Rahul Gandhi News : भाजपनं पराचा कावळा केला! श्वानाच्या व्हायरल व्हिडिओवर राहुल गांधी भडकले

New Delhi : काँग्रेसचे नेते राहुल गांधी यांच्या भारत जोडो न्याय यात्रेतील एक व्हिडिओ सध्या सोशल मीडियात प्रचंड व्हायरल होत आहे. या व्हिडिओवरून भाजपने राहुल गांधींवर जोरदार टीका केली आहे. यात्रेदरम्यान एका श्वानाने न खाल्लेले बिस्कीट कार्यकर्त्याला खायला दिल्याचा दावा भाजपकडून केला जात आहे. त्यावरून आसामच्या मुख्यमंत्र्यांनीही निशाणा साधला होता. (Rahul Gandhi News)

राहुल गांधी यांनी भाजपचा दावा फेटाळून लावला आहे. याबाबत खुलासा करताना ते म्हणाले, 'यात्रेदरम्यान श्वानाला घेऊन त्याच्या मालकाला बोलावले होते. मी श्नानाला बिस्कीट देण्याचा प्रयत्न केला, पण ते ते घाबरल्याचे दिसले. त्यामुळे ते बिस्कीट मालकाला दिले. त्याच्या हातून श्वानाने बिस्कीट खाल्ले. मला समजले नाही, यामध्ये वादाचा मुद्दा काय आहे,' असा संताप त्यांनी व्यक्त केला. राहुल गांधींच्या या खुलाशामुळे भाजपचे (BJP) नेत्यांकडून करण्यात आलेला दावा फोल ठरला आहे.

भारत जोडो न्याय यात्रा (Bharat Jodo Nyay Yatra) झारखंडमध्ये असतानाचा दोन दिवसांपुर्वीचा हा व्हिडिओ आहे. हा व्हिडिओ काँग्रेसकडूनच (Congress) सोशल मीडियात पोस्ट करण्यात आला होता. याच घटनेचा एक व्हिडिओ भाजपच्या आयटी सेलचे अमित मालवीय यांनीही पोस्ट केला. त्यावर मालवीय यांनी म्हटले होते की, ‘श्वानाने न खाल्लेले बिस्कीट राहुल गांधींनी काँग्रेसच्या कार्यकर्त्याला दिले.’ व्हिडिओमध्ये राहुल गांधी एका व्यक्तीला बिस्कीट देताना दिसत आहेत. एवढाच व्हिडिओ त्यांनी पोस्ट केला होता.

आसामचे मुख्यमंत्री हिमंत बिस्वा सरमा हे मागील काही दिवसांपासून राहुल गांधींना सतत लक्ष्य करत आहेत. हा व्हिडिओ व्हायरल झाल्यानंतर त्यांनीही लगेच ट्विट केले. राहुल गांधी आणि त्यांचे कुटुंब मला बिस्कीट भरवू शकले नाहीत. मी स्वाभिमानी आसामी आणि भारतीय आहे. मी ते खाण्यास नकार दिला आणि काँग्रेसचा राजीनामा दिला, असे सरमा यांनी म्हटले होते.