शरदरावांकडून तरी शिका! पंतप्रधान मोदींकडून पवारांचं कौतुक

नवी दिल्ली : पंतप्रधान नरेंद्र मोदी (Narendra Modi) यांनी मंगळवारी राज्यसभेतही काँग्रेसवर हल्लाबोल केला. कोरोना काळात काँग्रेसनं राजकारण केल्याचा आरोप करत पंतप्रधान मोदींनी राष्ट्रवादी काँग्रेसचे अध्यक्ष शरद पवार यांचे कौतुक केले आहे. कोरोनाचा आढावा घेण्यासाठी केंद्र सरकारने बोलवलेल्या सर्वपक्षीय बैठकीला काँग्रेसनं दांडी मारली होती. त्याचाच संदर्भ देत पंतप्रधानांनी शरद पवारांचे आभारही मानले. (Narendra Modi Praised Sharad Pawar)

पंतप्रधान मोदींनी सोमवारी लोकसभेत केलेल्या भाषणावरून महाराष्ट्रात पडसाद उमटत आहेत. काँग्रेस तिकीटे वाटून बिहार, उत्तर प्रदेशातील लोकांना राज्याबाहेर पाठवले, अशी टीका मोदींनी केली होती. त्यावर राष्ट्रवादीसह काँग्रेस व शिवसेनेच्या नेत्यांनी टीकास्त्र सोडलं आहे. मंगळवारी राज्यसभेतही पंतप्रधानांनी काँग्रेसला जोरदार टोले लगावले. पण यावेळी त्यांनी शरद पवार यांचे कौतुक केल्याने अनेकांच्या भुवया उंचावल्या.

कोरोना काळात बोलावण्यात आलेल्या सर्वपक्षीय बैठकीचा संदर्भ देत पंतप्रधान मोदी म्हणाले, कोरोना काळात देशातील मुख्यमंत्र्यांसोबत 23 बैठका घेतल्या. केंद्राने बोलावलेल्या सर्वपक्षीय बैठकीवर काही जणांकडून बहिष्कार टाकण्याचा प्रयत्न होता. विरोधी पक्षाच्या नेत्यांनी बैठकीला हजर राहू नये, यासाठी प्रयत्न करण्यात आले. तेही उपस्थित राहिले नाही. पण शरदरावांचे (शरद पवार) आभार मानतो. शरद पवार, तृणमूल काँग्रेस व इतर पक्षाच्या नेत्यांनी बैठकीला हजेरी लावली.

बैठकीला हजर न राहण्याचा निर्णय यूपीएचा नाही, असं म्हणत पवारांनी जास्तीत जास्त लोकांशी मी बोलेन, असं सांगितलं होतं. त्यामुळे त्यांचे आभार मानतो. मानव जातीवर कोरोनाचे संकट असताना काँग्रेसनं बैठकीवर बहिष्कार टाकला. त्यामुळे शरद पवार यांच्याकडून काहीतरी शिकायला हवे. त्यांनी बैठकीत अनेक सुचनाही केल्या, असे मोदींनी सांगितले.

दरम्यान, कोरोना काळानंतर रोजगार वाढल्याचे सांगत मोदी म्हणाले, कोरोना लॉकडाऊन उठल्यानंतर देशातील नोकर भरतीत दोन पटीने वाढ झाली आहे. नॅसकॉमच्या अहवालतही हेच दिसते. अलीकडे आयटी क्षेत्रातही 27 लाख लोकांना रोजगार मिळाला आहे. कोरोना काळात गरिबांच्या सशक्तीकरणासाठी सरकारने खूप प्रयत्न केले. शंभर टक्के लसीकरणाकडे आपली वाटचाल सुरू आहे. या काळात देशातील 80 कोटींहून अधिक नागरिकांना मोफत रेशनचे वाटप करण्यात आल्याचेही मोदींनी सांगितले.