राज्याचे उपमुख्यमंत्री अजित पवार यांचे दुःखद निधन झाले आहे. आज सकाळी अजितदादा मुंबईहून बारामतीला जात असताना बारामती एअरपोर्ट येथे लँडिंगवेळी हा अपघात झाला. अजित पवारांच्या विमानाचा अपघात कसा झाला, याबाबतची प्राथमिक माहिती आता हळूहळू समोर येत आहे. २८ जानेवारी २०२६ रोजी सकाळी मुंबईहून बारामतीकडे निघालेले चार्टर विमान बारामती विमानतळाजवळ कोसळले आणि या भीषण दुर्घटनेत अजित पवारांसह विमानातील सर्व सहा जणांचा दुर्दैवी मृत्यू झाला. या घटनेने संपूर्ण महाराष्ट्र हादरून गेला आहे.
सकाळी सुमारे ८ वाजून १० मिनिटांनी हे चार्टर विमान मुंबई विमानतळावरून उड्डाणासाठी रवाना झाले होते. उड्डाणाचा कालावधी साधारण ३५ ते ४० मिनिटांचा असल्याने विमान वेळेत बारामतीच्या दिशेने पुढे सरकत होते. मात्र, बारामती परिसरात त्या वेळी दाट धुके आणि कमी दृश्यता असल्याचे प्राथमिक माहितीतून समोर आले आहे.
विमानाने बारामती विमानतळावर लँडिंगसाठी पहिला प्रयत्न केला, पण तो अयशस्वी ठरला. त्यामुळे पायलटने सुरक्षिततेच्या दृष्टीने गो-अराउंड करत विमान पुन्हा हवेत घेतले. त्यानंतर दुसऱ्यांदा लँडिंगसाठी अप्रोच घेत असताना अचानक काही तांत्रिक अडचणी निर्माण झाल्याची शक्यता व्यक्त केली जात आहे. दुसऱ्या प्रयत्नादरम्यान विमानाचा ताबा सुटल्याने ते धावपट्टीच्या थोड्याच अंतरावर कोसळले.
रनवे ११ च्या थ्रेशोल्डजवळ विमान जमिनीवर आदळले आणि जोरदार स्फोट होऊन आगीचा भडका उडाला. काही अहवालांनुसार विमान धावपट्टीपासून सुमारे १०० फूट आधीच कोसळले. अपघात इतका भीषण होता की विमान पूर्णपणे जळून खाक झाले.
या विमानात अजित पवार, त्यांचे एक पीएसओ, एक अटेंडंट आणि दोन क्रू मेंबर्स – पायलट व को-पायलट असे एकूण सहा जण होते. दुर्दैवाने या अपघातातून कोणीही वाचले नाही, अशी माहिती नागरी विमान वाहतूक महासंचालनालयाने दिली आहे.
अपघातानंतर DGCA आणि एअरक्राफ्ट ॲक्सिडेंट इन्व्हेस्टिगेशन ब्युरो यांनी संयुक्तपणे चौकशी सुरू केली आहे. अपघातस्थळी पडलेले अवशेष तपासले जात असून ब्लॅक बॉक्स (फ्लाइट डेटा रेकॉर्डर आणि कॉकपिट व्हॉइस रेकॉर्डर) शोधण्याचे काम सुरू आहे. हवामानाची स्थिती, पायलट-एटीसी संवाद, विमानाची तांत्रिक स्थिती आणि लँडिंगदरम्यान घडलेल्या घडामोडींचा सखोल अभ्यास केला जाणार आहे.
सध्या समोर आलेली माहिती प्राथमिक स्वरूपाची असून अंतिम कारण चौकशी पूर्ण झाल्यानंतरच स्पष्ट होणार आहे. तोपर्यंत या दुर्घटनेने निर्माण केलेली हळहळ आणि प्रश्नचिन्हे कायम आहेत.
सरकारनामाचे सदस्य व्हा
शॉपिंगसाठी 'सकाळ प्राईम डील्स'च्या भन्नाट ऑफर्स पाहण्यासाठी क्लिक करा.
Read Latest Marathi Political News, Breaking Political News from Maharashtra, India, Pune & Mumbai at Sarkarnama. To Get Live Political Marathi News on Mobile, Download the Sarkarnama Mobile App for Android and IOS. सरकारनामा आता सर्व सोशल मीडिया प्लॅटफॉर्मवर. ताज्या राजकीय घडामोडींसाठी फेसबुक, ट्विटर, इन्स्टाग्राम, शेअर चॅट, टेलिग्रामवर आणि व्हॉट्सॲप आम्हाला फॉलो करा. तसेच, सरकारनामा यूट्यूब चॅनेलला आजच सबस्क्राइब करा.