला आहे.

(राजकारणातील महत्त्वाच्या बातम्यांचे अपडेट्ससाठी सरकारनामाचे अधिकृत WhatsApp चॅनल फॉलो करा!)

विधानसभा अध्यक्षांनी 16 फेब्रुवारीला दिलेल्या निकालानुसार, निवडणूक आयोगाचा निर्णय समोर आलेला आहे. ज्या आमदारांविरोधात याचिका दाखल करण्यात आली होती, त्यांना अजित पवारांना पाठिंबा दिला होता. आयोगाच्या निर्णयामुळे आता या आमदारांना पक्षांतरबंदी कायदा लागू होत नाही. त्यामुळे त्यांच्याविरोधातील तक्रार प्रलंबित ठेवण्यात काहीच औचित्य नाही.

शरद पवार गटाकडून 30 ऑगस्ट 2023 रोजी सात आमदारांविरोधात अपात्रता याचिका दाखल करण्यात आली होती. नागालँड राष्ट्रवादीचे अध्यक्ष वानथुंगो ओडयू यांनी विधानसभा अध्यक्ष कार्यालयाला 6 फेब्रुवारीला निवडणूक आयोगाने दिलेल्या निर्णयाचा आदेश उपलब्ध करून दिला होता. त्याआधारे अध्यक्षांनी अजित पवार गटाच्या बाजूने निकाल दिला आहे. नागालँडमध्ये राष्ट्रवादी सात आमदार आहेत.