Odisha Health Minister Naba Das : ओडिशाचे आयोग्यमंत्री नाबा दास यांचा उपचारादरम्यान मृत्यू

Odisha Health Minister Naba Das : ओडिशाचे आरोग्य मंत्री नबा किशोर दास यांचा उपचारादरम्यान मृत्यू झाला. रविवारी एकाने मंत्र्यांवर गोळ्या झाडल्या होत्या. नबा दास हे ब्रजराजनगर येथील गांधी चौकात एका कार्यक्रमात सहभागी होण्यासाठी जात असताना त्यांच्यावर हल्ला झाला होता.

जखमी अवस्थेत त्यांना विमानाने भुवनेश्वरला नेण्यात आले होते. मुख्यमंत्री नवीन पटनायक यांनी स्वतः रुग्णालयात जाऊन नब किशोर दास यांच्या प्रकृतीची विचारपूस केली होती. अपोलो रुग्णालयाकडून एक निवेदन जारी करण्यात आले होते. ज्यामध्ये छातीच्या डाव्या बाजूला गोळी लागल्याचे सांगण्यात आले होते.

डॉ. देबाशिष नायक यांच्या नेतृत्वाखालील डॉक्टरांच्या पथकाने त्यांच्यावर तात्काळ उपचार करून त्यांच्यावर शस्त्रक्रिया केली होती. मात्र, ऑपरेशनमध्ये त्यांच्या अंगात गोळी घुसल्याचे आढळून आले. त्यामुळे हृदयाला आणि डाव्या फुफ्फुसाला दुखापत झाली आणि मोठ्या प्रमाणात अंतर्गत रक्तस्त्राव झाला. त्यामुळे त्यांचे निधन झाले.