PM Narendra Modi : पंतप्रधान मोदींचा दिल्लीसाठी ‘प्लॅन’ ठरला; रविवारी करणार शंखनाद

New Delhi : दिल्ली काबीज करण्यासाठी आतुर असलेल्या भाजपने विधानसभा निवडणुकीची जय्यत तयारी केली आहे. आम आदमी पक्षासह काँग्रेसने उमेदवार जाहीर करण्यात आघाडी घेतली असली तरी भाजपला त्याची चिंता नाही. भाजपचा निवडणुकीचा प्लॅन ठरला असून 29 डिसेंबरला खुद्द पंतप्रधान नरेंद्र मोदी शंखनाद करणार आहेत.

आम आदमी पक्षाने सर्व 70 जागांवर उमेदवार जाहीर केले आहेत. काँग्रेसनेही जवळपास 50 उमेदवारांची घोषणा केली आहे. पण अद्याप भाजपकडून एकही उमेदवार समोर आलेला नाही. त्यामुळे भाजपचे नेमके कसले प्लॅनिंग सुरू आहे, याची चर्चा राजकीय वर्तुळात सुरू असतानाच मोदींच्या सभेची बातमी धडकली आहे. आपचा दिल्लीतील विजयरथ रोखण्यासाठी पहिला घाव मोदींकडून घातला जाणार आहे.

भाजपने 29 तारखेला दिल्लीत मोदींच्या मोठ्या सभेचे नियोजन केले आहे. या सभेतून मोदी निवडणुकीचे बिगुल फुंकतील. ही परिवर्तन सभा दिल्लीतील जपानी पार्कमध्ये होणार आहे. याबाबत ‘आज तक’ने वृत्त दिले आहे. या सभेसाठी भाजपने जय्यत तयारी सुरू केली आहे. राज्यातील सर्व विधानसभा मतदारसंघातील लोकांना सभेला आणण्याचा प्रयत्न आहे. कार्यकर्त्यांमध्ये उत्साह निर्माण करण्यासाठी मोदींची ही पहिलीच सभा असेल.

दुसरीकडे आपने सर्व मतदारसंघातील उमेदवार जाहीर करत प्रचारालाही सुरूवात केली आहे. अनेक योजनाही जाहीर करण्यात आल्या असून मतदारांपर्यंत त्या पोहचवण्यासाठी जोरकस प्रयत्न सुरू आहेत. काँग्रेसनेही आप आणि भाजपविरोधात श्वेतपत्रिका जारी करत आपणही लढतीत असल्याचे दाखवून दिले आहे. आप, भाजप आणि काँग्रेस अशीच तिरंगी लढत राज्यात होणार, हे निश्चित आहे.

वेळापत्रक कधी जाहीर होणार?

दिल्लीतील विधानसभा निवडणूक फेब्रुवारीमध्ये होणार असल्याने पुढील काही दिवसांतच निवडणुकीचे वेळापत्रक जाहीर होऊ शकते. केंद्रीय निवडणूक आयोगाकडून नव्या वर्षाच्या पहिल्या किंवा दुसऱ्या आठवड्यात निवडणुकीची घोषणा केली जाईल, असा अंदाज आहे. दिल्लीसह बिहारमध्येही निवडणूक होणार आहे.