ISI Spies in Panjab : धक्कादायक! पहलगाम हल्ल्यानंतर अमृतसरमध्ये ISI चे गुप्तहेर? दोघांच्या अटकेमुळे खळबळ

Amritsar News : काश्मीरमधील पहलगाममध्ये झालेल्या दहशतवादी हल्ल्यानंतर केंद्र सरकार आणि भारतीय लष्कर अ‍ॅक्शन मोडमध्ये आले आहे. काश्मीरमध्ये अनेक ठिकाणी छापेमारी सुरू असून NIA कडूनही चौकशी केली जातेय. याचदरम्यान आता अमृतसरमध्ये पंजाब पोलिसांनी मोठी कारवाई केल्याचे समोर आले आहे. अमृतसर पोलिसांनी येथून दोघांना अटक केली असून चौकशीत ते दोघे पाकिस्तानची गुप्तचर संस्था आयएसआयचे गुप्तहेर असल्याचं आता समोर आले आहे. पलक शेर मसीह आणि सूरज मसीह अशी या दोघांची नावे आहेत.

पहलगाममध्ये झालेल्या भ्याड हल्ल्यात 26 पर्यटकांचे प्राण गेले आहेत. यामुळे भारत सरकारने पाकिस्तानशी असणारे सर्व राजनैतिक संबंध कमी करत मोठे निर्णय घेतले. यामध्ये सर्व पाकिस्तानी लोकांना परत पाठवणे. आयात-निर्यातीवर बंदी घालण्यासह सिंधू करारही रद्द करण्यात आला आहे. यानंतर आता नियंत्रण सीमेसह देशांतर्गत देखील तपास यंत्रणांकडून तपास केला जात आहे.

यादरम्यान अमृतसरमध्ये पंजाब पोलिसांनी पाकिस्तानी हेरांविरोधात मोहिम हाती घेत मोठी कारवाई केली आहे. पलक शेर मसीह आणि सूरज मसीह अशा दोन आयएसआयच्या एजेंटांना पोलिसांना बेड्या ठोकल्या आहेत. हे दोघे येथून भारतीय लष्कर आणि अमृतसर एअरबेसशी संबंधित माहिती पाकिस्तानला देत असल्याचा पोलिसांचा संशय आहे. तर हे दोघे अमृतसर तुरुंगात बंद असलेल्या हरप्रीत सिंग उर्फ ​​हॅप्पीच्या संपर्कात असल्याचीही माहितीही आता समोर येत आहे.

पंजाब पोलिसांनी पलक शेर मसीह आणि सूरज मसीह या दोन संशयितांना अटक केली असून त्यांच्याकडून भारतीय लष्करी छावण्या, हवाई तळ आणि इतर मोक्याच्या ठिकाणांचे फोटो आणि माहिती सापडली आहे. आता या दोघांची चौकशी सुरू असून तपासात आणखी मोठे खुलासे होण्याची शक्यता आहे. या दोघांनी पाकिस्तानला आणखी कोणती माहिती पाठवली आहे? त्या नेमका यामागचा हेतू काय? याचाही तपास आता पंजाब पोलिस करत आहेत.

राजस्थानमधून एकास अटक

दरम्यान, एक दिवस आधीच राजस्थानमधून एका गुप्तहेराला अटक करण्यात आली होती. जैसलमेरमधील झिरो आरडी मोहनगडचा रहिवासी असून, पाकिस्तानी गुप्तहेरांना लष्करी क्षेत्राचे व्हिडिओ आणि फोटो पाठवत असल्याचा संशय पोलिसांना होती.